អត្ថបទអំពីក្របទស្សនាវដ្ដី

របៀបធ្វើជាឪពុកដ៏ល្អ

លេង

របៀបធ្វើជាឪពុកដ៏ល្អ

ឪពុកម្នាក់ឈ្មោះម៉ៃឃឺល a ដែលរស់នៅអាហ្វ្រិកខាងត្បូង បានសួរថា៖«តើខ្ញុំអាចធ្វើយ៉ាងណាដើម្បីជួយកូនរបស់ខ្ញុំឲ្យទៅជាកូនល្អជាង?»។ គាត់សួរដូច្នេះ ព្រោះទោះជាគាត់ខំព្យាយាមធ្វើជាឪពុកល្អក៏ដោយ ក៏កូនប្រុសរបស់គាត់ដែលមានអាយុ១៩ឆ្នាំនៅតែរឹងចចេសដដែល។ ដូច្នេះ គាត់មិនដឹងថាតើគាត់គួរធ្វើជាឪពុកល្អប្រសើរជាងឬយ៉ាងណាទេ។

រីឯឪពុកម្នាក់ទៀតឈ្មោះធែរី ដែលរស់នៅប្រទេសអេស្ប៉ាញវិញ គាត់បានជោគជ័យក្នុងការធ្វើជាឪពុកល្អ។ កូនរបស់គាត់ឈ្មោះអេនទ្រូ បានរៀបរាប់ថា៖«បើគិតអំពីអនុស្សាវរីយ៍ជាមួយឪពុកខ្ញុំពេលខ្ញុំនៅវ័យកុមារ ខ្ញុំនឹកចាំថាឪពុករបស់ខ្ញុំអានសៀវភៅឲ្យខ្ញុំស្ដាប់ លេងជាមួយខ្ញុំ ហើយយកខ្ញុំទៅដើរលេងតែពីរនាក់ជាមួយគ្នា។ ការបង្ហាត់បង្រៀនរបស់គាត់តែងតែធ្វើឲ្យខ្ញុំសប្បាយរីករាយ»។

បើនិយាយឲ្យត្រង់ទៅ ការធ្វើជាឪពុកល្អ គឺមិនងាយស្រួលទេ។ ប៉ុន្តែ ក្នុងគម្ពីរមានគោលការណ៍ជាច្រើនដែលអាចជួយអ្នកឲ្យទៅជាឪពុកល្អ។ ឪពុកនិងក្រុមគ្រួសារជាច្រើនបានទទួលប្រយោជន៍ពីការធ្វើតាមយោបល់ដែលប្រកបដោយប្រាជ្ញានៅក្នុងគម្ពីរ។ ឥឡូវ សូមពិចារណាយោបល់ខ្លះៗក្នុងគម្ពីរដែលអាចជួយអ្នកឲ្យទៅជាឪពុកល្អ។

១. ចំណាយពេលជាមួយក្រុមគ្រួសារ

ក្នុងនាមជាឪពុក តើតាមរបៀបណាអ្នកបង្ហាញឲ្យកូនឃើញថាពួកគេសំខាន់ចំពោះអ្នក? តាមពិតអ្នកបានធ្វើអ្វីជាច្រើនដើម្បីកូនរបស់អ្នក។ អ្នកបានរកស៊ីចិញ្ចឹមពួកគេ ហើយផ្ដល់អ្វីដែលពួកគេត្រូវការ ដូចជាផ្ទះសម្បែងជាដើម។ ដោយសារពួកគេសំខាន់ចំពោះអ្នក បានជាអ្នកលះបង់បែបនេះ។ ប៉ុន្តែ បើអ្នកមិនបានចំណាយពេលគ្រប់គ្រាន់ជាមួយពួកគេទេ នោះពួកគេប្រហែលជាសន្និដ្ឋានថា អ្នកចាត់ទុកការងារ មិត្តភក្តិ ការកម្សាន្ត ឬអ្វីផ្សេងទៀតថាសំខាន់ជាងពួកគេ។

