Daavi Goliatilu ilumut inuusimappat?
Inuit ilaasa Daavimik Goliatimillu oqaluttuaq piviusuunersoq oqaluttualiaannaanersorluunniit eqqarsaatigisarpaat. Allaaserisap siulia atuarakku tamanna eqqarsaatigaajuk? Taamaappat apeqqutit tulliuttut uku eqqarsaatigikkit.
1 | Ilumut inuk 2,9 meterit missaattut takitigisinnaava?
Biibilimi allassimavoq Goliati ‘alenisut arfinilittut assaallu isannerattut atsigisoq’. (1 Samueli 17:4) Allassimaffimmi uani aleni 44,5 centimeterisut atsigaaq, assaallu isannerat 22,2 centimeteriulluni. Tamatuma inerneraa 2,9 meterit missaat. Inuit ilaasa Goliati taama takitigisimannginnerarpaat, unali eqqarsaatigilaariaruk: Ullutsinni angut inuusimasoq takinerpaaq 2,7 meterinit takineruvoq. Goliatip 15-20 centimeteriinnarnik takinerunera apeqquserneqartariarpa? Refaikkunnit takkajaajunerminnik ilisimaneqartunit naggueqarpoq. Allakkami Egyptenimeersumi Kr.in.si. 1200-kkut nalaanneersumi eqqaaneqarpoq Kana’animi sorsuttartorsuit ilaat 2,4 meterinik takissuseqarsimasut. Taamaammat Goliatip taama takitiginera nalinginnaanngikkaluartoq ilumoorsinnaavoq.
2 | Daavi ilumut inuusimava?
Ilisimatuut ilaasa kunngi Daavi oqaluttualiaannaanerarsimagaluarpaat, uppernarsaatilli allamik takutitsipput. Itsarnisarsiortut qanga kigartukkamik ‘Daavip illuanik’ allaqqasortalimmik nassaarsimapput. Aammami Jiisusip Kristusip Daavi ilumut inuusimasutut eqqaasarpaa. (Matthæusi 12:3; 22:43-45) Jiisusip Missiarsiunera kinguaariit allattorsimaqqissaarfiinit marlunnit kunngimit Daavimit kingoqqisuuneranik ersersitsisunit uppernarsarneqarpoq. (Matthæusi 1:6-16; Lukasi 3:23-31) Daavip ilumut inuusimanera erseqqippoq.
3 | Sumiiffik oqaluttuarineqartoq piviusuua?
Biibilimi allassimavoq Terebintip Qooruani akersuussimasut. Aammali illoqarfiit marluk, Sokop Azekallu, akornanni filisterit qaqqajunnami tammaarnerat allaatigineqarpoq. Akiani Israelikkut qaqqajunnami allamiipput. Taakku sumiiffiviuppat?
Tassani takornariaqqammersoq qanoq oqarsimasoq maluginiaruk: “Takornariartitsisutta upperisaqanngitsuusup Terebintip Qooruanukaappaatigut. Qattorngup qaavanukarpugut. Qooqqup qimerloornerani Samuelimik allakkani siullerni 17:1-3 allassimasunik takornariartitsisutta atuaqquaatigut. Taava qooroq tikkuarlugu oqarpoq: ‘Saamerliup tungaani Sokop illukui takussaapput.’ Talerpimmut qiviariarluni nangippoq: ‘Aajikku talerpissinni Azekap illukui. Illoqarfiit taakkua akornanni qaqqajunnani filisterit tammaarput. Taamaattumik Israelikkut tammaarfigisimagunagaanni nikorfavugut.’ Sauli Daavilu nikorfaqatigalugit takorloorpara. Taava ammukarpugut, qooqqumilu kuuk paqqernikoq ujaqqanik ulikkaartoq ikaarparput. Takorloorparalu Daavip maani ujaqqat tallimat, taakkualu ilaat Goliatimik toqutsissutissani, tigugai.” Takornariap taassuma allatulli Biibilip allaat annikitsualuttortaatigut taama piviusorpasitsiginera tupigusuutigeqaa.
Oqaluttuap tamatuma piviusuunerata qularutiginissaanut pissutissaqavinngilaq. Inuit ilumut inuusimasut sumiiffiviillu oqaluttuarineqarput. Pingaarnerusumillu, Guutip isumassarsisitsilluni oqaasianeerpoq, tassa Guutimit ‘sallusuitsumit’ aallaaveqarpoq. – Titusi 1:2; 2 Timotheusi 3:16.