1, 2. Sooq inuppassuit Jiisusip eqqartugai paasinngilaat?

OQALUUNNEQARAANGATTA oqaluttup nipaa tusaallugulu allaat oqaloriaasia maluginiarsinnaavarput. Eqqartugaali paaserusukkutsigit oqaasiisa isumaat paasisariaqarpavut. (1 Kor 14:9) Jiisusip inuit tuusintillit namminneq oqaasii atorlugit oqaluuppai. Oqaatsimilli isumaat paasinngimmatigit ima oqarfigai: “Tamassi tusarnaarsinga isumaalu paasillugu.” — Mark 7:14, NW.

² Sooq inuppassuit Jiisusip eqqartugai paasinngilaat? Ilaat isummiussereersimagamik imaluunniit allaat eqqunngitsunik pissutiginiagaqaramik. Inuit taakku pillugit Jiisusi ima oqarpoq: “Guutip inassutai narrugalugit ilissi nammineq kingornussarsiasi atulersippasi.” (Mark 7:9) Taakku ileqqutik isummatillu allanngortikkusunnginnamikkit Jiisusip oqaasiisa isumaat paasiniarsarinngilaat. Siutiminnik tusarnaaraluarlutik uummatimikkut paasisaqanngillat. (Matthæusi 13:13-15 atuakkit). Jiisusip ilinniartitsissutaanik tamatigut paasisaqarnissatsinnut kajumissuseqartuarnissarput qanoq qulakkeersinnaavarput?

3. Sooq ajoqersukkat Jiisusip oqaasiisa isumaat paasisinnaavaat?

³ Jiisusip ajoqersugaasa maniguuttut maligassiaat ilaartariaqarparput. Taakku Jiisusimit ima oqarfigineqarput: “Isisi pilluarput takunnittaramik siutisilu tusaasaramik.” (Matt 13:16) Sooq Jiisusip eqqartugai, inuit allat paasisinnaanngisaat, paasisinnaavaat? Pingasutigut iliuuseqaramik. Siullertut, aperinissaminnut kajumissuseqarlutillu Jiisusip sunarpiaq pineraa paasiniarsaraat. (Matt 13:36; Mark 7:17) Aappaattut, ilikkakkatik uummatimikkut akuerisimasaminnut atassuserusuppaat. (Matthæusi 13:11, 12 atuakkit). Pingajuattut, ilikkakkatik atorlugit allanik ikiuinissaminnut imminullu ikiornissaminnut piumassuseqarput. — Matt 13:51, 52.

4. Jiisusip assersuusiai paasiumallugit pingasut suut iliuuserisariaqarpavut?

⁴ Ajoqersukkat pisimanerattut Jiisusip assersuusiai paasiumallugit pingasutigut iliuuseqartariaqarpugut. Siullertut, atuaqqissaarnissatsinnut, Jiisusip oqaasiinik eqqarsaatiginneqqissaarnissatsinnut, misissueqqissaarnissatsinnut eqqortunillu apeqquteqartarnissatsinnut piffissaqartariaqarpugut. Tamanna tassaavoq ilisimasaqarneq. (Uss 2:4, 5) Aappaattut, ilisimasaqarneq taanna qanoq ilisimariikkatsinnut attuumassuteqarnersoq qanorlu iluaqutigisinnaanerlutigu paasiniartariaqarparput. Tamanna tassaavoq paasisimasaqarneq. (Uss 2:2, 3) Pingajuattut, ilikkakkavut malillugit iliuuseqartariaqarpugut. Tamanna tassaavoq ilisimassuseq. — Uss 2:6, 7.

5. Ilisimasaqarnerup, paasisimasaqarnerup ilisimassutsillu assigiinngissutaat pillugu assersuuteqarit.

⁵ Ilisimasaqarneq, paasisimasaqarneq ilisimassuserlu qanoq assigiinngissuteqarpat? Tamanna ima assersuusiarineqarsinnaavoq: Takorlooriaruk aqqusernup qeqqaniitillutit bussi tunginnukartoq. Siullertut bussi takuat — tassa ilisimasaqarneq. Aappassaattut, paasivat nikorfaannaruit bussimit aportissinnaallutit — tassa paasisimasaqarneq. Taamaattumik aportikkusunnak illuapallapputit — tassa ilisimassuseq. Biibilimi peqquneqarpugut ilisimassuseq ‘isitsinnit nigortissanngikkipput’, tamannami annassutigisinnaagatsigu! — Uss 3:21, 22; 1 Tim 4:16.

