Aallussilluarlutit Kristusimik malinnippit?

“Oqaaqqissaarniarpassi suli annerusumik siuariartoqqullusi.” — 1 THESSALONIKAMIUT 4:1.

1, 2. (a) Inuppassuit Jiisusip nalaani inuusut sulianik alutornangaartunik sunik takunnittuuppat? (b) Sooq nalerput aamma pingaaruteqarpa?

EQQARSAATIGINIKUUIUK qanoq nuannertigisimassanersoq Jiisusip nunarsuarmiinnerata nalaani inuulluni? Immaqa Jiisusimit ajorunnaarsitaasinnaanerit taamaalillutillu erloqinartumik nappaateqarunnaarsitaasinnaanerit eqqarsaatigisimavat. Immaqa aamma eqqarsaatigisimavat taanna takullugu tusarnaarlugulu, taassumannga ilinniartinneqarluni tupinnartuliortorlu takullugu qanoq nuannertigisimassasoq. (Markusi 4:1, 2; Lukasi 5:3-9; 9:11) Jiisusip tamakkuninnga tamanik suliaqarnerani najuulluni qanoq nuannertigisimassagaluarpa! (Lukasi 19:37) Taamanimiilli kinguaariissoqatigeeqarsimanngilaq tamakkuninnga takkunnissimasunik. Jiisusillu nunarsuarmi “imminik pilliutiginermigut” naammassisaa iliuusereqqinneqarsinnaanngisaannassaaq. — Hebræerit 9:26; Johannesi 14:19.

² Nalerpulli aamma pingaaruteqangaarpoq. Sooq? Piffissami Biibilimi ‘naggatissap nalaatut’ (NV), imaluunniit ‘ullussatut kingullertut’, siulittuutigineqartumi inuugatta. (Danieli 12:1-4, 9; 2 Timotheusi 3:1) Piffissami tamatumani Saatani qilammit igitaavoq. Ungasinngitsukkut qilersugaassaaq “itinersuarmullu” igitaalluni. (Saqqummersitat 12:7-9, 12; 20:1-3) Aamma piffissami tamatumani ‘Naalagaaffimmik nutaarsiassamik nuannersumik’ (NV) silarsuarmi tamarmi oqaluussissutiginninneq paratiisissarlu pillugu allanut oqaluttuarneq — suliaq suliareqqinneqanngisaannartussaq  — immikkut ataqqinaatigaarput. — Matthæusi 24:14.

3. Jiisusip qilalianngitsiarluni ajoqersukkani qanoq peqquai, peqqussutaanullu suna ilaava?

³ Jiisusip qilalianngitsiarluni ajoqersukkani ima oqarfigai: “[Nalunaajaasigissavassi] Jerusalemimi Judæamilu tamarmi Samariamilu nunarsuullu isua tikillugu allaat.” (Apustilit Suliaat 1:8) Tamatumunnga ilaasussaavoq silarsuaq tamakkerlugu ilinniartitsineq. Suna siunertaralugu? Naggatissap nalliutinnginnerani amerlanerusunik Kristusimut ajoqersuganngortitsinissaq. (Matthæusi 28:19, 20) Kristusip peqqussutaa naalakkumagutsigu qanoq iliortariaqarpugut?

4. (a) Petrusip allagaasa aappaanni 3:11, 12-imi allassimasut sumut erseqqissaataappat? (b) Sunaveersaartariaqarpugut?

