Apustilit Suliaannit pingaarnersat
Jehovap oqaasia uumavoq
Apustilit Suliaannit pingaarnersat
ATUAKKAMI Apustilit Suliaanni Biibilimiittumi ilagiit kristumiut tunngavilerneqarnerat tamatumalu kingorna taakkua amerliartornerat oqaluttuarineqarpoq. Atuagaq nakorsap Lukasip allagaraa, tassanilu oqaluttuarineqarpoq kristumiut ukiuni 28-ni — 33-miit 61-imut — sulinerat pissanganartoq.
Apustilit Suliaasa aallaqqaataata tungaa tassaaneruvoq apustilip Petrusip kiffartornera pillugu oqaluttuaq, naggataatalu tungaa tassaanerulluni apustilip Paulusip sulinera pillugu oqaluttuaq. Ilaannikkut kinaassusersiutit siulliat atorlugu oqaluttuarnermigut Lukasip toqqaannanngikkaluartumik ersersittarpaa pisut ilaat najuuffigisarsimallugit. Apustilit Suliaanni allaatigineqartut soqutigigutsigit, Guutip oqaasiata allassimasup anersaavatalu illernartup pissaanerat pingaartinnerulissavarput. (Hebræerit 4:12) Aammattaaq imminut pilliutigeriaannaanissamut atuagaq taanna kajumississutigissavarput Guutillu naalagaaffianik neriuutitsinnik nakussatsitsissalluni.
PETRUSIP „QILAAP NAALAGAAFFIATA MATUERSAATAI“ ATORPAI
Apustilit anersaamik illernartumik tunineqareeramik nakimaallutik nalunaajaapput. Petrusip ’Qilaap Naalagaaffiata matuersaataa’ siulleq atorpaa juutit taakkualu upperisaannut ilanngussimasut ’oqaatsiminik ilassinnittut’ ilisimasaqalersinnaaqqullugit Guutillu naalagaaffianut isersinnaaleqqullugit. (Matthæusi 16:19; Apustilit Suliaat 2:5, 41) Malersuinerit amerleriataarmata ajoqersukkat siammarput, tamatumali kinguneriinnarpaa oqaluussiffigisap annertunerulernera.
Apustilit Jerusalemimiittut tusaramikku Samariamiut Guutip oqaasia ilassisimagaat Petrusi Johannesilu taakkununnga aallartippaat. Guutip naalagaaffianut isernissamut taakku periarfissinnerisigut Petrusip matuersaatit aappaat atorpaa. (Apustilit Suliaat 8:14-17) Jiisusip toqusunit makititaanerata kingorna immaqa ukioq ataaseq suli qaangiutinngitsoq Saulusi Tarsusimeersoq tupaallannartumik allanngorpoq. Ukiumi 36-mi Petrusip matuersaatit pingajuat atorpaa, inunnullu inuianneersunut kipineqanngitsunut anersaap illernartup tunissutigisaa kuineqarpoq. — Apustilit Suliaat 10:45.
Allassimaffiit pillugit apeqqutinut akissutit:
2:44-47; 4:34, 35 — Sooq uppertut pigisatik tunivaat isertitatillu agguaallugit? Uppertunngortut ilarpassui ungasissumeersuupput sivisunerusumillu Jerusalemimiinnissaminnut akissaminnik naammattunik nassarsimanatik. Jerusalemimiiginnarumappulli upperisartaartik pillugu ilinniarnerorusukkamik allanullu oqaluusserusukkamik. Uppeqatit nutaat taakku ikiorumallugit kristumiut ilaasa pigisatik tunivaat, aningaasallu pisariaqartitsisunut agguaanneqarput.
4:13 — Sooq inuit oqarpat Petrusi Johannesilu „inuinnaasut immikkut ilinniagaqarsimanngitsut“? Taama oqarput Petrusi Johannesilu rabbinerit atuarfianni upperisarsiornikkut ilinniartitaasimanngimmata.
5:34-39 — Killisiuisoqatigiinni ilaasortaqatini kisimik tusaasut Gamalielip qanoq oqarnera Lukasip qanoq ilisimasinnaagamiuk? Minnerpaamik pingasut periarfissaapput: (1) Paulusi, Gamalielip ilinniartitarisimasaa, Lukasimut oqaluttuarpoq; (2) Lukasi tusarniaavoq killisiuisoqatigiinneersut ilaannut iluarinnittumut, assersuutigalugu Nikodemusimut; (3) Lukasi Guutimit isumassarsisitaavoq.