តើពេលណាឪពុកគួរចាប់ផ្ដើមចំណាយពេលជាមួយនឹងកូន? ម្ដាយចាប់ផ្ដើមជិតស្និទ្ធជាមួយកូន តាំងពីកូននៅក្នុងផ្ទៃមកម្ល៉េះ។ ពេលកូននៅក្នុងផ្ទៃបាន១៦សប្ដាហ៍ ពួកគេអាចស្ដាប់បាន។ ក្នុងដំណាក់កាលនោះ ឪពុកក៏អាចបណ្ដុះឲ្យមានភាពស្និទ្ធស្នាលជាមួយនឹងកូនបានដែរ គឺគាត់អាចស្ដាប់ចង្វាក់បេះដូងកូន អាចស្ដាប់សំឡេងកូនធាក់ អាចនិយាយទៅកាន់កូន និងច្រៀងឲ្យកូនស្ដាប់។

គោលការណ៍គម្ពីរ៖ នៅសម័យគម្ពីរឪពុកមានតួនាទីអប់រំកូនៗរបស់ពួកគាត់។ ពួកគាត់បានត្រូវលើកទឹកចិត្តឲ្យចំណាយពេលជាទៀងទាត់ជាមួយកូន។ យើងឃើញការណែនាំនេះនៅក្នុងសៀវភៅការបំភ្លឺច្បាប់ ៦:៦, ៧ ដែលចែងថា៖«ពាក្យដែលខ្ញុំបង្រៀនដល់អ្នករាល់គ្នានៅថ្ងៃនេះ ត្រូវដក់ជាប់នៅក្នុងចិត្តរបស់អ្នករាល់គ្នា ហើយអ្នករាល់គ្នាត្រូវបង្ហាត់បង្រៀនដល់កូនចៅរបស់ខ្លួន ដោយនិយាយប្រាប់ពួកគេក្នុងកាលដែលអង្គុយនៅក្នុងផ្ទះ ក្នុងកាលដែលដើរតាមផ្លូវ ក្នុងកាលដែលដេក និងក្រោកឡើងផង»។

២. ឪពុកល្អគឺជាឪពុកដែលស្រួលទាក់ទង

សូមយកចិត្តទុកដាក់ស្ដាប់កូនដោយមិនឆាប់ខឹងនិងមិនឆាប់រិះគន់

ដើម្បីធ្វើជាឪពុកដែលស្រួលទាក់ទង អ្នកត្រូវពូកែស្ដាប់។ នេះមានន័យថាអ្នកត្រូវស្ដាប់កូនដោយយកចិត្តទុកដាក់ ហើយមិនឆាប់មានប្រតិកម្ម។

បើកូនរបស់អ្នកគិតថាអ្នកជាមនុស្សឆាប់ខឹងនិងឆាប់រិះគន់ គាត់ច្បាស់ជាមិនហ៊ានប្រាប់អារម្មណ៍របស់គាត់ដល់អ្នកទេ។ ប៉ុន្តែ បើអ្នកស្ដាប់កូនដោយចិត្តស្ងប់ នោះកូននឹងស្រួលប្រាប់អារម្មណ៍ដល់អ្នកអស់ពីចិត្ត ហើយពួកគេក៏ឃើញថាអ្នកយកចិត្តទុកដាក់នឹងពួកគេយ៉ាងស្មោះដែរ។

គោលការណ៍គម្ពីរ៖ គម្ពីរមានគោលការណ៍ជាច្រើនដែលមានប្រយោជន៍សម្រាប់ជីវិតប្រចាំថ្ងៃ។ ជាឧទាហរណ៍ គម្ពីរចែងថា៖«ចូរដឹងថាមនុស្សម្នាក់ៗត្រូវរហ័សស្ដាប់ មិនរហ័សនិយាយ មិនរហ័សខឹង»។ (យ៉ាកុប ១:១៩) ពេលឪពុកធ្វើតាមគោលការណ៍គម្ពីរនេះ គាត់នឹងមានទំនាក់ទំនងល្អជាងជាមួយកូន។

