Longuka na Ndinga ya Nzambi

Inki Kele Nsangu ya Mbote na Yina Metala Mabundu?

Disolo yai kepesaka bamvutu na bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Keti mabundu yonso kele ya mbote?

Bantu ya ntima-masonga yina kezolaka kusepedisa Nzambi kele na mabundu mingi. Nzambi kemonaka bantu yina mpi kekudibanza-banzaka sambu na bo. Kansi, yo kele mawa na kumona nde bantu yankaka mesadilaka dibundu sambu na balukanu ya bwimi. Nkutu, na ntangu ya ntama bantwadisi ya mabundu vandaka nyokulaka bambeni na bo. (2 Korinto 4:3, 4; 11:13-15) Bubu yai, bansangu yina baradio, batelevizio, mpi bazulunalu kepesaka kemonisa nde bantwadisi yankaka ya mabundu kesyamisaka mambu ya terorizme, mekotaka na bamvita to meladisaka bana ya fyoti na kingolongolo.​—Tanga Matayo 24:3-5, 11, 12.

Biblia kelongaka nde mabundu kele zole​—dibundu ya kyeleka mpi ya luvunu. Dibundu ya luvunu kelongaka ve kyeleka na yina metala Nzambi. Kansi, Yehowa Nzambi kezolaka nde bantu kuzaba kyeleka na yina metala yandi.​—Tanga 1 Timoteo 2:3-5.

2. Inki kele nsangu ya mbote na yina metala mabundu?

Nzambi kezolaka ve nde bantu kukusama na mabundu yina ketubaka kaka na munoko nde bo kezolaka yandi kansi kelongaka ve kyeleka ya metala yandi. Nkutu, bantu yina kesambilaka na mabundu yina kesepelaka kuvanda banduku ya nsi-ntoto yina Satana Dyabulu keyala. (Yakobo 4:4; 1 Yoane 5:19) Ndinga ya Nzambi ketuba nde mabundu yina kevandaka ya kwikama na baluyalu ya bantu na kisika ya kuvanda ya kwikama na luyalu ya Nzambi kele bonso nkento ya ndumba. Biblia kebingaka nkento yai ya ndumba ‘Babilone ya nene,’ zina ya mbanza ya ntama kisika lusambu ya luvunu yantikaka na nima ya Mvula ya Ngolo ya bilumbu ya Noa. Ntama mingi ve, Nzambi tafwa na kintulumukina mabundu yina kekusaka mpi kenyokulaka bantu.​—Tanga Kusonga 17:1, 2, 5, 17; 18:8, 23, 24.

  3. Inki mutindu Nzambi takotisa kyese na bansi yonso?

Lusambisu yina kekwisa sambu na mabundu ya luvunu kele nsangu ya mbote. Yo takatula bantu ya nsi-ntoto ya mvimba na bampasi. Mabundu ya luvunu takusaka dyaka ve bantu mpi takabulaka bo dyaka ve. Bantu yonso tasamba na bumosi Nzambi mosi kaka ya kyeleka.​—Tanga Yezaya 11:9; Kusonga 18:20, 21; 21:3, 4.

4. Bantu ya ntima-masonga fwete sala nki?

Yehowa mevilaka ve bantu ya ntima-masonga yina kele na mabundu ya luvunu ya nsi-ntoto ya mvimba. Bubu yai, yandi kevukisaka bantu yina na mutindu yandi kelongaka bo kyeleka.​—Tanga Mishe 4:2, 5.

Yehowa keyambaka na kati ya dibuta na yandi bantu yina kezolaka kusadila yandi. Ata banduku na beto mpi bampangi na beto kesepelaka ve ntangu beto keyantikaka kusadila Yehowa, beto kebakaka mambote mingi. Beto kekumaka banduku ya Nzambi, kekumaka ti “dibuta” ya mpa mpi ya zola mpi kivuvu ya luzingu ya mvula na mvula.​—Tanga Marko 10:29, 30; 2 Korinto 6:17, 18.

Sambu na kuzaba mambu mingi, tala kapu 15 mpi 16 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.

[Bangogo ya kemonisa kisina ya foto ya kele na lutiti 26]

The Complete Encyclopedia of Illustration/J. G. Heck