Jehovap uagut iluaqutissatsinnut pigaappaatigut

„[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.“ — 2 NALUNAARSUUTIT 16:9.

1. Sooq Jehovap misissoqqissaartarpaatigut?

JEHOVA Ataataavoq naammalluinnartoq. Ima ilisarisimalluartigaatigut allaat ’piumasavut pilersaarutivullu tamaasa’ nalunagit. (1 Nalunaarsuutit 28:9) Kukkunersiuiniarlunili misissuiffigeqqissaarneq ajorpaatigut. (Tussiaat 11:4; 130:3) Asannillunili imminut attaveqarnitsinnut ajoqutaasinnaasunut naassaanngitsumilluunniit inuunissamut periarfissaqarunnaassutigisinnaasatsinnut sunulluunniit illersorusuppaatigut. — Tussiaat 25:8-10, 12, 13.

2. Kikkut iluaqutissaannut Jehovap pissaanini atortarpaa?

² Jehova asseqanngitsumik pissaaneqarpoq suullu tamaasa takusinnaallugit. Taamaattumik ilumoorfiginnitsimi qaqugukkulluunniit torlorfigigaanganni ikiorsinnaavai annikilliornerannilu annertoqqusersorsinnaallugit. 2 Nalunaarsuutit 16:9-mi ima allassimavoq: „[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.“ Maluginiariaruk  Jehovap pissaanini uummatimikkut iluunngarlutik imminut kiffartortut, minguitsumik piviusumillu pissutiginiagalimmik uummatillit, iluaqutissaannut atortaraa. Peqquserluttut pisuusaartullu taamatut soqutiginninnermik ersersitsivigineq ajorpai. — Josva 7:1, 20, 21, 25; Ussatit 1:23-33.

Guuti saqeqatigisariaqarparput

3, 4. ’Guutimik saqeqateqarneq’ qanoq paasisariaqarpa, Biibilimilu oqaluttuarineqartut tamatuminnga erseqqissaasut kikkuuppat?

³ Inuppassuarnit paasiuminaatsinneqartarpoq qilammik nunarsuarmillu Pinngortitsisup inunnik assersuutaasumik imminik saqeqateqarsinnaatitsinera. Tamatuminngarpiarliuna iliuuseqarnissarput Jehovap kissaatigigaa. Biibilip nalaani Enokip Noallu ’Guuti saqeqatigaat’. (1 Mosesi 5:24; 6:9, NV) Mosesi „takussaanngitsumik isigisaqarlunilusooq pinertusaarpoq“. (Hebræerit 11:27) Kunngi Daavi Ataatami qilammiusup saniani maniguulluni saqivoq. Ima allappoq: „[Jehova] talerpimma tungaaniippoq, patajalernavianngilangalu.“ — Tussiaat 16:8.

⁴ Soorunami Jehova ilumoortumik tasiorsinnaanagulu saqeqatigisinnaanngilarput. Assersuutaasumilli taamaaliorsinnaavugut. Qanoq? Tussiaasiortoq Asafi ima allappoq: „Maanna ilinniittuaannarpunga, talerpiga tigummivat. Ilitsersuutikkut ingerlatissavarma.“ (Tussiaat 73:23, 24) Tassa Jehova saqeqatigisarparput siunnersuutai, pingaartumik taassuma oqaasia allanneqarsimasoq „inussiarlu aalajaallunilu silatooq“ aqqutigalugit pisartakkavut, maleqqissaaraangatsigik. — Matthæusi 24:45, NV; 2 Timotheusi 3:16.

5. Jehovap ilumoorfiginnitsini ataatap asannittup pisarneratut qanoq isigisarpai, taannalu qanoq misigissuseqarfigisariaqarparput?

⁵ Jehovamik saqeqateqartut taassumunnga erlinnartuummata, taassuma ataatap asannittup pisarneratut isigiuartarpai, isumassorlugit, illersorlugit ilinniartillugillu. Guuti ima oqarpoq: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“ (Tussiaat 32:8) Imminut ima aperigit: ’Jehovamik tasiuisutullusooq imminut isigaanga, ilisimassusia tusarnaartarlugu nalunagulu taassuma asannilluni isigigaanga? Eqqarsaatikka, oqaatsikka iliuutsikkalu najuunneranik ilisimanninninnit sunnerneqartarpat? Kukkugaangama Jehova qanoq isigisarpara? Sukannersutut misigittaatsutullu isigisarpara imaluunniit Ataatatut asannillunilu nallittuisutut peqqissimisunik imminut qanittumik attaveqaleqqinnissaannut ikiuerusuttutut isigaara?’ — Tussiaat 51:19.

