អត្ថបទអំពីក្របទស្សនាវដ្ដី | ហេតុអ្វីគួរប្រព្រឹត្ដទៀងត្រង់?

ហេតុអ្វីការប្រព្រឹត្ដទៀងត្រង់មានប្រយោជន៍?

លេង

«ចិត្ដរបស់យើងនឹងវិនិច្ឆ័យយើងថាគ្មានទោស ព្រោះយើងចង់ធ្វើការទាំងអស់ដោយទៀងត្រង់»។—ហេប្រឺ ១៣:១៨

ក្នុងគម្ពីរពាក្យភាសាក្រិចដែលជួនកាលបានត្រូវបកប្រែថា«ទៀងត្រង់»គឺសំដៅទៅលើ«អ្វីដែលល្អគ្រប់លក្ខណៈ»។ ពាក្យនេះក៏បង្កប់អត្ថន័យទៅលើអ្វីដែលល្អខាងសីលធម៌ផងដែរ។

គ្រិស្ដសាសនិកយល់សារៈសំខាន់នៃពាក្យរបស់សាវ័កម្នាក់របស់លោកយេស៊ូឈ្មោះប៉ូល ដែលព្រះបានដឹកនាំឲ្យសរសេរថា៖ «យើងចង់ធ្វើការទាំងអស់ដោយទៀងត្រង់»។ តើនោះរួមបញ្ចូលអ្វីខ្លះ?

ការប្រទាញប្រទង់រវាងចិត្ដនិងគំនិតខ្លួន

មនុស្សភាគច្រើនឆ្លុះកញ្ចក់រៀងរាល់ព្រឹកមុននឹងចេញពីផ្ទះ។ ហេតុអ្វី? ពីព្រោះពួកគេចង់ឲ្យមនុស្សឃើញថាពួកគេស្អាតបាត។ ប៉ុន្ដែ មានអ្វីមួយដែលសំខាន់ជាងម៉ូដសក់និងសម្លៀកបំពាក់ទាន់សម័យទៅទៀត។ តើនោះជាអ្វី? គឺលក្ខណៈខាងក្នុងចិត្ដយើង។ ការពិត លក្ខណៈខាងក្នុងអាចបន្ថែមឬបន្ថយសម្រស់របស់យើង។

បណ្ដាំរបស់ព្រះបានប្រាប់ចំៗថា យើងមានទំនោរចិត្ដចង់តែធ្វើអាក្រក់។ លោកុប្បត្ដិ ៨:២១ចែងថា៖ «គំនិតក្នុងចិត្ដមនុស្ស នោះអាក្រក់តាំងតែពីក្មេងមក»។ ហេតុនេះ ដើម្បីប្រព្រឹត្ដទៀងត្រង់ យើងត្រូវយកឈ្នះទំនោរចិត្ដរបស់យើងដែលមានតាំងពីកំណើត ដែលចង់តែធ្វើអំពើខុសឆ្គង។ សាវ័កប៉ូលបានរៀបរាប់យ៉ាងច្បាស់អំពីការប្រទាញប្រទង់ដែលមានក្នុងខ្លួនគាត់ ដោយថា៖ «ក្នុងចិត្ដខ្ញុំ ខ្ញុំពិតជាត្រេកអរនឹងច្បាប់របស់ព្រះ ប៉ុន្ដែខ្ញុំសង្កេតឃើញថា មានច្បាប់មួយទៀតក្នុងអវយវៈរបស់ខ្ញុំ ដែលកំពុងច្បាំងនឹងច្បាប់ដែលនៅក្នុងគំនិតខ្ញុំ ហើយកំពុងនាំខ្ញុំទៅជាឈ្លើយក្រោមអំណាចច្បាប់នៃភាពខុសឆ្គង ដែលនៅក្នុងអវយវៈរបស់ខ្ញុំ»។—រ៉ូម ៧:២២, ២៣

ជាឧទាហរណ៍ ពេលខ្លះចិត្ដរបស់យើងជំរុញយើងឲ្យធ្វើអ្វីដែលខុស ហើយយើងមានទំនោរចិត្ដខ្លាំងចង់ប្រព្រឹត្ដមិនទៀងត្រង់ តែយើងមិនចាំបាច់ធ្វើតាមសម្ទុះចិត្ដរបស់យើងទេ។ ការពិត យើងនៅតែអាចសម្រេចចិត្ដធ្វើតាមឬមិនធ្វើតាម។ ពេលយើងសម្រេចចិត្ដបដិសេធគំនិតអាក្រក់នោះ យើងអាចរក្សាភាពទៀងត្រង់ ទោះជាមនុស្សនៅជុំវិញយើងប្រព្រឹត្ដមិនទៀងត្រង់ក៏ដោយ។