⁴ Apustilip Petrusip allagai ukua maluginiariakkit: “Inuttut qanoq ittuusariaqannginnerpisi iluartumik ileqqoqarnermut Guutimullu tunniusimanermut naapertuuttunik iliuuseqarlusi Jehovap ullussaata nalliuffissaa . . . utaqqitillugu eqqarsaatigiuartillugulu!” (2 Petrusi 3:11, 12, NV) Petrusip allagaani taakkunani erseqqissarneqarpoq ulluni kingullerni makkunani iliuutsit Guutimut tunniusimanitsinnut uppernarsaataasut inuunitsinni pingaarnerpaanerannik qulakkeeriuartarnissarput qanoq pingaaruteqartigisoq. Iliuutsinut taakkununnga ilaavoq nutaarsiassamik nuannersumik oqaluussissutiginninneq. Taamaattuminguna nuannaarutaangaartartoq silarsuaq tamakkerlugu qatanngutivut Kristusip oqaluusseqqusissutaa malillugu iliortut takullugit! Tamannali ilutigalugu nalunngilarput Saatanip silarsuaanit ulluinnarni tatineqartarneq namminerlu uinikkut ajortulioqqajaasarnerput kingornussarput pissutigalugit Guutimut kiffartornitsinni qasukkariartoqqunata mianersortariaqarluta. Taamaattumik misissoriartigu qanoq ililluta qulakkeersinnaagipput Kristusimik malinnittuarnerluta.

Pisussaaffitit Guutimeersut kajumillutit suliarikkit

5, 6. (a) Paulusip uppeqatini Jerusalemimiittut suna pillugu nersualaarpai, sumullu mianersoqquai? (b) Sooq Guutip uagutsinnut pisussaaffigititaanik sumiginnaassanngilagut?

⁵ Kristumiunut Jerusalemimiittunut allakkamini apustilip Paulusip uppeqatini allaat malersugaagaluarlutik aalajaallutillu pinertusaarnerat pillugu nersualaarpai. Ima allappoq: “Eqqaamaniarsigit ullut siulliit, taamani qaammarsagaalereerlusi mikinngitsumik saassunneqartarsimagassi naalliutsitaallusilu.” Jehovap taakkua aalajaallutik suliaat puiunngilai. (Hebræerit 6:10; 10:32-34) Paulusip nersualaarinera kristumiut hebræeriusut taakkua qiimmassaatigingaarsimassavaat. Allakkaminili tamatumanissaaq Paulusip uagut inuit iliuusereqqajaasinnaasarput, mianersunngikkutta Guutimut kiffartornermi uagutsinnik aallussilluannginnerulissutigisinnaasarput, mianersoqqussutigaa. Allappoq kristumiut Guutip peqqussutaanik maleruaanissamik ‘asiginnaassanngitsut’. — Hebræerit 12:25.

⁶ Guutip uagutsinnut pisussaaffigititaanik ‘asiginnaaqqajaasarnermut’ mianersoqqussut tamanna ullumikkuttaaq kristumiunut atuuppoq. Paasivarput aalajangiusimasariaqarlutigu kristumiutut pisussaaffitsinnik sumiginnaanngisaannarnissarput arlaannilluunniit Guutimut kiffartornitsinni aallussilluarpiarunnaassuteqannginnissarput. (Hebræerit 10:39) Guutimummi illernartumik kiffartorneq inuunermut toqumullu aalajangiisuuvoq. — 1 Timotheusi 4:16.

7, 8. (a) Suna Guutimut kiffartornermi aallussilluartuarnissamut iluaqutigisinnaavarput? (b) Aallussilluarpiarunnaarsimagutta Jehovamut Jiisusimullu tunngatillugu suna eqqaamasariaqarparput?

⁷ Suna Guutimut pisussaaffigisatsinnik sumiginnaannginnissamut iluaqutigisinnaavarput? Sumiginnaalernaveersaariaaseq pitsaasoq tassaavoq tunniulluinnarnitsinni neriorsuutitta pingaaruteqassusianik aalajangersimasumik eqqarsaatiginneqqissaartarneq. Jehovamut tunniulluinnaratta neriorsuivugut taassuma piumasaatut iliorneq inuunitsinni pingaarnerpaatikkumallugu, neriorsuullu tamanna eqqortikkusupparput. (Matthæusi 16:24) Taamaattumik ilaannikkut unikaallalluta imminut ima aperisariaqarpugut: ‘Guutimut tunniulluinnarnerma eqqortinnissaanik kuisikkama aalajangiusimannitsiginittut aalajangiusimannitsigaanga? Imaluunniit ukiut ingerlaneranni aallaqqaammut aallussilluartiginittut aallussilluartigiunnaarpunga?’