6. Jehova angajoqqaanut nunamiusunut sanilliulluni sumut periarfissaqarnerua?

⁶ Ilaannikkut Jehovap ajortumik iliunnginnitsinni immaqa ikiortarpaatigut. Assersuutigalugu imaassinnaavoq uummatitta, tatigisassaanngitsuusup, naleqqutinngitsunik piumasaqalernera malugigaa. (Jeremia 17:9) Pissutsini taama ittuni Jehova angajoqqaanit nunamiusunit sukkanerungaartumik iliuuseqarsinnaavoq, ilorpiatsinniittummi, eqqarsaativut ilorlerpaat, ’misissuiffigisinnaavai’. (Tussiaat 11:4; 139:4; Jeremia 17:10) Pruffiitip Jeremiap allatsigalugulu ikinngutigilluagaata, Barukip, inuunerani pisuni Guuti qanoq iliuuseqarnersoq misissoriartigu.

Barukimut Ataataasoq ilumoortoq

7, 8. (a) Baruki kinaava, sunillu ajoqutaasunik kissaateqalersimasinnaava? (b) Jehovap qanoq ililluni Baruki ataatap isumassuisup pisarneratut isumassorpaa?

⁷ Barukip allattuuneq inuuniutigaa Jeremialu aalajaalluni kiffartoqatigalugu; marluullutik suliassaqarput, paasinarsivorlu suliassaq imaannaanngitsuusoq — tassa Jehovap Judamut eqqartuussutai oqaluussissutigisussaavaat. (Jeremia 1:18, 19) Ilaanni Baruki, immaqa ilaqutariinnit nuimasuneersuusoq, imminut ’angisuunik’ ujarliutilerpoq. Immaqa ataqqineqarumatulerpoq pigissaarusulerluniluunniit. Sunaluunniilli pissutaasimagaluarpat, Jehovap malugaa eqqarsaataaseq ulorianartoq tamanna Barukip uummataani ineriartulersoq. Jehova ingerlaannaq akuliuppoq Jeremia aqqutigalugu Barukimut ima oqarnermigut: „Oqarputit: ’Eqqanaq uanga, [Jehovap] anniaatikka ilammagit naalliungaarnermik. Anersaaruluttarninnit qasoqaanga qasuerfissaqarnangalu!’“ Taava Guuti ima oqarpoq: „Illit ujarpat angisooq. Taamaalioqinak!“ — Jeremia 45:1-5.

⁸ Jehova Barukimut aalajangersimarpalukkaluarluni kamanngilaq, ataatatulli ilumoorluni isumassuivoq. Erseqqippoq Guutip takusinnaagaa Barukip kissaatai ajortumik peqqusersuumillu uummateqarneranut ersiutaanngitsut. Jehovap aamma nalunngilaa Jerusalemip Judallu ullui kingulliit  atuuttut, kissaatiginngilaalu piffissami erloqinartorsiorfiusumi tamatumani Baruki naakkiutissasoq. Taamaattumik Guutip kiffani piviusorsiortikkumallugu eqqaasippaa ’inuit tamaasa perlummik aallartitsiviginiarlugit’, nangillunilu oqarluni Baruki silatusaaruni inuuinnassasoq. (Jeremia 45:5) Guuti ima oqarporlusooq: ’Baruki-aa, piviusorsiorniarit. Eqqaamajuk Juda Jerusalemilu ilumuunngitsut qanittukkut qanoq pineqartussaasut. Aalajaattuarit inuuinnarlutillu! Illersorumaarpakkit.’ Jehovap Barukip uummataa angusimassavaa, taannami ajunngitsumik periarpoq ukiullu 17-it tamatuma kingorna Jerusalemip piuneerunneqarnerani aniguilluni.

