Ilissi meeqqat inuusuttullu — Jehovamut kiffartorusussusersi nakussatsissiuk

“Pinngortitsisit eqqaamaniaruk inuusuttuunerpit ulluini.” — OQALUUSSISARTUP OQAASII 12:1.

1. Kajumissaarut suna Israelimi meeqqanuttaaq kajumissaarutigineqarpa?

UKIUT 3500-t missiliorlugit matuma siorna Jehovap pruffiitiata Mosesip Israelimi palasit utoqqaanertallu ima peqquai: “Inuit, tassa angutit arnallu meeqqallu . . . katersortittassavatit inatsisit tusaqqullugit ilikkarsinnaaqqullugu [Jehovap] Guutissi mianerinissaa oqaatsillu inatsimmi matumaniittut tamaasa maleruaqqissaaqqullugit.” (5 Mosesi 31:12) Maluginiaruk kikkut Jehovamik pallorfiginninnissamut katersortinneqartassasut: tassa angutit, arnat meeqqallu. Aap, allaat meeqqat inuusuttullu tusarnaartussanut, ilinniartussanut Jehovallu siunnersuutaanik malinnittussanut ilaapput.

2. Jehova ilagiinni kristumiuni siullerni meeqqanik inuusuttunillu qanoq isumassuiva?

² Aamma ukiuni hundredelinni siullerni Jehova meeqqanik inuusuttunillu isumassuivoq. Assersuutigalugu Jehovap Paulusi ilagiinnut allakkami ilaanni meeqqanut inuusuttunullu naatsorsuussanik siunnersuuteqarnissaanut isumassarsisippaa. (Atuakkit Efesosimiut 6:1; Kolossemiut 3:20). Inuusuttut siunnersuutinik taakkuninnga malinnittut Ataataminnik qilammiusumik asannittumik pingaartitsinerulerput pilluaqquneqarlutillu.

3. Ullumikkut inuusuttut qanoq ilillutik ersersittarpaat Jehovamut kiffartorusullutik?

³ Ullumikkuttaaq inuusuttut Jehovamik pallorfiginninnissamut ‘katersortinneqartarpat’? Aap! Taamaattumik Guutip innuttaanut tamanut nuannaarutaangaartarpoq nunarsuaq tamakkerlugu kristumiut inuusuttut taama amerlatigisut Paulusip kajumissaarutaanik matuminnga malinnikkaangata: “Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali taamaaliornissaq suli pisariaqarnerulermat nalunnginnassiuk ullussaq qanillisoq.” (Hebræerit 10:24, 25) Aammattaaq meerarpassuaqarpoq angajoqqaatik peqatigalugit Guutip naalagaaffia pillugu nutaarsiassamik nuannersumik oqaluussissutiginnittartunik. (Matthæusi 24:14) Aamma ukiut tamaasa inuusuttunik tusindilippassuarnik Jehovamik qamannga pisumik asanninnertik pissutigalugu kuisittoqartarpoq Kristusimut ajoqersugaanerup nuannersuinik misigisaqartartunik. — Matthæusi 16:24; Markusi 10:29, 30.

Maanna kajumissaarneqarnittut iliorit

4. Jehovamut kiffartornissamut kajumissaarut malillugu iliorumalluni qassinik ukioqartariaqarpa?

⁴ Oqaluussisartup oqaasiini 12:1-imi ima allassimasoqarpoq: “Pinngortitsisit eqqaamaniaruk inuusuttuunerpit ulluini.” Ilissi meeqqat inuusuttullu Jehovamik pallorfiginninnissamik taassumunngalu kiffartornissamik asannittumik kajumissaarneqarnissitut iliorsinnaajumallusi qassinik ukioqartariaqarpisi? Biibilimi qassinik ukioqarneq apeqqutaatinneqanngilaq. Taamaattumik tunuarsimaaqinak eqqarsarlutit Jehovamut tusarnaarlutillu kiffartornissamut inuusuppallaarlutit. Qassinilluunniit ukioqaraluaruit kajumissaarusuppatsigit kajumissaarneqarnittut iliupallaqqullutit.