⁸ Unneqqarilluta imminut misissornitsinnit  paasigutsigu Jehovamut kiffartornermi suliniuteqannginnerulersimalluta pitsaassaaq pruffiitip Sefaniap oqaasiinik kajumissaataasunik ukuninnga eqqarsaatiginnikkutta: “Assatit nakkangatinnaviikkit! [Jehovap] Guutivit najorpaatit, pissarsuaq annaassiumaartoq. Qiimmattarluni tipaatsuutigaatit.” (Sefania 3:16, 17) Oqaatsit tuppallersaataasut taakku siullermik atuupput Israelikkunnut Babylonimi aallarussaaqqareerlutik Jerusalemimut utertunut. Aammali ullumikkut Guutip innuttaanut atuupput. Jehovap suliaa suliarigatsigu pingaaruteqarpoq eqqaamassallugu Jehovap taassumalu ernerata ikiortaraatigut pisussaaffitsinnillu Guutimeersunik suliarinninnissamut nakussatsittaraatigut. (Matthæusi 28:20; Filippimiut 4:13) Nuannaarluta pileralutalu Guutip uagutsinnut suliassiissutaanik suliarinninniarluta ilungersorutta taassuma pilluaqqujumaarpaatigut anersaakkullu siumukarnissatsinnut ikiorluta.

Aallussilluarlutit Guutip naalagaaffia ujaqqaaruk

9, 10. Jiisusip nerersuartitsinermik assersuusiaani suna pingaarnerpaava, sumillu ilinniarfigisinnaavarput?

⁹ Jiisusi ilaanni farisiiarit siuttuisa ilaata angerlarsimaffiani neritilluni nerersuartitsineq pillugu assersuusiorpoq. Assersuusiami tamatumani oqaluttuaraa inuit assigiinngitsut qilaap naalagaaffianut iseqataanissaminnut periarfissaat. Aamma erseqqissarpaa inuit ilaat qaaqqusissummut tamatumunnga tunngatillugu pisussaaffinnik suliarinnikkumanatik qanoq ‘utoqqatsiseqqusartut’. (Atuakkit Lukasi 14:16-21). Jiisusip assersuusiaani qaaqqusaasut nerersuaqataannginnissamut assigiinngitsunik utoqqatsissutissarsiorput. Ilaat oqarpoq narsaat pisiareqqammikkani takusartariaqarlugu. Alla ussinnik pisisimanerarpoq misilikkusutaminik. Allalu ima oqarpoq: “Kateqqammerama aggersinnaanngilanga.” Taakku tamarmik utoqqatsissutipalaajupput. Narsaatisisoq nersutaatisisorluunniit pisiaminik misissueqqaartarpoq, taamaattumillu pisiarereeraanni taakkua misissornissaat pisariaqavinneq ajorpoq. Aamma kateqqammerneq qaaqqusissummut taama pingaaruteqartigisumut qujaannarnissamut sooq pissutaassava? Tupinnanngilaq assersuusiami qaaqqusisoq kamalermat.

¹⁰ Guutip innuttaasa tamarmik Jiisusip assersuusiaa sumik ilinniarfigisinnaavaat? Tassa namminermut tunngasut, soorlu Jiisusip assersuusiaani eqqaaneqartut, uagutsinnut ima pingaaruteqartilertinngisaannassagivut Guutimut kiffartornitsinnit pingaarnerutilerlugit. Kristumiup namminermut tunngasut naleqquttumik inissisimatinngikkunigit oqaluussinermi aallussilluarunnaariartuinnassaaq. (Atuaruk Lukasi 8:14). Tamanna pinaveersaartissagutsigu Jiisusip oqaaqqissaarutaa una malillugu iliortariaqarpugut: “[Guutip] naalagaaffia iluarneralu ujaqqaarsigit [ujaqqaartuarsigik, NV].” (Matthæusi 6:33) Guutip kiffaasa — inuusuttut utoqqaallu — siunnersuummik tamatuminnga malinninnerat takullugu qiimmaallannassusia! Inuppassuit allaat inuunerminnik pisariillisaasimapput oqaluussinermut piffissaqarnerujumallutik. Taakkua namminneq misigisimavaat aallussilluarluni Guutip naalagaaffianik ujaaseqqaarneq piviusumik pilluarnarlunilu nalerisimaarnangaartoq.