9. Apeqqutit immikkoortumi matumaniittut qanoq akissavigit?

⁹ Barukimik oqaluttuaq eqqarsaatigitillugu, apeqqutit allassimaffiillu ukua eqqarsaatigisinnaavavut: Jehovap Barukimik pinninnera Jehova taassumalu kiffaminut misigissusii pillugit sumik ilinniarfigaarput? (Atuaruk Hebræerit 12:9.) * Ullut erloqinartorsiorfiusut eqqarsaatigalugit, Guutip Barukimut siunnersuutaa Barukillu tamatumunnga periarnera sumik ilinniarfigisinnaavavut? (Atuaruk Lukasi 21:34-36.) Utoqqaanertat kristumiut Jeremia ilaarlugu Jehovap kiffaminik isumassuinera qanoq ilillutik ersersissinnaavaat? — Atuaruk Galatiamiut 6:1.

Ataatap asanninnera Ernermit ersersinneqarpoq

10. Jiisusip qanoq ililluni ilagiinnut kristumiunut niaquusutut suliassani suliarisinnaalerpaa?

¹⁰ Kristumiut siulliit sioqqullugit Jehovap innuttaminut asanninnera pruffiitit kiffaalu aalajaatsut allat aqqutigalugit ersersinneqartarpoq. Ullutsinni pingaarnerpaamik ilagiinnut kristumiunut niaquusoq, Jiisusi Kristusi, aqqutigalugu ersersinneqartarpoq. (Efesosimiut 1:22, 23) Tamanna pillugu Jiisusi Saqqummersitani savaaqqatut ’arfineq-marlunnik isilittut’ oqaluttuarineqarpoq. Isit taakkua tassaapput „Guutip anersaavi arfineq-marluk nunarsuarmut tamarmut aallartitat“. (Saqqummersitat 5:6) Jiisusi Guutip anersaavanik illernartumik tamakkiisumik sakkulerneqarami naammalluinnartumik naliliisinnaassuseqarpoq. Taassumattaaq qamuuna qanorpiaq ittuunersugut takusinnaavaa, aamma pisut tamaviisa arajutsineq ajorpai.

11. Jiisusip Kristusip suna suliassaraa, Ataatamilu uatsinnut isiginnittaasia qanoq ersersittarpaa?

¹¹ Jiisusili politiiunngilaq qilammit uagutsinnik qimerluuisartoq, soorlu Jehova taamaattuunngitsoq. Jiisusip asannilluni misissoqqissaartarpaatigut. Taaguutaasa ilaat, „Naassaanngitsumik Ataataq“, imminik upperinnittunik tamanik naassaanngitsumik inuusinnaalersitsinissamut tunngatillugu  suliassaanik uagutsinnut eqqaasitsissutaavoq. (Esaja 9:5) Aammattaaq ilagiinnut kristumiunut niaquugami kristumiut kajumillutillu anersaakkut inersimalluartut, ingammik utoqqaanertat, pisariaqartitsisunik tuppallersaanissaannut siunnersuinissaannullu killissinnaavai. — 1 Thessalonikamiut 5:14; 2 Timotheusi 4:1, 2.

12. (a) Ilagiinnut arfineq-marlunnut Asiaaqqamiittunut allakkat Jiisusi pillugu sumik ersersitsippat? (b) Utoqqaanertat Kristusip Guutip savaataanut isiginnittaasianik qanoq ersersitsisarpat?

¹² Kristusip savaatinik soqutiginningaarnera utoqqaanertanut Asiaaqqami ilagiinni arfineq-marlunniittunut allakkanit erserpoq. (Saqqummersitat 2:1–3:22) Allakkani taakkunani Jiisusip ilagiinni tamarluinnarni susoqarneranik eqqumaffiginninnini aamma ajoqersukkaminik isumassuingaarnini ersersippaa. Ullumikkut aamma taamaappoq — suli annerungaartumik — Saqqummersitanimi takorruukkat ’Naalakkap ulluata’ nalaani eqquupput. * (Saqqummersitat 1:10) Kristusip asanninnera amerlanertigut utoqqaanertat, ilagiinni anersaakkut ittumik paarsisutut kiffartortut, aqqutigalugit ersertarpoq. Taassuma ’inuit tunissutaasut’ taakkua pisariaqartitsisoqarpat tuppallersaanissamut, qiimmassaanissamut siunnersuinissamullu killissinnaavai. (Efesosimiut 4:8; Apustilit Suliaat 20:28; atuaruk Esaja 32:1, 2.) Taakkua ilungersornerat Kristusip ilinnik inuttut soqutiginninneranut ersiutitut isigaajuk?