៣. ឪពុកល្អចេះប្រៀនប្រដៅនិងសរសើរ

ពេលអ្នកប្រដៅកូន អ្នកត្រូវប្រៀនប្រដៅដោយសេចក្ដីស្រឡាញ់និងដោយគិតពីប្រយោជន៍កូន ទោះជាអ្នកមានអារម្មណ៍មួម៉ៅឬខឹងក៏ដោយ។ ការប្រៀនប្រដៅនេះអាចជាការផ្ដល់ដំបូន្មាន ការកែតម្រង់ ការអប់រំ ហើយក្នុងករណីខ្លះក៏អាចជាការដាក់ទោសដែរ។

បន្ថែមទៅទៀត ការប្រៀនប្រដៅកាន់តែមានប្រសិទ្ធភាព បើឪពុកសរសើរកូនជាទៀងទាត់។ សុភាសិតបុរាណមួយបានចែងថា៖«ពាក្យសម្ដីដែលពោលត្រូវពេល ប្រៀបដូចជាផ្លែប៉ោមមាសក្នុងចានប្រាក់»។ (សុភាសិត ២៥:១១) ការសរសើរអាចជួយកូនបណ្ដុះឲ្យមានគុណសម្បត្តិល្អៗ។ ពេលដែលកូនឃើញថាឪពុកម្ដាយកត់សម្គាល់និងឲ្យតម្លៃពួកគេ នោះពួកគេកាន់តែមានទំនុកចិត្ត។ ម្យ៉ាងទៀត ពេលដែលឪពុកព្យាយាមរកឱកាសសរសើរកូន នោះក៏ជំរុញចិត្តកូនឲ្យខំព្យាយាមធ្វើអ្វីដែលត្រឹមត្រូវដែរ។

គោលការណ៍គម្ពីរ៖ «ឪពុកទាំងឡាយអើយ កុំធ្វើឲ្យកូនខឹង ព្រោះធ្វើដូច្នេះនាំឲ្យកូនធ្លាក់ទឹកចិត្ត»។—កូឡុស ៣:២១

៤. ស្រឡាញ់និងឲ្យតម្លៃចំពោះប្រពន្ធ

របៀបដែលប្ដីប្រព្រឹត្តទៅលើប្រពន្ធអាចមានឥទ្ធិពលទៅលើកូន។ អ្នកជំនាញមួយក្រុមដែលសិក្សាអំពីការលូតលាស់របស់កុមារ បានពន្យល់ថា៖«វិធីដ៏ល្អបំផុតមួយដែលឪពុកអាចធ្វើ គឺគាត់ចេះឲ្យតម្លៃប្រពន្ធរបស់គាត់។ . . . ពេលដែលឪពុកម្ដាយប្រព្រឹត្តដោយគោរពនិងឲ្យតម្លៃគ្នា នោះនាំឲ្យកូនៗមានអារម្មណ៍សុខសាន្តនិងសប្បាយរីករាយ»(The Importance of Fathers in the Healthy Development of Children)។ b

គោលការណ៍គម្ពីរ៖ «ប្ដីទាំងឡាយអើយ ចូរស្រឡាញ់ប្រពន្ធជាដរាប . . . ចូរអ្នករាល់គ្នាម្នាក់ៗស្រឡាញ់ប្រពន្ធរបស់ខ្លួន ដូចស្រឡាញ់ខ្លួនអ្នក»។—អេភេសូរ ៥:២៥, ៣៣