6. Jiisusip assersuusiai arfineq-marluk samminerini qanoq aperisassaagut? ( Ungalusaq takuuk).

⁶ Allaaserisami matumani tulliuttumilu Jiisusip assersuusiai arfineq-marluk sammissavavut. Imalu aperisassaagut: Assersuut qanoq isumaqarpa? (Tassa ilisimasaqarneq). Sooq Jiisusi taamatut assersuusiorpa? (Tassa paasisimasaqarneq). Tamanna imminut ikiornissatsinnut allallu ikiornissaannut qanoq iluaqutigaarput? (Tassa ilisimassuseq). Kingullertut, tamatumannga Jehova Jiisusilu pillugit suna ilikkarparput?

7. Jiisusip siinuppip naatsiiassartaa pillugu assersuusiaa qanoq isumaqarpa?

⁷ Matthæusip iivangkiiliua 13:31, 32-lu atuakkit. Jiisusip siinuppip naatsiiassartaa pillugu assersuusiaa qanoq  isumaqarpa? Siinuppip naatsiiassartaa Guutip naalagaaffianik tusarliussamut oqaluussissutigisartakkatsinnut kristumiullu ilagiivinut assersuutaavoq. Kristumiut ilagiissortai ukiumi 33-mi pilersinneqaramik amerlanngimmata ‘naatsiiassanit allanit tamanit minnerusutut’ ipput. Oqaluussineq pissutigalugu piffissap sivikitsup ingerlanerani naajartupiloorput. Taama annertutigisumik sukkatigisumillu naajartornissaat inuppassuit ilimaginngikkaluarpaat. (Kol 1:23) Jiisusi oqarpoq ‘qilaap timmiai avalequtaani ulluliortartut’. Tamanna eqqortuliorusuttut anersaakkut neriumallutik, alanngisimaffissarsiniarlutik oqquiffissarsiniarlutillu kristumiut ilagiivinukartarnissaattut paasisariaqarpoq. — Ezekieli 17:23 naleqqiuguk.

8. Sooq Jiisusi siinuppip naatsiiassartaa pillugu assersuusiorpa?

⁸ Sooq Jiisusi taamatut assersuusiorpa? Guutip naalagaaffiata ineriartornera, qanoq illersuisarnera qanorlu ajornartorsiutinik tamanik qaangiisarnera ersersinniarlugit siinuppip naatsiiassartaata naajartupiloornera assersuusiaraa. 1914-imiilli kristumiut ilagiivi amerliartupiloorsimapput. (Es 60:22) Ilagiinniittut Jehovamut attaveqarluartuarnissaannut ikiorneqarput. (Uss 2:7; Es 32:1, 2) Akerlilersuineq sunaluunniit ilagiit amerliartornerannut akornusiisinnaanngilaq. — Es 54:17.

9. (a) Siinuppip naatsiiassartaa pillugu assersuusiaq qanoq ilinniarfigisinnaavarput? (b) Tamatumannga Jehova Jiisusilu pillugit suna ilikkarparput?

⁹ Siinuppip naatsiiassartaa pillugu  assersuusiaq qanoq ilinniarfigisinnaavarput? Imaassinnaavoq sumiiffimmi ikittuinnarnik nalunaajaasulimmi ineriartortoqarfiuallaanngitsumilu najugaqartugut. Naalagaaffiulli ajornartorsiutinik tamanik qaangiisinnaanera eqqaamasariaqarparput. Tamanna pinertusaarnissamut nakussatsissutigissavarput. Assersuutigalugu qatanngut Edwin Skinner 1926-mi Indiamut tikimmat nalunaajaasut amerlanngillat. Ineriartortoqarpianngimmat oqaluussineq unamminiarnangaarpoq. Oqaluussiuaramili Naalagaaffimmik tusarliussap akornuserneqannginnera misigaa. Ullumikkut Indiami nalunaajaasut 37.000-nit amerlanerupput 2013-imilu 108.000-nit amerlanerusut eqqaaniaanermut najuullutik. 1926-mi Zambiami oqaluussineq aamma aallartisarneqaleruttorpoq. Maanna nalunaajaasut 170.000-nit amerlanerupput 2013-imilu 763.915-it eqqaaniaanermut najuullutik. Tassa Zambiami inuit 18-iugaangata ataaseq eqqaaniaanermut najuuttarpoq. Taamatut ineriartorneq ajasoornaqaaq, ilaa?