11. Oqaluttuaq Biibilimiittoq suna aallussilluarluni uummatikkullu iluunngarluni Guutimut kiffartornissap pingaaruteqassusianut erseqqissaataava?

¹¹ Guutimut kiffartornermi aallussilluarnissap pingaaruteqassusia erseqqissarumallugu Israelimi kunngimut Joashimut pisimasut misissussavavut. Joashi Israelip Aramimit ajugaaffigineqaratarsinnaanera isumakuluutigalugu qialluni pruffiitimut Elisamukarpoq. Pruffiitip kunngi peqquaa igalaakkut Aramip tungaanut piseriaqqullugu, tamanna isumaqassammat Jehovap inuiaqatigiinnut taakkununnga ajugaatikkumaaraa. Kunngip tamanna qiimmaallaatigisimasariaqaraluarpaa. Taava Elisap Joashi qarsunik tiguseqquaa taakkuninngalu nunamut anaaleqqullugu. Joaship nuna pingasoriarluni anaavaa. Elisap tamanna kamaatigaa, kunngimmi tallimariarluni arfinileriarluniluunniit nuna anaasimasuuguniuk ‘Arami ajorsartilluinnassagaluarpaa’. Maanna Joashi Aramimut pingasoriaannarluni ajugaasussanngorpoq. Joaship kajumiinnera pissutigalugu sorsukkiartornera killilimmik iluatsippoq. (2 Kunngit 13:14-19) Oqaluttuaq tamanna sumik ilinniarfigisinnaavarput? Jehovap pilluaqqungaarumaaraatigut  aatsaat uummatikkut iluunngarluta aallussilluarlutalu taassuma uagutsinnut suliassiissutaa suliarigutsigu.

12. (a) Ajornartorsioraluarluta Guutimut kiffartornermi aallussilluartuarnissamut suna iluaqutigissavarput? (b) Oqaluttuariuk oqaluussinermik ulapputiginninnerit qanoq iluaqutigisimanerit.

¹² Ajornartorsiutit nalaattakkavut Guutimut kiffartornermi aallussilluarlutalu tunniusimanitsinnut misilinneqaataasinnaapput. Qatannguterpassuit aningaasatigut assut ajornartorsiorput. Allat nikallungapput perulunnartumik nappaateqaramik Jehovamut kiffartornermi iliuuserisinnaasaminnut killiliisumik. Aallussilluartuarumallutali Kristusimillu malinnittuarumalluta tamatta immikkut iliuuseqarsinnaavugut. Maluginiakkit siunnersuutit allassimaffiillu ungalusami ima qulequtalimmiittut: “Kristusimik malinnittuarnissamut suut iluaqutigissavigit?” Siunnersuutigineqartunik qanoq malinnissinnaanerlutit eqqarsaatigiuk. Siunnersuutigineqartunik malinnikkuit, tamanna iluaqutigingaassavat. Oqaluussinermik ulapputiginninneq inuunitsinnut pisuunnguallaataasarpoq ingerlalluarnerulernartarlunilu, qamuuna eqqissinarnerulluni nuannaarnarnerullunilu. (1 Korinthimiut 15:58) Uummatikkut iluunngarluta Guutimut kiffartornerput aamma ‘Jehovap ullussaata nalliuffissaanik eqqarsaatiginnittuarnissamut’ iluaqutigaarput. — 2 Petrusi 3:12, NV.