5. Angajoqqaat qitornatik anersaakkut siumukarnissaannut qanoq ikiorsinnaavaat?

⁵ Ilissi ilarpassuasi anersaakkut siumukarnissamut  angajoqqaassinnit taakkualuunniit arlaannit ikiorneqarput. Biibilip nalaani Timotheusimut tunngatillugu aamma taamaappoq. Taanna mikisunnguullunili allakkat illernartut pillugit anaanaminit Eunikemit aanaminillu Loisimit ilinniartinneqarpoq. (2 Timotheusi 3:14, 15) Illit angajoqqaavit ilinniartissimassagunarpaatsit Biibilimik atuaqqissaaqatigisarlutit, qinoqatigisarlutit, ilagiit ataatsimiinnerinut ataatsimiigiaqatigisarlutit, ataatsimeersuariaqatigisarlutit angalaaqatigisarlutillu. Aap, Guutip aqqutigeqqusai pillugit ilinnik ilinniartitsineq akisussaaffiuvoq pingaaruteqangaartoq Jehovap angajoqqaannut tunniussimasaa. Illit taakkua ilinnik asanninnerat isumassuinerallu qujamasuutigisarpiuk? — Ussatit 23:22.

6. (a) Qanoq kiffartorneq Tussiaat 110:3 naapertorlugu Jehovamut nuannaarutaasarpa? (b) Maanna suna sammissavarput?

⁶ Jehovalli kissaatigaa peroriartortillusi Timotheusip pisimaneratut ilissi nammineq qulakkiissagissi “sunaasoq Guutip piumasaa: ajunngitsoq, iluarinartoq, naammalluinnartoq”. (Romamiut 12:2) Taamaaliorussi ilagiinni pisunut peqataassaasi, imaanngitsoq angajoqqaassi taamaalioqqummasi, namminerli Guutip piumasaatut iliorusukkassi. Kajumillusi Jehovamut kiffartoraangassi taassuma nuannaarutigisarpaa. (Tussiaat 110:3) Qanorli ilillusi Jehovamut naalakkusussusersi siunnersuutaanillu malinnikkusussusersi nakussatsissinnaavisigit? Taamaaliorsinnaavusi atuaqqissaarnikkut, qinusarnikkut ileqqorinnikkullu. Pingaarutillit pingasut taakku sammeriartigit.

Jehova ilisarisimallualeruk

7. Jiisusi Allakkat pillugit ilisimasaqarnermut tunngatillugu qanoq maligassaalluarpa, ilisimasaqalernissaminullu suna iluaqutigaa?

⁷ Siullermik, Jehovamut kiffartorusussutsit nakussatsissinnaavat ullut tamaasa Biibilimik atuartarnikkut. Taamaalillutit anersaakkut pisariaqartitatit matussusersinnaavatit Guutillu oqaasianeersumik naleqangaartumik ilisimassuseqalersinnaallutit. (Tussiaat 1:1-3; Matthæusi 5:3) Jiisusi tamatumunnga tunngatillugu maligassaalluarpoq. Ilaanni taanna aqqaneq-marlunnik ukioqartoq angajoqqaavisa naalaffimmi nanivaat “ajoqersuisut akornanniittoq taakku tusarnaarlugit aperisarlugillu”. (Lukasi 2:44-46) Tassa Jiisusi meeraallunili Allakkat pillugit ilinniarusussuseqangaarlunilu paasisimasaqarpoq. Qanoq ililluni taamaaligami? Qularnanngitsumik anaanaa, Maria, ataatarsiaalu, Josefi, tamanna anguniarlugu iliuuseqangaatsiarsimassapput. Taakku angajoqqaajupput Guutimik mianerinnittut naalungiaaneraniilli taassuminnga anersaakkut ilinniartitsilluartut. — Matthæusi 1:18-20; Lukasi 2:41, 51.

8. (a) Angajoqqaat meeqqatik Guutip oqaasianik nuannarinnilersinniarlugit qaqugukkut iliuuseqartalissappat? (b) Misigisaq meeqqanik mikisuuneranniilli ilinniartitsinerup qanoq pingaaruteqartigineranik ersersitsisoq oqaluttuariuk.