វិធីយកឈ្នះទំនោរចិត្ដរបស់យើង

ដើម្បីប្រព្រឹត្ដទៀងត្រង់ យើងត្រូវការគោលការណ៍សីលធម៌ត្រឹមត្រូវ។ ប៉ុន្ដែគួរឲ្យស្តាយណាស់ មនុស្សជាច្រើនគិតអំពីសម្បកក្រៅរបស់ខ្លួនច្រើនជាងគោលការណ៍សីលធម៌។ ជាលទ្ធផល ពួកគេរកលេសប្រព្រឹត្ដមិនទៀងត្រង់ ដើម្បីសម្របតាមស្ថានភាពរបស់ពួកគេ។ សៀវភៅមួយដែលសរសេរអំពីភាពមិនទៀងត្រង់រៀបរាប់ថា៖ «បើនិយាយឲ្យចំទៅ យើងសុខចិត្ដប្រព្រឹត្ដមិនទៀងត្រង់ ឲ្យតែនោះមិនបង្ខូចកេរ្ដិ៍ឈ្មោះយើង» (The (Honest) Truth About Dishonesty)។ ប៉ុន្ដែ តើមានខ្នាតតម្រាមួយដ៏គួរឲ្យទុកចិត្ដដែលអាចជួយយើងសម្រេចចិត្ដថាគួរឬមិនគួរប្រព្រឹត្ដទៀងត្រង់ឬទេ? ការពិតមានមែន។

មនុស្សរាប់លាននាក់នៅទូទាំងពិភពលោកបានឃើញថា គម្ពីរផ្ដល់គោលការណ៍សីលធម៌ដ៏ត្រឹមត្រូវនិងគួរឲ្យទុកចិត្ដ។ គម្ពីរមានគោលការណ៍សីលធម៌ដ៏ខ្ពង់ខ្ពស់បំផុត។ (ទំនុកតម្កើង ១៩:៧) គម្ពីរមានការណែនាំដែលគួរឲ្យទុកចិត្ដស្ដីអំពីរឿងជាច្រើនដូចជា រឿងទាក់ទងនឹងក្រុមគ្រួសារ រឿងការងារ រឿងសីលធម៌ និងការគោរពប្រណិប័តន៍ព្រះ។ ការណែនាំស្ដីអំពីរឿងទាំងនោះមានប្រយោជន៍ជារៀងរហូត។ ច្បាប់និងគោលការណ៍គម្ពីរមានប្រយោជន៍សម្រាប់មនុស្សគ្រប់ជាតិសាសន៍ និងកុលសម្ព័ន្ធ។ បើយើងពិនិត្យមើលគម្ពីរយ៉ាងយកចិត្ដទុកដាក់ និងរំពឹងគិតអំពីព័ត៌មានក្នុងនោះ ព្រមទាំងធ្វើតាមដំបូន្មានក្នុងគម្ពីរ នោះយើងអាចហាត់ពត់លត់ដំខ្លួនឲ្យប្រព្រឹត្ដទៀងត្រង់និងសុចរិតជានិច្ច។

ប៉ុន្ដែ ក្រៅពីការទទួលចំណេះត្រឹមត្រូវក្នុងគម្ពីរ គឺនៅមានអ្វីមួយទៀតដែលយើងត្រូវធ្វើដើម្បីយកឈ្នះទំនោរចិត្ដចង់ប្រព្រឹត្ដមិនទៀងត្រង់។ តើនោះជាអ្វី? គឺការអធិដ្ឋាន។ ដោយសារយើងរស់នៅក្នុងពិភពលោកដែលមានសីលធម៌អាប់ឱន នោះងាយឲ្យយើងរងការបង្ខិតបង្ខំឲ្យធ្វើតាមខ្នាតតម្រាដ៏អាក្រក់របស់ពិភពលោកនេះណាស់។ ដូច្នេះ យើងត្រូវអធិដ្ឋានសុំជំនួយព្រះនិងការគាំទ្រពីលោក។ (ភីលីព ៤:៦, ៧, ១៣) បើយើងធ្វើដូច្នោះ យើងអាចមានចិត្ដក្លាហានដើម្បីកាន់ជំហរមុតមាំចំពោះអ្វីដែលត្រឹមត្រូវ និងប្រព្រឹត្ដទៀងត្រង់ក្នុងគ្រប់ការទាំងអស់។

