Apustilit Suliaat 16:1-40
16 Taava Derbemut apuukkami Lystramut ingerlaqqippoq. Tassaniipporlu ilinniartitaq Timuutiusimik atilik. Taanna juutimik uppertumik anaanaqarpoq grækerimillu ataataqarluni,
2 aamma Lystrami Ikonionnimilu qatanngutinit ajunngitsumik tusaamaneqarpoq.
3 Juutit nunani immikkoortuni taakkunani najugaqartut tamarmik Timuutiusi grækerimik ataataqartoq nalunngimmassuk Paulusillu angalaqatigerusukkamiuk kipineqartippaa.
4 Illoqarfinnut pigaangamik Jerusalemmimi apustilit utoqqaanertallu aalajangersagaat maleruarniassammatigit qatanngutinut tunniuttarpaat.
5 Ilagiillu ullut tamaasa uppernikkut nakussatsittarlutillu amerliartorput.
6 Anersaap illernartup Guutip oqaasianik Aasiami* oqaluusseqqunngimmatik Frygia Galaatialu aqqusaarlugit angalapput.
7 Aamma Mysiamut ateramik Bityniamukarniaraluarput, Jiisusilli anersaavata* nangartarpai.
8 Taava Mysia uiarlugu* Troassimut aterput.
9 Unnuakkullu Paulusip takorluuisitaanermini angutip Makedoniamiup ima kimigiiserfigigaani takuaa: “Makedoniamut ikaarlutit ikioriartortigut.”
10 Takorluuisitaanerata kinguninngua isummeratta Guutip Makedoniamiunut nutaarsiassanik nuannersunik oqaluusseqqugaatigut Makedoniamukarnialerpugut.
11 Taava Troassimiit avalakkatta ingerlaannaq Samutraakimukarpugut aqaguanilu Niaapulissimut ingerlaqqilluta.
12 Tassanngalu Filippimut, Makedoniap immikkoortuisa ilaani illoqarfiit pingaarnersaannut nunasiaasumut, ingerlaqqippugut. Ullualunnilu illoqarfimmi tassaniippugut.
13 Ullormi qasuersaarfimmi illoqarfimmiit anigatta kuup eqqaanukarpugut qinusarfeqarsorigatsigu. Tassani issialluta arnat katersuussimasut oqaloqatigilerpagut.
14 Arnarlu Lydiamik atilik Tyatiiramiu annoraaminernik tunguusanik tuniniaasartoq Guutimillu mianerinnittoq tusarnaarpoq. Paulusillu oqaasiinik upperinneqqullugu Jehovap uummataa ammarpaa.
15 Lydiap illuminiittut imermut morsutsitaaqatigereerlugit kimigiiserfigaatigut: “Jehovamut aalajaassorigussinga uanga illunni inisimasuugitsi.” Ingerlaqatigeqqullunilu kimigiiserfigaatigut.
16 Taamaalluta qinusarfimmukartilluta kiffaq arnaq inuusuttoq siulittuisartumik anersaapilulik naapipparput. Taassuma siulittuisarnermigut naalakkani aningaasarsiortingaartarpai.
17 Ima suaartarluni malittuarpaatigut: “Angutit ukua Guutip Qutsinnerpaap inussiaataasa aniguisitaanermut aqqummik oqaluussiffigaasi.”
18 Ullorpassuarni taamaaliorpoq. Naggataatigut Paulusip qatsukkamiuk anersaaq saariarlugu oqarfigaa: “Jiisusip Kristusip aqqani peqquakkit arnamit aneqqullutit.” Ingerlaannarlu anivoq.
19 Naalagaasa paasigamikku aningaasarsiorfigisinnaajunnaarlugu Paulusi Siilarsilu tigusareriarlugit uniakalaaginnarlugit silami tuniniaasarfimmi siulersortaasunut pisippaat.
20 Atorfilittanut* sassartikkamikkit oqarput: “Uku illoqarfimmi assut eqqissiviilliortitsipput. Juutiupput,
21 aamma ileqqunik uagutsinnut Romamiunut inerteqqutaasunik ilinniartitsipput.”
22 Inuppassuillu kamallutik akerartulerpaat, atisaallu nutsullugit piiarneqareermata anaalerneqarnissaat atorfilittat peqqussutigaat.
23 Arlaleriarlugit anaalereerlugit soqqusaaqalutik parnaarussaatippaat paarsisorlu peqqullugu isumannaatsumik paareqqullugit.
24 Paarsisup taama peqquneqarami soqqusaaqaluni ineeqqamut ilorlerpaamut piseriarlugit isigaat qisummut kiggitsivimmut aalajangerpai.
25 Unnuap-qeqqata missaani Paulusi Siilarsilu qinupput erinarsorlutillu Guuti unnersiutigalugu, parnaarussallu tusarnaarput.
26 Tassanngaannaq nuna sajorujussualermat parnaarussiviup toqqavia sajulerpoq. Aamma matut tamarmik ammariataarput kikkullu tamarmik kalunnernik qilersorsimajunnaarlutik.
27 Paarsisup iterluni parnaarussiviup matui ammasut takugamigit parnaarussat qimaasimasoralugit imminut toqunniarluni panani amuaa.
28 Paulusili nipituumik suaarpoq: “Imminut ajortumeeqinak, tamattami maaniippugut!”
29 Nanerussanik tuneqqoriarluni ineeqqamut isipallakkami sajulluni aqullaaginnarluni Paulusi Siilarsilu seeqqummerfigai.
30 Anniseriarlugit aperai: “Annaanneqarumallunga qanoq iliussaanga?”
31 Akipput: “Naalagaq Jiisusi upperigukku illit illunniittullu annaanneqassaasi.”
32 Taava taanna illuaniittullu tamaasa Jehovap oqaasianik oqaluussiffigaat.
33 Suli unnuaasoq ingerlaqatigai ikiilu salillugit. Taava taanna illuaniittullu tamarmik ingerlaannaq imermut morsutsinneqarput.
34 Illuminut iserteriarlugit nerisassaannik sassaalliuteqarfigai, aamma illuminiittullu tamarmiullutik Guutimut uppertunngornertik nuannaarutigingaarpaat.
35 Qaammarmat atorfilittat nakkutilliisuutitatik ima oqariartortippaat: “Angutit taakku iperagaatikkit.”
36 Paarsisup Paulusi nalunaarfigaa: “Atorfilittat iperagaateqqullusi oqariartortitsimmata anisinnaavusi. Angalalluarisilu.”
37 Paulusilli oqarfigai: “Romamiuugaluartugut eqqartuuteqqaarnata kikkut tamaasa isigitillugit iperartorteriarluta soqqusaaqalutik parnaarussaatippaatigut. Maanna isertorlutik anisinnialerpaatigut? Qanoq-aamma! Namminneq aggerniarlik anisillutalu.”
38 Atorfilittat nakkutilliisuutitanit taama nalunaarfigineqaramik angutit taakku Romamiuusut paasillugu annilaarput.
39 Taamaattumik orneriarlugit utoqqatserfigaat annisereeramikkillu illoqarfimmiit aallaqqullugit.
40 Parnaarussivimmiilli anigamik Lydiap angerlarsimaffianukarput qatanngutillu qiimmassarlugit. Taamaalioreeramik aallaqqipput.
Ilanngussat
^ Nassuiaatit takukkit.
^ Tassa anersaaq illernartoq Jiisusip Guutimit pisaa.
^ Imalt.: “aqqusaarlugu”.
^ Grækerisut oqaatsimi Romamiut nunasiaataanni Filippimi atorfilittat pissaaneqarnerpaat pineqarput.
