Jiisusip toqua annassutigisinnaavat — qanoq?

UKIUT 2000-ngajaat matuma siorna, ukiumi 33-mi juutit poorskisiorneranni, inuit allat inuusinnaaqqullugit angut pisuussuteqanngitsoq toquvoq. Angut taanna kinaava? Tassaavoq Jiisusi Nazaretimioq. Iliuuseq nuanningaartoq taanna kia iluaqutigisinnaavaa? Inuiaat tamarmik iluaqutigisinnaavaat. Jiisusip pilliutaa inuunermik annaassissutaasinnaasoq Biibilimi versimi ilisimaneqarluartumi naatsumik ima oqaatigineqarpoq: „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ — Johannesi 3:16.

Allassimaffiup isumaa inuit ikittuinnaat paasisimavaat naak inuppassuarnit ilisimaneqaraluartoq. Ima eqqarsarput: ’Sooq Kristusip pilliutaa pisariaqartipparput? Angutip ataatsip toquata inuiaat naassaanngitsumik toqunissaraluannit qanoq annaassinnaavai?’ Apeqqutit taakku erseqqissumik naammaginartumillu Biibilimi akineqarput.

Toqu inuiannut qanoq naalagaalersoq

Inuit ilaasa upperaat inuk sivikitsuinnarmik nunami misilinneqartarluni pilluarnermillu misigisaqartarluni inooriarluni toqulluni sumiiffimmut pitsaanerusumut pisinneqassalluni pinngortitaasoq. Taama isumaqarneq naapertorlugu Guutip inunnut siunertaanut toqu ilaavoq. Biibilimili ersersinneqarpoq toqup inuiannik eqquinera allarluinnarmik pissuteqartoq. Tassani ima allassimavoq: „Soorlu inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.“ (Romamiut 5:12) Versimi tamatumani ersersinneqarpoq ajortip kingunerisaanik inuit toqusartut. Kisiannimi ’inuk ataaseq’ taanna ajortip sunniutaanik toqoraataasunik inuiannut tamanut ingerlatitseqqittoq kinaava?

The World Book Encyclopedia-mi uparuarneqarpoq ilisimatuut amerlanerit isumaqartut inuit tamarmik nagguik ataaseq pilerfigigaat, pilerfillu ataaseq — ’inuk ataaseq’ — taanna Biibilimi erseqqissumik kinaassusilerneqarpoq. Mosesimik allakkat siulliit 1:27-mi ima allassimavoq: „Guutip inuk pinngortippaa imminik assililluni; Guuti assilillugu pinngortippaa. Pinngortippai tassaatillugit angut arnarlu.“ Tassa Biibilimi allassimavoq inuit aappariit siulliit Guutip ajugaqanngitsup pinngortitaasa kusanartumik naammassinerigai.

Jehova Guutip inummik siullermik pinngortitsinerata kingorna inuup inuunera pillugu Mosesimik allakkani siullerni oqaluttuami sukumiinerusumik paasissutissaqarpoq. Maluginiarnarpoq, naalannginnerup kingunipiluatut eqqaanerata saniatigut, oqaluttuami tamatumani Guutip toqu eqqaanngilluinnarmagu. (1 Mosesi 2:16, 17) Kissaatigaa inuit nunarsuarmi paratiisiusumi alianaatsumi peqqillutik pilluarlutillu naassaanngitsumik inuussasut. Kissaatiginngilaa utoqqalineq pissutigalugu naalliussasut naggataatigullu toqussasut. Qanorliuna toqup inuiaat tamaasa pissaaneqarfigilerai?

Mosesimik allakkani siullerni kapitali 3-mi oqaluttuarineqarpoq inuit aappariit siulliit Inuunermik Tunisisiminnut Jehova Guutimut  piaaralutik naalannginniarlutik qanoq aalajangertut. Tamatuma kingunerisaanik eqqartuussut, naalanngippanni eqqartuunneqaatigisassaat, siumut oqaatigeriikkani Guutip naammassivaa. Adamimut ima oqarpoq: „Issumit pivutit, issunngussaatillu.“ (1 Mosesi 3:19) Guutip oqarneratut inuit siulliit marluk naggataatigut toqupput.