Piffissaq eqqorlugu ikiorneqarneq

13-15. Guutip qinnutivut qanoq akiniarlugit aalajangersinnaava? Assersuuteqarit.

¹³ Guutimut ikioqqullutit qamannga pisumik qinunikuuit kristumiumillu anersaakkut inersimalluartumit qiimmassaataasumik pulaarneqarnikkut akineqarlutit? (Jaaku 5:14-16) Immaqaluunniit kristumiut ataatsimiinneranni oqalugiaat imaluunniit paasissutissat atuagaatitta atuagassiaatittalu ilaanniittut aqqutigalugit ikiorneqarputit. Jehova periaatsit taakkua atorlugit qinnutinik akisigajuppoq. Assersuutigalugu qatanngutip arnap sapaatip-akunnerini arlalinni ingasattumik naapertuilluanngitsumik pineqarsimasup utoqqaanertaq oqalugiareermat ornippaa. Ajornartorsiutini naammagittaalliutiginagu aalajangersimasunik Biibilimut tunngasunik oqalugiaammi saqqummiunneqartunik qujamasuutiginningaarnini ersersippaa. Pissutsinut atugaanut naleqquteqqissaarput, aamma assut tuppallersaatigai. Ataatsimiinnermut tamatumunnga najuussimanini nuannaarutigeqaa!

¹⁴ Qinunikkut ikiorneqartarneq parnaarussat parnaarussaaqqanerminni sallusuissutinik Biibilimeersunik ilinniartut oqaluussisartunngortullu pingasut pillugit oqaluttuami ersersinneqarpoq. Nakuusertoqarsimanera pissutigalugu parnaarussat tamarmik arlalinnik immikkut pisinnaatitaaffiiarneqarput. Tamanna pissutigalugu pikitsitsisoqalerpoq. Parnaarussat aalajangerput aqaguani ullaakkorsioreerunik puuguttat atukkatik utertikkumaniarnagit. Maanna oqaluussisartut kuisimanngitsut pingasut taakkua nalornilerput. Pikitsitseqataagunik Jehovap peqqussutaa Romamiut 13:1-imiittoq unioqqutissavaat. Pikitsitseqataanngikkunillu tigusanit kamattunit pillaatitut akiniarneqarsinnaapput.

¹⁵ Angutit pingasut taakkua oqaloqatigiissinnaanngillat, tamarmilli Jehova qinnuigaat ilisimassusermik tuneqqullutik. Aqaguani pingasuullutik paasivaat aaqqiissutissaq aalajangersimasoq ataaseq tamarmik aalajangiussimallugu — tassa ullaakkorsiornissamut qujaannarniarlutik. Taamaattumik nakkutilliisoq puuguttat katersorniarlugit kingusinnerusukkut takkummat angutit pingasut taakkua tunniussassaqanngillat. ’Qinnutinik tusartartup’ imminnut qaninnera nuannaarutigeqaat! — Tussiaat 65:3.

 Siunissamut isumalluarit

16. Jehovap savanik assersuutaasunik isumassuinera oqaluussinermi qanoq erserpa?

¹⁶ Silarsuaq tamakkerlugu oqaluussineq Jehovap eqqortuliorusuttunik sumiluunniit najugaqaraluartunik isumassuineranut uppernarsaataavoq suli alla. (1 Mosesi 18:25) Jehovap, amerlanertigut inngilit siulersuinerat atorlugu, kiffani savanut assersuutaasunut siulersorsinnaavai — taakkua sumiiffinni nutaarsiassaq nuannersoq pillugu suli oqaluussiffiunngikkaluartuniluunniit najugaqarpata. (Saqqummersitat 14:6, 7) Assersuutigalugu Guutip ukiuni hundredelinni siullerni inngili atorlugu iivangkiiliumik oqaluussissutiginnittartoq Filipi atorfilimmut Etiopiamiumut siulersorpaa Allakkat taassumunnga nassuiarniassammagit. Tamanna qanoq kinguneqarpa? Angutip nutaarsiassaq nuannersoq ilassivaa Jiisusimullu ajoqersuganngorluni kuisimasoq. * — Johannesi 10:14; Apustilit Suliaat 8:26-39.