Pissutsinik atukkannik unneqqarillutit nalilersuigit

13. Qanoq ililluta paasisinnaavarput uummatikkut iluunngarluni Guutimut kiffartorneq uagutsinnut qanoq pingaaruteqartigisoq?

¹³ Pingaaruteqarporli eqqaamassallugu uummatikkut iluunngarluni Jehovamut kiffartornermi piffissamik oqaluussinermut qanoq atuitigineq apeqqutaanngitsoq. Pissutsit atukkavut assigiinngillat. Qaammatit tamaasa akunneq ataaseq imaluunniit akunnerit marluk atorlugit oqaluussisartoq Jehovamut nuannaarutaasarpoq, oqaluussisartup taassuma peqqissutsini pissutigalugu iliuuserisinnaasani tamaasa ilumut iliuuserippagit. (Naleqqiutikkit Markusi 12:41-44). Uummatikkut iluunngarluni Guutimut kiffartorneq uagutsinnut qanoq pingaaruteqarnersoq paasiumallugu piginnaanitsinnik pissutsinillu atukkatsinnik unneqqarilluta nalilersuisariaqarpugut. Kristusimut ajoqersugaagatta aamma taassumatut isiginnittaaseqarusuppugut. (Atuaruk Filippimiut 2:5, 1936). * Jiisusip inuunermini suna pingaarnerpaatippaa? Inuppassuit  Kapernaumimeersut ima oqarfigai: ‘Guutip naalagaaffianik iivangkiiliu tusarliussassaraara; tamanna pillugu aallartitaavunga.’ (Lukasi 4:43; Johannesi 18:37) Jiisusip oqaluussinermi aallussilluarnera eqqarsaatigalugu pissutsit illit atukkatit nalilersorsinnaavatit paasiniarlugu kiffartornermi iliuuseqarnerusinnaanerlutit. — 1 Korinthimiut 11:1.

14. Qanoq ililluta kiffartornerulersinnaavugut?

¹⁴ Pissutsinik atukkatsinnik nalilersueqqissaareerutta immaqa isummissaagut oqaluussinerunissamut periarfissaqarluta. (Matthæusi 9:37, 38) Inuusuttortavut tusindillit atuarunnaaqqammersut oqaluussinerulersimapput maannalu aallussilluarlutik nuannaarlutillu pioneriullutik. Nuannaarneq tamanna misigerusussinnaaviuk? Qatanngutit ilaasa pissutsit atukkatik eqqarsaatigisimavaat paasisimallugulu nunaminni sumiiffimmut allamut nunamulluunniit allamut oqaluussisartunik pisariaqartitsiffiunerusunut nuussinnaallutik. Allallu oqaatsinik ilinniarsimapput nunami allamiunut oqaluussisinnaaniassagamik. Kiffartornerulerneq unamminiarnarsinnaavoq, pilluaqqusaanangaartarporli, immaqalu aamma inuit allarpassuit ‘sallusuissummik eqqorluartumik ilisimasaqalernissaannut’ (NV) ikiorsinnaavavut. — 1 Timotheusi 2:3, 4; 2 Korinthimiut 9:6.

Maligassat Biibilimeersut

15, 16. Kikkut maligassiaat Kristusimut ajoqersukkatut aallussilluartuunissamut iluaqutigisinnaavavut?

¹⁵ Kristusip maleqqulluni kajumissaagaasa ilaat kingusinnerusukkut apustilinngortut qanoq periarpat? Matthæusi pillugu Biibilimi ima allassimavoq: “[Nikuilluni] tamaasa qimaannarlugit malippaa.” (Lukasi 5:27, 28) Petrusi Andreasilu aalisartut pillugit ima allassimasoqarpoq: ‘Erniinnaq qassutitik ilaginnaannarlugit malippaat.’ Tamatuma kingorna Jiisusip Jaaku Johannesilu ataatartik qassutinik passusseqatigigaat takuai. Taakkua Jiisusip kajumissaarutaa qanoq periarfigaat? ‘Erniinnaq umiatsiaq ataatartillu qimallugit malilerpaat.’ — Matthæusi 4:18-22.