Aappariilli siulliit kisimik ajoquserneqanngillat. Aamma naalannginnermik kingunerisaannik kinguaassamik inuunermik naammalluinnartumik nuannaarutiginnissinnaanerigaluat aserorpaat. Suli inunngorsimanngitsut taakkua Jehovap siunertaanut ilaapput, siunertani Adamimut Evamullu ima oqaatigaa: „Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu; naalagaagitsilu aalisakkanut immamiittunut qilaallu timmiaanut nersutinullu nunami aalasunut tamanut.“ (1 Mosesi 1:28) Piffissap ingerlanerani inuit nunarsuaq tamakkerlugu najugaqarfigilertussaavaat qaqugumulluunniillu toqunatik pilluarluni inuuneq nuannaarutigisussaallugu. Taakkuali siuaasaata Adamip — ’inuup ataatsip’ — ajortimut inussiaataalersillugit akigai, toqumik atunngitsuugassaanngitsutut naggateqartussamik. Apustili Paulusi, aappariit siulliit kinguaavat, ima allappoq: „Uanga uinimmit pisuuvunga akigineqarsimallunga ajortimut kiffaalerlunga.“ — Romamiut 7:14.

Soorlu nalitsinni eqqumiitsuliat nalissaqanngitsut innarlisaarisartunit aserorneqarsimasut, taamatulli inuk Guutip pinngortitaa tupinnangaartoq Adamimit annertuumik ajoquserneqarpoq. Adamip qitornai qitornartaarput, taavalu ernutartaarlutik, taamatullu ingerlajuarput. Kinguaariit tulliuttut inunngortarput, alliartortarput meeqqiortarput toqusarlutillu. Sooq tamarmik toquppat? Tamarmik Adamimik siuaasaqaramik. Biibilimi ima allassimavoq: „Inuup ataatsip ajortuliornera pissutigalugu inuit amerlasuut toqupput.“ (Romamiut 5:15) Ajortumik ilioqqajaasarneq, nappaatit, utoqqalineq, aap, allaallu toqu Adamip nammineq ilaquttaminik killuutiginninnerata kingunerai alianartut. Ilaqutariinnullu taakkununnga ilaavugut.

Apustili Paulusi kristumiunut Romamiittunut allakkamini nammineq inuillu naammalluinnanngitsut allat tamarmik atugaat alianartut ajortillu sunniineranik akiugaqartariaqarnerat  ilungersunartoq allaatigai. Ima nillerpoq: „Uangannguakkuluk! Kia kiffaajunnaarsissavaanga timimit matumannga toqup pianit?“ Apeqqut pingaarutilerujussuaq, ilaa? Kia toqumut ajortimullu inussiaataanermit aniguinissamut Paulusi — allallu tamatumannga erinisuttut tamaasa — periarfississavai? Apeqqut taanna toqqaannanngitsumik Paulusip nammineq ima akivaa: „Guuti qujanarsili Jiisusi-Kristusikkut Naalakkatsigut!“ (Romamiut 7:14-25) Aap, Pinngortitsisitta Ernini Jiisusi Kristusi aqqutigalugu atukkatsinnit nuanniitsunit annaanneqarsinnaanerput isumagisimavaa.

Inuiaat annaanneqarneranni Jiisusip atorneqarnera

Jiisusip nammineq oqaluttuaraa inuiaat ajortinut inussiaataanermit toqoraataasumit annaanneqarnissaannut qanoq atorneqarluni. Ima oqarpoq: ’Inuup Ernera tikiuppoq inuunini akissatut tunniutissallugu amerlasuut utertinneqaatissaattut.’ (Matthæusi 20:28) Jiisusip inuunera qanoq ililluni utertitsissutaava? Toqua qanoq iluaqutigisinnaavarput?

Jiisusi ’ajorteqanngitsutut’ aamma ’ajortilinnit immikkoortitaasutut’ Biibilimi allaatigineqarpoq. Jiisusip inuunini naallugu Guutip inatsisai naammalluinnartumik naalappai. (Hebræerit 4:15; 7:26) Taamaattumik Jiisusip toqua ajortimit naalannginnermilluunniit, Adamip toqussutigisaatut ittumit, pissuteqanngilaq. (Ezekieli 18:4) Aap, toqusariaqanngikkaluarluni inuiaat ajortimit toqumillu annaanniarlugit Ataatami piumasaa naammassisinnaajumallugu toqunissani akueraa. Eqqaaneqareersutut Jiisusip kajumilluni ’inuunini tunniuppaa utertinneqaatissatut’. Asanninneq oqaluttuarisaanermi nallerneqarsimanngitsoq kajumississutigalugu inunnut ’tamanut iluaqutaasussamik toqumik misigisaqarpoq’. — Hebræerit 2:9.