17. Sooq siunissamut ingasattumik isumakuluttariaqanngilagut?

¹⁷ Pissutsit aaqqissuussaanerata maanna atuuttup naggatissaa qanilliartortillugu ’nallisitsinerit’ siulittuutigineqartut ingerlaannassapput. (Matthæusi 24:8) Immaqa nerisassanik pisariaqartitsisut amerligaluttuinnarnerat, silap pissusiisa ingasatsinnerat aningaasaqarnikkulluunniit allanngorarnerit pissutigalugit nerisassat akii qaffariartupiluussapput. Immaqa suliffissarsinissaq ajornakusoornerulissaaq immaqalu sulisut sivisunerusumik sulinissamut tatineqarnerulissallutik. Qanorluunniilli pisoqassagaluarpat soqutigisanik anersaakkut ittunik pingaarnerpaatitsisut ’isiminnillu tappissuutitsisut’ (NV) ingasattumik isumakuluttariaqanngillat. Nalunngilaat Guutip asagaatik isumassorumaaraatillu. (Matthæusi 6:22-34) Assersuutigalugu eqqarsaatigeriaruk ukiumi 607-imi Kr.in.si. Jerusalemi piuneerunneqarmat Jehovap Jeremia qanoq isumassorneraa. *

18. Jerusalemip unguneqarnerata nalaani Jehovap Jeremiamik asanninnini qanoq ersersippaa?

¹⁸ Babylonimiut Jerusalemimik ungusinerata naggataatungaani Jeremia illussaarsuup silarliani paarsisut inaanni parnaarussaavoq. Qanoq ililluni nerisassanik pissarsisassava? Kiffaanngissuseqartuuguni nerisassarsiorsinnaagaluarpoq. Maannali inuit eqqaminiittut ikiortiginagit susinnaanngilluinnarpoq, taakkualu amerlanersaasa uumigaat! Jeremialli inuit isumalluutiginagit Guuti, isumassuiumaarnerminik neriorsuisimasoq, isumalluutigaa. Jehovap neriorsuutini eqqortippaa? Aap, ilaana! Taassuma isumagaa Jeremiap ’ullut tamaasa timiusamik tunineqartarnissaa timiusat illoqarfimmi nungunnerata tungaanut’. (Jeremia 37:21) Jeremia aamma Baruki, Ebed-Meleki allallu piffissami kaannersuaqarfiullunilu nappaalaffiullunilu toqorarfiusumi tamatumani aniguipput. — Jeremia 38:2; 39:15-18.

19. Siunissaq eqqarsaatigalugu suna aalajangiusimassavarput?

¹⁹ Aap, „[Jehovap] isaasa sammivigaat iluartut, ikioqqullutik nillianerat siutaasa tusartarpaat“. (1 Petrusi 3:12) Ataatavit qilammiusup ilinnik pigaassisarnera nuannaarutigaajuk? Illit iluaqutissannut ilinnik isiginnittarneranik ilisimanninnerit toqqissisimanaraajuk? Taamaappat Guutimik saqeqateqartuarnissat aalajangiusimajuk — siunissaq qanorluunniit issagaluarpat. Qularutiginngilluinnarsinnaavarput Jehovap ilumoorfiginnitsini tamaasa ataatap asannittup pisarneratut soqutiginnilluni isigiuarumaarai. — Tussiaat 32:8; atuaruk Esaja 41:13.

[Quppernerup ataani ilanngussat]

Uku nassuiarsinnaavigit?

• ’Guutimik saqeqateqarnerput’ qanoq ililluta ersersissinnaavarput?

• Jehovap asanninnini Barukimut qanoq ersersippaa?

• Jiisusip ilagiinnut kristumiunut niaquusutut Ataatami pissusii qanoq ersersippai?

• Ulluni ernumanartorsiorfiusuni Guutimik tatiginninnerput qanoq ililluta ersersissinnaavarput?

[Atuaqqissaarnermi apeqqutit]

[Qupp. 17-mi assiliartat]

Ullumikkut utoqqaanertat kristumiut Jehovap kiffaminik isumassuinera ersersittarpaat, soorlu Jeremiap taassuma Barukimik isumassuinera ersersikkaa

[Qupp. 18-mi assiliartaq]

Jehova piffissaq eqqorlugu uagutsinnik qanoq ikiuisinnaava?