¹⁶ Maligassaalluartoq alla tassaavoq Saulusi, apustilinngortoq Paulusi. Taanna Kristusip ajoqersugaanik ingasaassilluni malersuisuusimavoq, allannguivorli ‘sakkuulerlunilu qinersimasaq’ Kristusip aqqanik taaguuteqartussaq. “Erniinnarlu synagogini oqaluussissutigilerpaa Jiisusi Guutip ernerigaa.” (Apustilit Suliaat 9:3-22) Aamma misilinneqarnerit malersugaanerlu naammagalugit atortariaqaraluarlugit aallussilluartuarpoq. — 2 Korinthimiut 11:23-29; 12:15.

17. (a) Kristusimik malinninnissamut tunngatillugu illit suna kissaatigaajuk? (b) Uummatikkut iluunngarluta nukivullu tamakkerlugit Jehovap piumasaatut ilioraangatta qanoq pilluaqquneqartarpugut?

¹⁷ Qularnanngitsumik tamatta kissaatigaarput ajoqersukkat taakkua maligassiaannik pitsaasunik kajumilluta ilaarsinissarput nangaanatalu Kristusimik malinninnissarput. (Hebræerit 6:11, 12) Pilluaqqussutisiat suut aallussilluarluta Kristusimik malinninniartilluta nuannaarutigisarpavut? Guutip piumasaatut iliornerput nuannaarutigisarparput kiffartornermilu amerlanerusunik immikkut pisinnaatitaaffeqalernerup ilagiinnilu akisussaaffeqarnerulernerup nalerisimaarnartui misigisarpavut. (Tussiaat 40:9; atuaruk 1 Thessalonikamiut 4:1). Aap, Kristusi malinniarlugu ilungersorutta pilluaqqussutissarpassuit ataavartut, soorlu qamuuna eqqissisimaneq, nalerisimaangaarneq, Guutimit akuerineqarneq naassaanngitsumillu inuunissamut periarfissaqarneq, pilluaqqussutisiarisinnaavavut. — 1 Timotheusi 4:10. (w10 04/15-E)

[Quppernerup ataani ilanngussaq]

Eqqaamavigit?

• Suliassamik pingaarutilimmik sumik suliassinneqarpugut, tamannalu qanoq isigissavarput?

• Iliuusereqqajaasagarput suna mianersorfigissavarput, aamma sooq?

• Unneqqarilluta suut nalilersortariaqarpavut?

• Kristusimik malinnittuarnissamut suut iluaqutigissavavut?

[Atuaqqissaarnermi apeqqutit]

[Qupp. 27-mi ungalusaq/​assiliartaq]

Kristusimik malinnittuarnissamut suut iluaqutigissavigit?

▪ Guutip oqaasia ullut tamaasa atuartaruk atuakkatillu eqqarsaatigisarlugit. — Tussiaat 1:1-3; 1 Timotheusi 4:15.

▪ Guutip anersaavanit ikiorneqarlutillu siulersorneqarnissat qinnutigikulaguk. — Zakaria 4:6; Lukasi 11:9, 13.

▪ Kiffartornermik nuannarisaqartunik tamatuminngalu aallussilluartunik peqateqartarit. — Ussatit 13:20; Hebræerit 10:24, 25.

▪ Piffissap inuuffigisatta ilungersunarnera puioqinagu. — Efesosimiut 5:15, 16.

▪ ‘Utoqqatsiseqqunerup’ kingunerisartagai ajortut ilisimaarikkit. — Lukasi 9:59-62.

▪ Tunniulluinnarninni neriorsuutit uummatikkullu iluunngarluni Jehovamut kiffartornerup Kristusimillu malinninnerup pilluaqqussutissartarpassui eqqarsaatigikulakkit. — Tussiaat 116:12-14; 133:3; Ussatit 10:22.