7:59 — Stefanusi Jiisusimut qinua? Naamik, taamaaliunngilaq. Jehova kisiat pallorfigisussaavarput — taamaattumillu Jehovamuinnaq qinusussaavugut. (Lukasi 4:8; 6:12) Pissutsit nalinginnaatillugit Stefanusi Jiisusip aqqani Jehovamut qinusarpoq. (Johannesi 15:16) Pissutsinili immikkut ittuni matumani Stefanusip takorruuinikkut „Inuup Ernera Guutip talerpiata tungaani qeqartoq“ takuaa. (Apustilit Suliaat 7:56) Stefanusip ilisimalluaramiuk Jiisusi toqusunik makititsinissamut piginnaatitaaffilerneqarsimasoq, Jiisusimut, qinunikkut pinnani, toqqaannartumik oqaluppoq anersaani paareqqullugu. — Johannesi 5:27-29.
Ilinniarfigisinnaasavut:
1:8. Anersaaq illernartoq ikiortiginagu Jehovap kiffaasa nunarsuaq tamakkerlugu oqaluussineq ingerlassinnaanngilaat.
4:36–5:11. Josefip Cypernimeersup Barnaba, isumaqartoq „tuppallersaatip ernera“, taaguutigilersimavaa. Apustilit taama taasalersimasinnaavaat asannittuunera, inussiarnersuunera allanullu ikiuukkumatuujunera pissutigalugit. Taanna ilaartariaqarparput Ananiap Safirallu unneqqaserluttuunerattut, peqqusersuujunerattut ilumoortuusaarnerattullu pinnata.
9:23-25. Oqaluussiinnarsinnaajumalluta akeqqatsinnit qimaaneq qunutuujunerunngilaq.
9:28-30. Sumiiffiit ilaanni inuilluunniit ataasiakkaat ilaannut oqaluussineq timikkut, ileqqussatigut anersaakkulluunniit ulorianarsippat mianersortariaqarpugut naliliisinnaasariaqarlutalu sumi qaqugulu oqaluussissanerluta.
9:31. Piffissaq eqqissisimaffiutillugu atuaqqissaartarnikkut atuakkatsinnillu eqqarsaatiginneqqissaartarnikkut uppernerput nakussatsittariaqarparput. Taamaaliorneq iluaqutigissavarput ilikkakkatsinnik atuinikkut oqaluussinermilu aallussilluarnikkut Jehova mianeralugu inuunissatsinnut.
PAULUSIP AALLUSSILLUARLUNI OQALUUSSINERA
(Apustilit Suliaat 11:19–28:31)
Ukiumi 44-mi Agabosi Antiokiamut tikippoq Barnaba Paulusilu „ukioq ilivitsoq“ ilinniartitsereersut. Agabosi siulittuivoq „kaannersuaqalissasoq“, taamaattoqarporlu ukiut marluk tamatuma kingorna. (Apustilit Suliaat 11:26-28) Barnabap Saulusillu ikiuinermut tunngasoq „Jerusalemimi suliassartik naammassereeramikku“ Antiokiamut uterput. (Apustilit Suliaat 11:29, 30; 12:25) Ukiumi 47-mi — Saulusip kristumiunngornerata kingorna ukiut 12-t qaangiuttut — anersaap illernartup Barnaba Saulusilu ajoqersuiartortitatut angalaartilerpai. (Apustilit Suliaat 13:1-4) Ukiumi 48-mi Antiokiamut uterput, „Guutip saammaanneranut pisinneqarfigisaminnut“. — Apustilit Suliaat 14:26.
Tamatuma kingorna qaammatit qulingiluat missaat qaangiuttut Paulusip (aamma Saulusitut ilisimaneqartup) ajoqersuiartortitatut aappassaanik angalanissaminut Silasi angalaqatissamisut toqqarpaa. (Apustilit Suliaat 15:40) Aqqutaani Timotheusip Lukasillu Paulusi angalaqasiuppaat. Lukasi Filippimut unippoq, Paulusi Athenimut ingerlaqqippoq tamatumalu kingorna Korinthimut, tassani naapippai Akvila Priskillalu ukiullu aappaa qiteqqullugu tassaniilluni. (Apustilit Suliaat 18:11) Paulusip Timotheusi Silasilu Korinthimut qimallugit nammineq Akvila Priskillalu ilagalugit ukiup 52-ip aallartinnerani umiarsuarmik Syriamukarpoq. (Apustilit Suliaat 18:18) Paulusip Akvila Priskillalu Efesosimut ingerlaqatigeriarlugit tassunga qimappai.
Paulusip Antiokia Syriamiittoq uninngavigingaatsiarpaa, taava ukiumi 52-imi ajoqersuiartortitatut angalanermi pingajussaat aallartippaa. (Apustilit Suliaat 18:23) Efesosimi Jehovap oqaasia „siammariartortuarpoq sunniuteqarnerujartuinnarlunilu“. (Apustilit Suliaat 19:20) Paulusi illoqarfimmi tassaniippoq ukiut pingasut missiliorlugit. (Apustilit Suliaat 20:31) Ukiumi 56-imi piinsip ulluani Jerusalemimiippoq. Parnaarussaavoq nakimaallunilu oqartussaasunut nalunaajaalluni. Apustili ukiuni marlunni (59-61-ip missaani) Romami illumi parnaarussaaqqavoq, tassaniitillunilu periarfissat tamaasa atorlugit Guutip naalagaaffia pillugu oqaluussisarpoq „Naalagarlu Jiisusi-Kristusi“ ajoqersuutigisarlugu. — Apustilit Suliaat 28:30, 31.