៥. ធ្វើតាមប្រាជ្ញាពីព្រះ

ឪពុកដែលស្រឡាញ់ព្រះយេហូវ៉ាយ៉ាងស្មោះអស់ពីចិត្ត អាចជួយកូនគាត់ឲ្យមានចំណងមិត្តភាពជិតស្និទ្ធនឹងព្រះយេហូវ៉ាដែលជាបិតានៅស្ថានសួគ៌របស់ពួកគេ នោះគឺជាអ្វីដែលមានតម្លៃបំផុត។

ឪពុកម្នាក់ឈ្មោះអាន់តូនីយ៉ូ ដែលជាសាក្សីព្រះយេហូវ៉ា គាត់បានចិញ្ចឹមអប់រំកូន៦នាក់អស់រយៈពេលជាច្រើនឆ្នាំ។ គាត់បានទទួលសំបុត្រពីកូនស្រីម្នាក់ ដែលបានរៀបរាប់ថា៖«ជូនចំពោះប៉ាជាទីស្រឡាញ់ កូនចង់អរគុណប៉ាដែលបានចិញ្ចឹមអប់រំកូនឲ្យស្រឡាញ់ព្រះយេហូវ៉ា ស្រឡាញ់អ្នកជិតខាង និងចេះស្រឡាញ់ខ្លួនឯង ហើយនេះពិតជាមានតម្លៃណាស់ចំពោះកូន។ កូនឃើញថាប៉ាស្រឡាញ់ព្រះយេហូវ៉ា ហើយយកចិត្តទុកដាក់ចំពោះកូន។ កូនសូមអរគុណប៉ាដែលបានចាត់ទុកព្រះយេហូវ៉ាជាបុគ្គលសំខាន់បំផុតក្នុងជីវិត ហើយស្រឡាញ់និងយកចិត្តទុកដាក់ចំពោះកូនដែលជាអំណោយពីព្រះ!»។

គោលការណ៍គម្ពីរ៖ «អ្នករាល់គ្នាត្រូវស្រឡាញ់ព្រះយេហូវ៉ាជាព្រះនៃអ្នករាល់គ្នា ឲ្យអស់ពីដួងចិត្ត អស់ពីជីវិត និងអស់ពីកម្លាំងកាយ។ ពាក្យដែលខ្ញុំបង្រៀនដល់អ្នករាល់គ្នានៅថ្ងៃនេះ ត្រូវដក់ជាប់នៅក្នុងចិត្តរបស់អ្នករាល់គ្នា»។—ការបំភ្លឺច្បាប់ ៦:៥, ៦

យើងឃើញច្បាស់ថាដើម្បីទៅជាឪពុកល្អ មិនគ្រាន់តែមានចំណុចប្រាំនេះប៉ុណ្ណោះទេ តែក៏មានចំណុចផ្សេងទៀតដែរ។ បើនិយាយឲ្យត្រង់ទៅ ទោះជាអ្នកខំអស់ពីសមត្ថភាពធ្វើជាឪពុកល្អក៏ដោយ អ្នកមិនអាចក្លាយជាឪពុកល្អឥតខ្ចោះទេ។ ប៉ុន្តែ បើអ្នកបង្ហាញសេចក្ដីស្រឡាញ់ដល់កូនៗ និងខិតខំផ្គត់ផ្គង់អ្វីដែលពួកគេត្រូវការ នោះអ្នកអាចក្លាយជាឪពុកល្អ។ c

a ឈ្មោះខ្លះក្នុងអត្ថបទនេះបានត្រូវប្ដូរ។

b ទោះជាប្ដីបានលែងលះជាមួយប្រពន្ធក៏ដោយ តែបើគាត់ឲ្យតម្លៃនិងគោរពចំពោះប្រពន្ធនោះ នេះនឹងជួយកូនឲ្យរក្សាទំនាក់ទំនងល្អជាមួយម្ដាយ។

c ដើម្បីទទួលយោបល់ថែមទៀតអំពីក្រុមគ្រួសារ សូមមើលសៀវភៅគន្លឹះនៃសុភមង្គលគ្រួសារ ដែលមាននៅក្នុងគេហទំព័ររបស់យើងwww.jw.org។