10. Seernarsaat pillugu assersuut qanoq isumaqarpa?

¹⁰ Matthæusip iivangkiiliua 13:33 atuaruk. Seernarsaat pillugu assersuut qanoq isumaqarpa? Assersuut tamanna Naalagaaffimmik tusarliussamut tamatumalu inuit inuunerannik allannguisitsisarneranut innersuussutaavoq. ‘Naqittagaq tamarmi’ inuiannut tamanut assersuutaavoq. Seernarsiartornera oqaluussinitta Naalagaaffimmik tusarliussamik siaruariartortitsineranut assersuutaavoq. Siinuppip naatsiiassartaata naajartornera takuneqarsinnaavoq, seernarsaatilli siaruariartornera takuneqarsinnaanani. Aatsaat piffissap ingerlanerani sunniutai takuneqarsinnaapput.

11. Sooq Jiisusi seernarsaat pillugu assersuusiorpa?

¹¹ Sooq Jiisusi taamatut assersuusiorpa? Naalagaaffimmik tusarliussap inunnut ‘nunarsuup isuaniittunut allaat’ tusarliunneqarnissaa inuillu uummataannik allannguisitsingaarsinnaanera Jiisusip ersersippaa. (ApS 1:8) Aallaqqaammut allanngornerit tamakku immaqa maluginianngilavut. Inuppassuilli Naalagaaffimmik tusarliussamik ilassinnillutillu tamanna pissutigalugu kinaassutsiminnik allannguipput. — Rom 12:2; Ef 4:22, 23.

12, 13. Seernarsaat pillugu assersuusiami ersersinneqartutut oqaluussinitta kinguneqarluartarneranik assersuuteqarit.

¹² Oqaluussinerup kinguneqarluarnera ukiorpassuit ingerlareeraangata aatsaat takuneqarsinnaasarpoq. Assersuutigalugu 1982-imi Franz aamma  Margit, aappariit Brasiliami Betelimi kiffartortut, illoqarfeeqqami oqaluussipput. Arlalinnik Biibilimik atuaqqissaaqateqartalerput, taakkua ilagaat anaanaasoq sisamanik qitornalik. Taassuma ernera angajulleq taamani aqqaneq-marluinnarnik ukioqarpoq. Ittuutoorujussuuvoq atuaqqissaaqatigiinnerullu aallartinnginnerani toqqorniarsarisarluni. Franz aamma Margit allamik suliassinneqaramik ilaqutariit atuaqqissaaqatigisarnissaannut periarfissaarupput. Ukiut 25-t qaangiummata illoqarfeeqqamut tikeraaqqipput. Naalagaaffilersaarfimmi nutaami 69-inik oqaluussisartoqartoq, taakkunanngalu 13-it pioneriusut, paasigamikku nuannaarnerat takorloorsinnaaviuk? Nukappiararlu taanna ittuutooq maanna utoqqaanertaqatigiinni ataqatigiissaarisutut kiffartorpoq! Jiisusip assersuusiaani seernarsaatitut Naalagaaffimmik tusarliussaq siaruarsimallunilu inuppassuit inuunerannik allannguisitsisimavoq.

¹³ Allaat nunani oqaluussinermik killilersuiffiusuni Naalagaaffimmik tusarliussaq inuit inuunerannik allannguisitsisarpoq. Nunani taamaattuni tusarliussap tusarliunneqarsimanera ajasoorutigisarparput. Assersuutigalugu Naalagaaffimmik tusarliussaq 1910-mi Cubamut tusarliunneqarpoq, qatanngullu Russell 1913-imi qeqertamut tamatumunnga tikeraarmat ineriartortoqarpasinngilaq. Ullumikkulli Cubami oqaluussineq qanoq ingerlava? Oqaluussisartut nutaarsiassamik nuannersumik oqaluussissutiginnittut 96.000-nit amerlanerupput, 2013-imilu eqqaaniaanermut najuuttut 229.726-ullutik. Tassa innuttaasut 48-gaangata ataaseq najuuttarpoq. Allaat nunani oqaluussinissamik inerteqquteqarfiusuni Naalagaaffimmik tusarliussaq sumiiffinnut qatanngutitta najugaqavissut oqaluussiffigineqarsorisinnaanngisaannut tusarliunneqartarpoq. — Oqal 8:7; 11:5.

14, 15. (a) Seernarsaat pillugu assersuusiami ilinniartitsissutigineqartoq qanoq iluaqutigisinnaavarput? (b) Tamatumannga Jehova Jiisusilu pillugit suna ilikkarparput?