Allassimaffiit pillugit apeqqutinut akissutit:
14:8-13 — Sooq Lystrami innuttaasut „Barnaba Zeusimik taavaat Paulusilu Hermesimik“? Grækerit oqaluttuatoqaanni Zeusi tassaavoq guutit qullersaat erneralu Hermesi oqallorissutut ilisimaneqarluni. Paulusi oqaluttuummat Lystramiunit Hermesimik taaneqarpoq Barnabalu Zeusimik taaneqarluni.
16:6, 7 — Sooq anersaap illernartup Paulusi ikiortaalu Asiami Bityniamilu oqaluusseqqunngilai? Sulisussat ikeqimmata sumiiffinnut suliap inerititaqarfiginerusinnaasaanut anersaap siulersorpai.
18:12-17 — Sooq nunamut naalagaatitaq Gallio akuliutinngila Sosthenesi inunnit unatarneqarmat? Gallio isumaqarsimasinnaavoq angutip taassuma inupalaanut Paulusimik akerlilersuisunut siuttoorpasissup pisassani piinnaraa. Pisoq ajunngitsumik kinguneqarunarpoq Sosthenesimi kristumiunngorpoq. Kingusinnerusukkut Paulusip Sosthenesi „qatannguterput“-mik taavaa. — 1 Korinthimiut 1:1.
18:18 — Neriorsuut sunaana Paulusip neriorsuutigigaa? Ilisimatuut ilaat isumaqarput Paulusip nasiræeritut neriorsuut neriorsuutigigaa. (4 Mosesi 6:1-21) Biibilimili allassimasoqanngilaq qanoq neriorsuinersoq. Aamma allassimanngilaq Paulusip kristumiunngornerata siornatigut kingornatiguluunniit neriorsuutaanersoq, neriorsueqqammernersoq imaluunniit neriorsuumminik eqqortitsingajalernersoq. Pissutsit qanorluunniit ikkaluarpata taamatut neriorsuineq kukkunerunngilaq.
Ilinniarfigisinnaasavut:
12:5-11. Qatanngutivut qinnussinnaallugillu qinnuttariaqarpavut.
12:21-23; 14:14-18. Herodesip ataqqinaat Guutip kisimi ataqqinaatissaralua nuannaarluni ilassivaa. Tamatumannga allaanerusumik Paulusip Barnaballu unnersiutigineqarnissartik ataqqineqarnissartillu ingerlaannaq aalajangersimalluinnarlutillu itigartittarpaat! Jehovamut kiffartornitsinni angusavut nammineq ataqqinaatissatut isigissanngilavut.
14:5-7. Mianersortarutta oqaluussinermi suliniuteqartuarnissatsinnut iluaqutigissavarput. — Matthæusi 10:23.
14:22. Kristumiut annikilliortarnissartik naatsorsuutigaat. Upperisa ik akerlianik iliuuseqarnikkut tamakku qimarratiginianngilaat. — 2 Timotheusi 3:12.
16:1, 2. Inuusuttut kristumiut anersaakkut ittunik ulapputeqartariaqarput tusaamasaallualerniarlutillu Jehovamut ikiortissarsiortariaqarlutik.
16:3. Allat nutaarsiassamik nuannersumik ilassinninnissaannik ikiorniarlugit Biibilimi najoqqutassiat unioqqutinnagit sapinngisarput tamaat iliuuseqarniartariaqarpugut. — 1 Korinthimiut 9:19-23.
20:20, 21. Illumiit illumut oqaluussineq kiffartornitta ilagaa pingaarutilik.
20:24; 21:13. Assuarnaattuarneq inuuginnarnissamit pingaarneruvoq.
21:21-26. Siunnersuutit pitsaasut kajumittumik ilassilluartariaqarpavut.
25:8-12. Ullumikkut kristumiut ’nutaarsiassaq nuannersoq illersorniarlugu inatsisitigullu aalajangersarniarlugu’ inatsisitigut periarfissaasut tamaasa atorsinnaavaat atortariaqarlugillu. — Filippimiut 1:7, NV.
26:24, 25. ’Oqaatsit ilumoortuusut silatuujusullu’ saqqummiuttariaqarpavut ’inuup tarnimut atasup’ sianiitsuliornertut isigigaluarpagilluunniit. — 1 Korinthimiut 2:14. (w08 05/15-E)
[Qupp. 8-mi assiliartaq]
„Qilaap Naalagaaffiata matuersaatai“ qanga Petrusip atorpai?
[Qupp. 9-mi assiliartaq]
Anersaaq illernartoq ikiortiginagu nunarsuaq tamakkerlugu oqaluussineq ingerlanneqarsinnaanngilaq