⁸ Ullumikkuttaaq angajoqqaat Guutimik mianerinnittut nalunngilaat qanoq pingaaruteqartigisoq meeqqamik mikisuuneranniilli Biibili pillugu ilisimasaqarusussuseqalersinnissaat. (5 Mosesi 6:6-9) Rubi, qatanngut arnaq kristumiu, ernini angajulleq, Joseph, ernertaareqqammerlugu taamaaliorpoq. Ullut tamaasa Biibilimik oqaluttuaatikka-mit atuffattarpaa. Suli mikisuusoq allassimaffinnik assigiinngitsunik eqqaamanninnissaanut ikiorpaa. Josephip taamatut ilinniartinneqarnini iluaqutigaa? Oqaluttaleqqammiinnarluni oqaluttuarpassuit Biibilimiittut nammineq oqaluttuarisinnaavai. Tallimanillu ukioqarluni Teokratiimik Ilinniarfimmi pisassaqaqqaarpoq.

9. Sooq Biibilimik atuartarnissaq atuakkannillu eqqarsaatiginneqqissaartarnissaq pingaaruteqarpat?

⁹ Anersaakkut siumukarumallusi, ilissi inuusuttut ullut tamaasa Biibilimik atuartarneq ileqqoriuartariaqarparsi — inuusuttuaraanissinniinnaanngitsoq, inuunersili tamaat. (Tussiaat 71:17) Biibilimik atuartarneq siumukarnissannut qanoq iluaqutigisinnaaviuk? Maluginiaruk Jiisusi Ataataminut qinunermini qanoq oqartoq: “[Inuuneq] naassaanngitsoq tassaavoq ilinnik, ilumut kisimi Guutiusumik . . . ilisimanninneq [ilisarisimannilerniartuarnerat, NV].” (Johannesi 17:3) Aap, Jehovamik ilisarisimanninnerujartuinnartillutit taassuma kinaassusilittut qanoq ittuunera paasinerujartuinnassavat, taassuminngalu  asanninnerujartuinnassaatit. (Hebræerit 11:27) Biibilimik atuarnitit tamaasa Jehova pillugu paasisaqarnerunissamut periarfissatut isigikkit. Imminut ima aperigit: ‘Oqaluttuaq una Jehova pillugu sumik paasisaqarfigaara? Tassani qanoq erserpa taassuma asallungalu isumassoraanga?’ Apeqqutit tamakkua eqqarsaatiginissaat piffissaqarfigisarukku Jehovap qanoq eqqarsartarlunilu misiginera ilinnillu sumik piumaffiginninnera pillugit paasisaqartassaatit. (Atuakkit Ussatit 2:1-5). Timotheusip inuusuttuugami pisimaneratut illit Biibilimit paasisavit ilumoortuunerat ‘upperilissavat’, piumassuseqarlutillu Jehovamut kiffartornissamut kajumississaatit. — 2 Timotheusi 3:14.

Qinuneq Jehovamik asanninninnut qanoq nakussatsissutaasinnaasoq

10, 11. Qinuneq Guutimut kiffartorusussutsinnut qanoq ililluni nakussatsissutaasinnaava?

¹⁰ Aappassaanik, uummatikkut iluunngarlutit Jehovamut kiffartorusunnerit illit qinnutitit aqqutigalugit nakussatsinneqarsinnaavoq. Tussiaat 65:3-mi ima allassimavoq: “[Illit] qinnutitsinnik tusartartutit. Inuit tamarmik ornissavaatsit.” Israelikkut tassaagallarmata Guutip innuttamisut angerfigeqatigisai nunami allamiuttaaq naalaffiliartartut qinunikkut taassumunnga qanillisinnaapput. (1 Kunngit 8:41, 42) Guuti kinaassusersiortuunngilaq. Peqqussutaanik maleruaasut taassumannga tusarneqartarnissartik qularutiginngilluinnarsinnaavaat. (Ussatit 15:8) Aamma ilissi inuusuttut qinnutisi tusartarumaarpai!

¹¹ Soorlu nalunngikkit, ikinngutigiilluarneq attaveqatigiilluarnermik tunngaveqartarpoq. Ilimanarpoq eqqarsaatinnik, misigissutsinnik isumakuluutinnillu qanimut ikinngutinnut oqaluuserinnissinnaanerit nuannaarutigigit. Qamannga pisumik qinugaangavit Pinngortitsisit attaveqarfigisarpat. (Filippimiut 4:6, 7) Jehova misigissutsitit ilorlerpaat pillugit oqaluttuuguk, soorlulusooq angajoqqaaq asannittoq ikinngutigilluakkalluunniit oqaluttuukkit. Aap, qinnutitit Jehovamullu misigissutsitit imminnut atassuteqarluinnarput. Paasissavat Jehova ikinngutiginerujartuinnartillugu qinnutitit isumaqarluarnerujartuinnassasut.