ប្រយោជន៍ដែលមកពីការប្រព្រឹត្ដទៀងត្រង់

ហ៊ីតូហ្ស៊ីដែលបានត្រូវរៀបរាប់នៅអត្ថបទដើម បានទទួលប្រយោជន៍ពីការមានកេរ្ដិ៍ឈ្មោះជាបុគ្គលិកដ៏ទៀងត្រង់។ គាត់ឥឡូវធ្វើការឲ្យចៅហ្វាយម្នាក់ដែលឲ្យតម្លៃចំពោះភាពទៀងត្រង់របស់គាត់។ ហ៊ីតូហ្ស៊ីបាននិយាយថា៖ «ខ្ញុំពិតជាសប្បាយចិត្ដណាស់ ដែលខ្ញុំអាចរកការងារមួយដែលខ្ញុំមិនចាំបាច់មានអារម្មណ៍មិនស្រួលនោះទេ»។

មានមនុស្សផ្សេងទៀតក៏មានអារម្មណ៍ដូចហ៊ីតូហ្ស៊ីដែរ។ សូមពិចារណាឧទាហរណ៍ខ្លះអំពីពួកអ្នកដែលបានទទួលប្រយោជន៍ពីការធ្វើតាមគោលការណ៍គម្ពីរ ដែលថាត្រូវ«ធ្វើការទាំងអស់ដោយទៀងត្រង់»។

ចិត្ដមិនផ្ដន្ទាទោស

ស្ដ្រីម្នាក់ឈ្មោះហ្សឺរើលដែលរស់នៅប្រទេសអៀរឡង់ បានរៀបរាប់ថា៖ «ខ្ញុំបានឈប់រៀននៅសាលាតាំងពីអាយុ១៣ឆ្នាំ ដើម្បីធ្វើការជាមួយក្រុមចោរ។ ដោយសារនោះខ្ញុំមានប្រាក់ចំណូល តែប្រាក់ចំណូល៩៥ភាគរយជាប្រាក់ដែលបានមកពីការប្រព្រឹត្ដមិនទៀងត្រង់។ ក្រោយមក ខ្ញុំបានរៀបការ ហើយប្ដីរបស់ខ្ញុំនិងខ្ញុំបានចាប់ផ្ដើមរៀនគម្ពីរជាមួយនឹងសាក្សីព្រះយេហូវ៉ា។ យើងបានរៀនថាព្រះយេហូវ៉ា *ស្អប់ការប្រព្រឹត្ដដែលមិនទៀងត្រង់ ដូច្នេះយើងបានសម្រេចចិត្ដកែប្រែរបៀបរស់នៅរបស់យើង។ នៅឆ្នាំ១៩៩០ យើងបានប្រគល់ខ្លួនជូនព្រះយេហូវ៉ា ហើយបានទទួលការជ្រមុជទឹកជាសាក្សីព្រះយេហូវ៉ា»។—សុភាសិត ៦:១៦-១៩

ហ្សឺរើលរៀបរាប់បន្ដថា៖ «ពីមុន ផ្ទះរបស់ខ្ញុំពេញដោយរបស់របរដែលខ្ញុំបានលួចពីគេ តែឥឡូវលែងមានរបស់បែបនោះទៀតហើយ។ សព្វថ្ងៃនេះ ចិត្ដខ្ញុំមិនផ្ដន្ទាទោសខ្ញុំទេ។ បើគិតអំពីភាពមិនទៀងត្រង់ដែលខ្ញុំបានធ្វើកាលពីច្រើនឆ្នាំមុន ខ្ញុំពិតជាអរគុណព្រះយេហូវ៉ាណាស់ដែលលោកបានបង្ហាញសេចក្ដីមេត្ដាករុណាយ៉ាងខ្លាំងចំពោះខ្ញុំ។ ខ្ញុំពិតជាមានអារម្មណ៍សុខសាន្ដដែលអាចចូលគេងជារៀងរាល់យប់ដោយដឹងថាព្រះយេហូវ៉ាពេញចិត្ដនឹងការប្រព្រឹត្ដរបស់ខ្ញុំ»។