¹⁴ Seernarsaat pillugu assersuusiami Jiisusip ilinniartitsissutaa qanoq ilinniarfigisinnaavarput? Jiisusip assersuusiaata isumaa eqqarsaatigeqqissaarutsigu paasissavarput Naalagaaffimmik tusarliussap inunnut millionilinnut oqaluussiffigineqarsimanngitsunut tusarliunneqarnissaa isumakuluutigisariaqarnatigu. Jehovap pissutsit tamaasa aquppai. Uagummi suna suliassaraarput? Guutip oqaasiani tamanna ima akineqarpoq: “Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.” (Oqal 11:6) Soorunami Jehova sulinerput, ingammik nunani oqaluussinermik killilersuiffiusuni, pilluaqqoqqullugu qinnuigisariaqarparput. — Ef 6:18-20.

¹⁵ Aamma oqaluussinitta kinguneqarluarnera ingerlaannaq takusinnaanngikkutsigu nikallortariaqanngilagut.  ‘Aallarnikkat suunngitsutut ittut nikagissanngilavut.’ (Zak 4:10) Oqaluussinerput takorloorsimanngisaannakkatsitut kinguneqarluarnerusinnaavoq! — Tuss 40:6; Zak 4:7.

16. Niuertoq pillugu assersuut aamma erlinnartuut toqqorneqarsimasoq pillugu assersuut qanoq isumaqarpat?

¹⁶ Matthæusip iivangkiiliua 13:44-46 atuakkit. Niuertoq erlinnartuullu toqqorneqarsimasoq pillugit assersuutit qanoq isumaqarpat? Jiisusip nalaani niuertut ilaat sapangamik ujarlerniarlutik pisiniarlutillu ungasissumut angalasarput. Jiisusip assersuusiaani “sapangaq ataaseq akisoorujussuaq” Naalagaaffik pillugu ilumoortumut erlinnartumut assersuutaavoq, niuertorlu inunnut eqqortuliorusuttunut sallusuissut nassaariumallugu sumut tamaanga ujarlertunut assersuutaavoq. Niuertup sapangaq akisoorujussuaq pisiariumallugu pigisani tamaasa ingerlaannaq akigiartorusuppai. Aamma Jiisusi narsaammi angut sulisoq erlinnartuummillu ‘toqqorneqarsimasumik’ nassaartoq pillugu assersuusiorpoq. Taanna niuertutut erlinnartuummik ujarlinngilaq. Nalingali paasigamiuk pissarsiariumallugu “pigisani tamaasa” akigiartorpai.

17. Sooq niuertoq erlinnartuullu toqqorneqarsimasoq pillugu Jiisusi assersuusiorpa?

¹⁷ Sooq Jiisusip taakku marluk assersuusiarai? Ersersikkusukkamiuk sallusuissut assigiinngitsutigut nassaarineqarsinnaasoq. Inuit ilaat sallusuissummik ujarlertarput nassaariumallugulu pilliuteqartarlutik. Allat ujanngikkaluarlugu, immaqa oqaluussiffigineqarnertik pissutigalugu, nassaarisarpaat. Assersuusiani angutit marluk eqqaaneqartut nassaamik akisoorujussuunerat paasigamikku pisiariumallugit pilliuteqangaarusupput.

18. (a) Assersuutit taakku marluk qanoq ilinniarfigisinnaavavut? (b) Taakkunannga Jehova Jiisusilu pillugit suna ilikkarparput?

¹⁸ Assersuutit taakku marluk qanoq ilinniarfigisinnaavavut? (Matt 6:19-21) Imminut ima aperigit: ‘Angutit taakkua sallusuissummut isiginnittaasiattut isiginnittaaseqarpunga? Sallusuissut erlinnartutut isigaara? Pissarsiariumallugu pilliuteqarusuppunga, imaluunniit allat, soorlu ulluinnarni isumakuluutit, akornutaatittarpakka?’ (Matt 6:22-24, 33; Luk 5:27, 28; Fil 3:8) Sallusuissut nuannarilluinnarutsigu inuunitsinni salliutikkumallugu qanorluunniit iliuuseqarusussaagut.

19. Allaaserisami tulliuttumi suut sammissavavut?

¹⁹ Qanortoq assersuutinut taakkununnga tusarnaarsimanerput isumaannillu paasinnissimanerput ersersikkisigu. Eqqaamajuk isumaannik paasinninneq naammanngimmat. Ilikkakkavut malillugit iliuuseqartariaqarpugut. Allaaserisami tulliuttumi assersuutit pingasut allat sammissavavut paasiumallugu qanoq ilinniarfigisinnaanerlutigit.