12. (a) Sooq isumaqarluartumik qinuneq qinuniaannarluni qinunerunngila? (b) Jehovap ilinnut qaninnera qanoq ilillutit qularutiginngilluinnalersinnaaviuk?

¹² Eqqaamajuk isumaqarluartumik qinuneq qinuniaannarluni qinunerunngitsoq. Qinnutit isumaqarluartut qanorpiaq misiginitsinnut tunngassuteqarput. Qinugaangavit Jehovamik qamannga pisumik asanninnerit tatiginnilluinnarnerillu aammattaaq ataqqinningaarnerit ersersittaruk. Jehovap qinnutinnik akisinera misigigaangakku qularutiginngilluinnalissavat ‘Jehova qanittoq torlorfigisiminut tamanut’. (Tussiaat 145:18) Aap, Jehova ilinnut qanilliumaarpoq, Diaavulullu akiornissaanut inuunermilu eqqortunik aalajangiisarnissamut nakussatsikkumaarpaatit. — Atuakkit Jaaku 4:7, 8.

13. (a) Qatanngutip arnap Jehovamut qanimut ikinngutaanini qanoq iluaqutigaa? (b) Illit Guutimut ikinngutaanerit tatisinernik akiuinissamut qanoq iluaqutigaajuk?

¹³ Maluginiaruk Cheriep Jehovamut qanittumik attaveqarnini qanoq nakussatsissutigineraa. Ilinniarnertuunngorniarnermini arlalinnik nersornaatisivoq ilinniartuugami pikkorissoq aamma timersullaqqikkami. Ilinniarnertuunngoreermat aningaasanik ikiorsiissutissanik  neqeroorfigineqarpoq qaffasinnerusumik ilinniagaqarniassammat. Cherie ima oqarpoq: “Neqeroorut pilerinarpoq, atuaqatinnillu sungiusaasunnillu tatineqaqaanga.” Paasivaali qaffasinnerusumik ilinniagaqareeruni piffissami annersaa ilinniarnerminut timersorlunilu unammiuaarnernut ilaajumalluni sungiusarnernut atortariaqartassallugu — Jehovamullu kiffartornissamut piffissaqarpiarnaviarani. Cherie qanoq piva? Ima oqarpoq: “Jehovamut qinoreerlunga aningaasanik ikiorsiissummut qujaannarpunga pionerinngorlungalu.” Maanna ukiuni tallimani pionerioreerpoq. Ima oqarpoq: “Peqqissimissuteqanngilanga. Jehovamut nuannaarutaasumik aalajangernera nuannaarutigeqaara. Guutip naalagaaffia salliutikkaanni suut allat tamarmik tunniunneqarumaarput.” — Matthæusi 6:33.

Ileqqorinnerit ‘uummatikkut minguitsuuninnut’ ersiutaavoq

14. Sumit erserpa ileqqorinneq Jehovap isaani pingaaruteqangaartoq?

¹⁴ Pingajussaanik, ersersissinnaavat Jehova uummammit kajumittumit kiffartorfigalugu ileqqorinnikkut. Jehovap inuusuttut ileqqussatigut minguitsuujuartut pilluaqqusarpai. (Atuakkit Tussiaat 24:3-5). Samuelip inuusuttuulluni palasiunerup Elip ernerisa ileqqorlunnerat ilaarumanngilaa. Taassuma ileqqorinnera malugineqanngitsuunngilaq. Biibilimi ima allassimavoq: “[Nukappiaraq] Samueli alliartornermini [Jehovamit] inunnillu nuannarisaanerujartuinnarpoq.” — 1 Samueli 2:26.

15. Ileqqorittuarnissamut pissutissat ilaannik eqqaasaqarit.

¹⁵ Silarsuaq inuuffigisarput — ilisarnaatit Paulusip taagugaasa ilaannaat eqqaassagaanni — inunnik namminissarsiortunik, anneruniartunik, angajoqqaaminnut naalanngitsunik, qujasuitsunik, mitalliisunik, qiningasunik, makitaniartunik inuulluarniutinillu Guutimit pingaarnerutitsisunik ulikkaarpoq. (2 Timotheusi 3:1-5) Avatangiisini guutiitsuni taama ittuni ileqqorittuarnissaq sapernarsinnaavoq. Eqqortuliornerilli eqqunngitsuliornaveersaarnerillu tamatigut ersersittarpat kia qilammi nunamilu Kisimi Oqartussaanera pillugu akerleriissummut tunngatillugu Jehova illersorlugu. (Jobi 2:3, 4) Aamma nuannaassaatit paasillugu Jehovap asannilluni kajumissaarutaa una malillugu iliorlutit: “Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.” (Ussatit 27:11) Aammattaaq Jehovamit akuerineqarninnik ilisimaarinninnerit taassumunnga kiffartorusussutsinnut nakussatsissutigissavat.