Inuuneq Jiisusip pilliutaa, inuunerup Adamip ajortuliorami annaasaata naligilluinnarpaa. Jiisusip toqua qanoq kinguneqarpa? Pilliut taanna ’inuit tamarmik utertitaassutissaattut’ Jehovap akueraa. (1 Timotheusi 2:6) Jiisusip inuunerata nalinga atorlugu Guutip inuiaat ajortimut toqumullu inussiaataanerannit pisiaralugit utertippai, imaluunniit aniguisippai.

Inuup Pinngortitsisuata asannittuliornera nuanningaartoq tamanna Biibilimi ataasiaannarani eqqaaneqarpoq. Paulusip kristumiut ’akisuumik pisiarineqarsimanerannik’ eqqaasippai. (1 Korinthimiut 6:20; 7:23) Petrusi kristumiunut allappoq inuunerannit toqumik kinguneqartussamit aniguisinniarlugit Guutip sølvi kuultiluunniit akiginagu ernermi aava akigigaa. (1 Petrusi 1:18, 19) Kristusip utertitsissutitut pilliutaa iluaqutigalugu Jehovap inuiaat naassaanngitsumik toqunissaraluannit annaanneqarnissaat isumagaa.

 Kristusip utertitsissutitut pilliutaa iluaqutigissaviuk?

Kristusip utertitsissutitut pilliutaata iluaqutissartarpassui pillugit apustili Johannesi ima allappoq: „[Jiisusi Kristusi] pilliutaavoq saammaannartitsissut uaguinnaanngitsut silarsuulli ajortai tamaasa pillugit.“ (1 Johannesi 2:2) Aap, Kristusip pilliutaa inuiaat tamarmik iluaqutigisinnaavaat. Isumaqarpa aaqqissuussineq nalissaqanngitsoq tamanna kikkut tamarmik iliuuseqaratik iluaqutigisinnaagaat? Naamik. Kristusip utertitsissutitut pilliutaanik iluaqutiginnikkusuttut Guutip ajunngitsuliornissaa iliuuseqaratik utaqqiinnarsinnaanngilaat. Namminneq iliuuseqartariaqarput.

Taakkununnga Guuti sumik piumasaqarpa? Johannesi 3:36-mi ima allassimavoq: „Ernermut uppertoq naassaanngitsumik inuuneqarpoq; Ernermut naalasseriitsup inuuneq takussanngilaa, Guutilli kamannerata qulangersimajuassavaa.“ Guutip piumasaraa Kristusip pilliutaa upperissagipput. Tamannaannaanngilarli. „Matumuuna nalujunnaarparput [Jiisusi] ilisimallutigu: Inassutai maleruarutsigit.“ (1 Johannesi 2:3) Tassa erseqqippoq ajortimit toqumillu annaanneqassagutta Kristusip utertitsissutitut pilliutaa upperisariaqaripput inassutaalu maleruartariaqarlugit.

Pinngortitsisup erneratalu inuit piuneerussaanissaraluannit annaanniarlugit pilliutaat angingaartoq ullumikkut inuit ikittuinnaat tamakkiisumik paasisimavaat qujamasunnerminnillu ersersitsisimallutik. Pilliummut tamatumunnga uppernermik ersersitsisut misigipput immikkut ittumik nuannaarutissaqarlutik. Apustili Petrusi uppeqatiminut kristumiunut ima allappoq: „[Jiisusi] upperfigisarsi, qiimmattaatigissavarsi tipaatsunnermik asseqanngitsumik naalannarsisitaasumik, uppernikkut anguniagarsi, tassa tarnissi annannissaat, angugussiuk.“ (1 Petrusi 1:8, 9) Jiisusi Kristusimut asanninnermik taassumalu utertitsissutitut pilliutaanut uppernermik ineriartortitsinikkut, inuunerit maanna nuannaarutigingaalersinnaavat aamma ajortimit toqumillu aniguisitaanissat qilanaarilersinnaavat. (w08 03/01-E)

[Qupp. 5-mi assiliartaq]

Adamip ajortuliaata sunniutai atorunnaarsinniarlugit Jiisusip inuunini tunniuppaa

[Qupp. 6-mi assiliartaq]

Jehovap Nalunaajaasuisa ukiut tamaasa Jiisusip toqua eqqaaniartarpaat