باسقارۋشى كەڭەستىڭ حاتى
قۇداي ٴسوزى ٴبىزدى «تالىمگەر بولۋعا» شاقىرادى (ەۆر. 5:12). ويلاپ كورىڭىزشى، بۇل شاقىرۋدى بىزگە عالامداعى ەڭ كەمەڭگەر ۇستاز ەحوبانىڭ ٶزى ايتىپ وتىر! ول وزگە ادامدارعا ٶزى تۋرالى ۇيرەتكەنىمىزدى قالايدى. ەحوبا جايلى شىندىقتى قاي جەردە ۇيرەتپەيىك، مەيلى وتباسىمىزدا، قاۋىمدا يا قىزمەتتە بولسىن، بۇل — باعا جەتپەس مارتەبە ٵرى ۇلكەن جاۋاپكەرشىلىك. وسى ىستە قالاي ورگە باسا الامىز؟
بۇل سۇراقتىڭ جاۋابىن ەلشى پاۋىلدىڭ تىموتەگە جازعان مىنا سوزدەرىنەن تابامىز: «وزگەلەردىڭ الدىندا وقۋدى، ولارعا ناسيحات ايتۋدى، ٴتالىم بەرۋدى بار ىقىلاسىڭمەن جالعاستىرا بەر». سوسىن پاۋىل: «سوندا ٶزىڭدى دە، تىڭداۋشىلارىڭدى دا قۇتقاراسىڭ»،— دەگەن بولاتىن (ٴتىم. 1-ح. 4:13، 16). راسىندا دا، بىزگە ٶمىر ساقتايتىن حاباردى جاريالاۋ تاپسىرىلعان. سوندىقتان وقۋ مەن ٴتالىم بەرۋ قابىلەتىمىزدى شىڭداي تۇسكەنىمىز ماڭىزدى. بۇل كىتاپشا ٴسىزگە وسى ماقساتقا جەتۋگە كومەكتەسەدى. كىتاپشانىڭ كەيبىر ەرەكشەلىكتەرىنە توقتالىپ وتەيىك:
بۇل شارتتى بەلگىدە ٵر تاقىرىپقا جازبا ورنى كەلتىرىلگەن. جازبا ورنىندا ساباقپەن بايلانىستى كيەلى كىتاپ ٴپرينسيپى نەمەسە ساباقتى ورىنداۋدىڭ مىسالى بار.
ەحوبا — «ۇلى تالىمگەر» (يشايا 30:20). بۇل كىتاپشا سىزگە وقۋ مەن ٴتالىم بەرۋ قابىلەتىڭىزدى ۇشتاۋعا كومەكتەسكەنمەن، مىنا جايتتى ەستە ۇستاڭىز: ٴبىز ايتاتىن حاباردىڭ قاينار كوزى ٵرى ادامداردى وزىنە جاقىنداتىپ تارتاتىن — ەحوبا (جوح. 6:44). سول سەبەپتەن ٴجيى كيەلى رۋح سۇراپ دۇعا ەتىڭىز. قۇداي ٴسوزىن مەيلىنشە كوپ قولدانىڭىز. جۇرتتىڭ نازارىن وزىڭىزگە ەمەس، ەحوباعا اۋدارىڭىز. تىڭداۋشىلارىڭىزدىڭ جۇرەگىنە قۇدايعا دەگەن تەرەڭ سۇيىسپەنشىلىك ۇيالاتۋعا كۇش سالىڭىز.
سىزگە ٴمانى وراسان زور حابار تۋرالى ۇيرەتۋ تاپسىرىلعان. ماڭىزدىلىعى جاعىنان بۇعان تەڭ كەلەتىن حابار بۇرىن-سوڭدى بولعان ەمەس. ٴبىز ٴسىزدىڭ «قۇدايدىڭ كۇشىنە سۇيەنە» وتىرىپ، بۇل ىستە ورگە باساتىنىڭىزعا سەنىمدىمىز (پەت. 1-ح. 4:11).
ىزگى نيەتپەن،
تالىمگەر ارىپتەستەرىڭىز — ەحوبا كۋاگەرلەرىنىڭ باسقارۋشى كەڭەسى