16. Qatanngut arnaq Jehovap uummataanik qanoq ililluni nuannaartitsiva?

¹⁶ Qatanngut arnaq Carolimik atilik atuartuutilluni najoqqutassianik Biibilimiittunik aalajangiusimannippoq, allallu taassuma ileqqorinnera maluginiartarpaat. Inuusuttuaraalluni atuaqatiminit mittatigineqartarpoq nalunngeqatiginnissutini Biibilimit ilinniartinneqarsimasoq pissutigalugu nalliuttunut ileqqulersuutinullu nunagisamik asanninnermut tunngassuteqartunut peqataajumasannginnami. Ilaannikkut upperisaminik allanut oqaluttuarinninnissamut periarfissaqartarpoq. Ukiorpassuit tamatuma kingorna Carol atuaqatigisimasaminit postkortimik nassitsippoq, taannalu ima allappoq: “Qutsaviginiarlutit attavigerusuttuaannarnikuuakkit. Ileqqorinnerit, maligassiuinerit nalliuttunullu tunngatillugu sapiillutit aalajangiusimanninnerit maluginiarpakka. Illit Jehovamut nalunaajaasut attaveqarfigisama siullersaraatsit.” Carolip maligassiuinera taassuma atuaqataata ima killinneqaatigitigaa kingusinnerusukkut Biibilimik atuaqqissaartalerluni. Postkortimi Carolimut allakkamini allappoq ukiut 40-t sinnerlugit nalunaajaasuusimalluni kuisimasoq! Carolip pisimaneratut ilissi  inuusuttut najoqqutassianik Biibilimiittunik aalajangiusimannittut ileqqorinnissigut inunnik eqqortuliorusuttunik Jehovamik ilisarisimannilersitseqataasinnaavusi.

Meeqqat inuusuttullu ‘Jehovamik unnersiutiginnittut’

17, 18. (a) Inuusuttut ilagiinniittut illit qanoq isigaagit? (b) Inuusuttut Guutimut kiffartortut sumik siunissaqarpat?

¹⁷ Inuusuttut tusindilippassuit ilumoortumik pallorfiginneqataanerat Jehovap silarsuaq tamakkerlugu peqatigiissortaanut ilaasunut tamatsinnut nuannaarutaangaarpoq! Inuusuttut taakkua Jehovamut kiffartorusussusertik nakussatsittarpaat ullut tamaasa Biibilimik atuartarnermikkut, qinusarnikkut Guutillu piumasaanut naapertuuttumik ileqqoqarnikkut. Inuusuttut taakkunatut ittut maligassiuilluarnermikkut angajoqqaaminnut, aap, Jehovap innuttaanut tamanut qiimmassaataangaarput. — Ussatit 23:24, 25.

¹⁸ Siunissami inuusuttut Jehovamut aalajaallutik kiffartortut silarsuassamut nutaamut Guutip neriorsuutigisaanut isertunut ilaassapput. (Saqqummersitat 7:9, 14) Taakku Jehovamut qujamasunnerujartortillutik tassani nuanningaartunik pilluaqqussutisiassarpassuaqarumaarput, aamma taanna naassaanngitsumik unnersiutigisinnaajumaarpaat. — Tussiaat 148:12, 13.

Uku nassuiarsinnaavigit?

• Ullumikkut inuusuttut qanoq ilillutik ilumoortumik pallorfiginneqataasinnaappat?

• Biibilimi atuakkavit eqqarsaatigeqqissaarnissaat sooq pingaaruteqarpa?

• Qinuneq Jehovamut qanillinissamut qanoq iluaqutigisinnaaviuk?

• Ileqqorinnikkut suna anguneqarsinnaava?

[Atuaqqissaarnermi apeqqutit]

[Qupp. 13-mi assiliartaq]

Ullut tamaasa Biibilimik atuartarneq ileqquliussimaviuk?