ឪពុកល្អមិនរវល់ពេក

ឪពុកម្នាក់ឈ្មោះស៊ីលវិន ដែលមកពីបាបាដុស គាត់ជាអ្នកបើកឡានក្រុង នៅក្រុងញូវយ៉ក។ គាត់និងប្រពន្ធមានកូនប្រុសជំទង់បីនាក់។ គាត់រវល់ខ្លាំងណាស់ គាត់ធ្វើការចាប់ពីម៉ោងបីរសៀល រហូតដល់ម៉ោងបីឬបួនព្រឹក។ គាត់សម្រាកនៅថ្ងៃព្រហស្បតិ៍និងថ្ងៃសុក្រ តែថ្ងៃសៅរ៍និងថ្ងៃអាទិត្យគាត់ធ្វើការតែពេលយប់ប៉ុណ្ណោះ។ ទោះជាយ៉ាងនោះក៏ដោយ គាត់តែងតែលៃពេលជាមួយកូនៗរបស់គាត់។

ស៊ីលវិនបានប្រាប់ថា៖«ខ្ញុំរវល់ណាស់ តែខ្ញុំព្យាយាមចំណាយពេលជាមួយកូនប្រុសរបស់ខ្ញុំគ្រប់គ្នា។ នៅថ្ងៃព្រហស្បតិ៍ពេលរសៀល ខ្ញុំចំណាយពេលជាមួយកូនច្បង ក្រោយគាត់ចេញពីសាលា។ នៅថ្ងៃសុក្រ ខ្ញុំចំណាយពេលជាមួយកូនប្រុសកណ្ដាល ហើយនៅព្រឹកថ្ងៃអាទិត្យ ខ្ញុំចំណាយពេលជាមួយកូនប្រុសពៅ»។

អំណរគុណចំពោះឪពុក

ប្អូនសៀរ៉ាដែលមានអាយុ៥ឆ្នាំ បាននិយាយថា៖«ប៉ាខ្ញុំលេងជាមួយខ្ញុំ ហើយរាល់យប់គាត់អានសៀវភៅឲ្យខ្ញុំស្ដាប់»។

ប្អូនម៉ៃឃឺលដែលមានអាយុ១០ឆ្នាំ បាននិយាយថា៖«ប៉ានិងខ្ញុំតែងតែលេងជាមួយគ្នា ហើយគាត់និយាយថា៖‹តោះប៉ុណ្ណឹងបានហើយកូន ឥឡូវយើងសម្អាតម្ដង›។ ជួនកាល ពេលខ្ញុំនិងប៉ាធ្វើកិច្ចការផ្ទះរួច ប៉ានិយាយថា៖‹តោះកូនឥឡូវយើងទៅលេងម្ដង›»។

អេនទ្រូដែលមានអាយុ៣២ឆ្នាំ បាននិយាយថា៖«ប៉ាមិនឲ្យការងារ ឬការកម្សាន្ដធ្វើឲ្យគាត់រវល់ពេក រហូតដល់មិនមានពេលជួយម៉ាក់ធ្វើកិច្ចការផ្ទះនោះទេ គាត់តែងតែជួយម៉ាក់ជានិច្ច។ រហូតមកដល់ឥឡូវ គាត់នៅតែឧស្សាហ៍ជួយម៉ាក់ធ្វើម្ហូប លាងចាន សម្អាតផ្ទះ ហើយគាត់ស្រឡាញ់ថ្នាក់ថ្នមម៉ាក់ខ្លាំងណាស់»។

ប្រធានបទឯទៀតអំពីរឿងនេះ

ការចិញ្ចឹមអប់រំកូន អាពាហ៍ពិពាហ៍និងក្រុមគ្រួសារ

ភ្ញាក់រឭក!