Tittusi 1:1-16
1 Paulusimit, Guutip inussiaataanit Jiisusimillu Kristusimit apustilinngortinneqartumit. Guutip toqqagaasut upperlungalu Guutimut tunniusimanermut naapertuuttumik ilumoortoq pillugu eqqoqqissaartumik paasisimasaqarpunga.
2 Tamanna Guutip sallusinnaanngitsup naassaanngitsumik inuuneqalernissamik neriuut pillugu qangarsuarli neriorsuutigisaanik tunngaveqarpoq.
3 Guutip, Aniguisitsisitta, peqqusineratigut oqaluussigama oqaatsini piffissarititani nalliummat ilisimaneqalersippai.
4 Illit Tittusi, qitornavittut isigisara uppeqatigisaralu, allaffigaakkit:
Ajunngisaangaarnermik eqqissinermillu Guutimit Ataatamit Aniguisitsisitsinnillu Kristusimit Jiisusimit pisumik kissaappakkit.
5 Kretami qimappakkit ilitsersuinittut aaqqinneqartariaqartunik* isumaginnillutillu illoqarfinni utoqqaanertanngortitsiniassagavit:
6 Utoqqaanertaq isornaatsumik inuussallunilu arnamut ataatsimut uiussaaq. Meerai uppertuussapput nuannaapilunnermik* pikitsitsinermillu unnerluutigineqanngitsut.
7 Guutip pigisaanik nakkutilliisoq isornaatsumik inuussaaq, piumasaannarmisut iliortassanngilaq,* kamajasuujussanngilaq, imerajuttuussanngilaq, nakuusertuussanngilaq,* piumatuujussanngilaq iluanaarniapiluttuussananilu.
8 Kisianni inoroorsaartuussaaq, ajunngitsuliornermik nuannarisaqartuussaaq, isumakkut peqqissuussaaq,* naapertuilluartuussaaq, ilumoorfiginnittuussaaq imminullu aqussinnaassalluni.
9 Ineriartornartumik* ilinniartitsinermigut qiimmassaasinnaallunilu* akerliliisunik oqaaqqissaarisinnaaniassagami ilinniartitseriaatsimini Guutip oqaasianik* tutsuiginartumik aalajangiusimannilluinnassaaq.
10 Amerlaqaammi pikitsitsisut, iluaqutaanngitsumik oqaluttut tammartitsisullu, pingaartumik kipineqarnermik pingaartitsisut akornganni.
11 Iluanaarniapilunniaannarlutik eqqunngitsumik ilinniartitsisarnermikkut illoqatigiikkuutaanik upperunnaarsitsisaramik nipangersinneqartariaqarput.
12 Nunaqqataasa ilaat pruffiitiusoq oqarpoq: “Kretamiut salluliortuaannarput, uumasuupput nujuartat qaasuttut, nerrersoorsuit tarfiinnartut.”
13 Oqaasii ilumoorput. Taamaattumik sukannersumik oqaaqqissaartuartariaqarpatit uppernikkut peqqisseqqullugit
14 juutillu oqaluttualiaannik ilinniartitsissutinillu ilumoortunik tunussisut inassutaannik itigartitseqqullugit.
15 Suut tamarmik inunnut minguitsunut minguitsuupput. Minguttuunulli uppinngitsunullu minguitsoqanngilaq, taakkuami isumaat nalunngeqatiginnissutaallu mingutsinneqarsimammata.
16 Kikkunnut tamanut nalunaarutigisarpaat Guuti ilisarisimallugu. Maajunnartuugamilli, naalanngitsuugamik ajunngitsuliornissamullu piukkunnanngilluinnaramik iliuutsimikkut ersersittarpaat Guuti nalullugu.
Ilanngussat
^ Imalt.: “amigaataasunik”.
^ Imalt.: “imminut aqussinnaannginnermik”.
^ Imalt.: “uteriitsuussanngilaq”.
^ Imalt.: “oqaatsitigut nakuusertuussanngilaq”.
^ Imalt.: “naliliilluarsinnaassuseqassaaq; silassorissuussaaq”.
^ Imalt.: “Peqqissinartumik; Iluaqutaasumik”.
^ Imalt.: “kajumissaarisinnaallunilu”.
^ Imalt.: “tusarliussaanik”.