បុរសម្នាក់ឈ្មោះសុនណេរស់នៅក្រុងហុងកុង បានប្រាប់ថា៖ «ពេលចៅហ្វាយខ្ញុំបានដឹងថាខ្ញុំមិនព្រមទទួលសំណូកពីអតិថិជនម្នាក់ ចៅហ្វាយខ្ញុំបាននិយាយមកកាន់ខ្ញុំថា៖ ‹ព្រះរបស់អ្នកធ្វើឲ្យអ្នកក្លាយទៅជាមនុស្សគួរឲ្យទុកចិត្ដណាស់! យើងពិតជាសប្បាយណាស់ដែលមានអ្នកធ្វើការជាមួយ›។ ការប្រព្រឹត្ដទៀងត្រង់ក្នុងគ្រប់ការទាំងអស់ ជួយខ្ញុំកុំឲ្យមានអារម្មណ៍ស្តាយក្រោយថាបានធ្វើខុសចំពោះព្រះយេហូវ៉ា ហើយនោះក៏បានជួយក្រុមគ្រួសារខ្ញុំនិងអ្នកឯទៀតប្រព្រឹត្ដទៀងត្រង់ដែរ»។
សេចក្ដីសុខសាន្ដក្នុងចិត្ដ

បុរសម្នាក់ឈ្មោះថាម រស់នៅសហរដ្ឋអាម៉េរិកបានប្រាប់ថា៖ «ខ្ញុំធ្វើការជាអ្នកចាត់ចែងកិច្ចការទូទៅក្នុងធនាគារអន្ដរជាតិមួយ។ ក្នុងពិភពពាណិជ្ជកម្ម គេមិនសូវខ្វល់អំពីភាពទៀងត្រង់ប៉ុន្មានទេ អ្វីដែលគេខ្វល់គឺភាពមានបាន។ ទស្សនៈនេះមានជាទូទៅ គឺថា‹បើមិនទៀងត្រង់បន្ដិចបន្ដួច ដើម្បីក្លាយជាអ្នកមាន និងជួយសេដ្ឋកិច្ចជាតិ តើខុសអី?›។ ប៉ុន្ដែ ការធ្វើជាមនុស្សទៀងត្រង់ជួយខ្ញុំឲ្យមានសេចក្ដីសុខសាន្ដក្នុងចិត្ដ។ ខ្ញុំបានតាំងចិត្ដរក្សាភាពទៀងត្រង់ ទោះជាជួបការពិបាកក៏ដោយ។ ចៅហ្វាយខ្ញុំដឹងថាខ្ញុំមិននិយាយកុហកគាត់ ហើយខ្ញុំក៏មិនព្រមកុហកជំនួសគាត់ដែរ»។
មោទនភាពចំពោះខ្លួន

ស្ដ្រីម្នាក់ឈ្មោះកាអូរី រស់នៅប្រទេសជប៉ុនបានប្រាប់ថា៖ «នៅកន្លែងធ្វើការ ប្រធានផ្នែកខ្ញុំលើកទឹកចិត្ដឲ្យខ្ញុំនិយាយកុហកអំពីទំនិញដែលបាត់ តែខ្ញុំមិនព្រមកុហកទេ។ ទីបំផុតគេបានរកឃើញចោរដែលបានលួចទំនិញទាំងនោះ នាយកក្រុមហ៊ុនបានអរគុណខ្ញុំចំពោះការប្រព្រឹត្ដទៀងត្រង់។ ក្នុងពិភពលោកនេះដែលពោរពេញទៅដោយភាពមិនទៀងត្រង់ ដើម្បីប្រព្រឹត្ដទៀងត្រង់គឺត្រូវមានចិត្ដក្លាហាន។ ប៉ុន្ដែនៅទីបំផុត យើងអាចទទួលការគោរពពីអ្នកឯទៀត និងទៅជាមនុស្សដែលគួរឲ្យទុកចិត្ដ»។

អ្វីដែលបានត្រូវរៀបរាប់ខាងលើ បង្ហាញថាយើងពិតជាទទួលប្រយោជន៍ ពេលយើងប្រព្រឹត្ដទៀងត្រង់។ ប្រយោជន៍ទាំងនោះគឺ ចិត្ដមិនផ្ដន្ទាទោស សេចក្ដីសុខសាន្ដក្នុងចិត្ដ និងមោទនភាពចំពោះខ្លួន។ ដូច្នេះ យើងគួរប្រព្រឹត្ដទៀងត្រង់ មែនទេ?

^ វគ្គ 18 យេហូវ៉ាគឺជានាមរបស់ព្រះដែលមានក្នុងគម្ពីរ។

ទស្សនាវដ្ដីប៉មយាម