Nani Kele na Kisina ya Mambi?

“MONO pesaka dyabulu mbote ya maboko.” Yai kele bangogo yina mfumu ya basoda ya ONU na Rwanda, kutubaka sambu yandi kukaka ve kubuyisa mvita yina vandaka kusalama na kati ya bantu ya insi yango na mvu 1994. Muntu yankaka yina kumonaka mutindu bo vandaka kufwa bantu na nku yonso kutubaka nde: “Kana muntu ketula kaka ntembe nde Satana kele ve, yandi kwisa sambu beto kwenda kutala dibulu ya nene yina bo zikaka bamvumbi mingi na Rwanda.” Keti mambu yai ya nku kele mpenza bisalu ya Dyabulu?

Bantu mingi kendimaka ve nde, kigangwa mosi ya mbi ya kemonanaka ve muntu kepusaka bantu na kusala mambi. Bamingi keyindulaka nde, bantu kesalaka mambu yina sambu bo kebutukaka ti nkadilu mosi ya mbi mpi kisina ya mambi kele kaka ntima ya mbi yina beto kevandaka ti yo. Bankaka keyindulaka nde, kimvuka mosi ya bantu yina kele ti kimvwama mpi kiyeka, kimvuka mosi yina kesalaka bisalu ya mudidi, ketwadisaka bantu na nsungi ya bamvula mingi sambu bo yala nsi-ntoto. Kansi bantu yankaka ketubaka nde, baluyalu to bamfumu ya bansi na bo kele na kisina ya mambu yonso ya kukonda lunungu mpi bampasi yina bo kemonaka.

Inki nge keyindula? Sambu na nki mambi, mubulu, mpi bampasi mefuluka na nsi-ntoto ya mvimba bubu yai ata bantu kesala bikesa sambu na kumanisa yo? Sambu na nki bantu kekudikotisa na mambu ya mbi, mpi kebuya kuwa balukebisu yina kepesama mbala na mbala? Keti yo kele ti muntu yina kele na kisina ya mambu yina yonso? Nani mpenza keyala nsi-ntoto? Mvutu na bangyufula yai lenda yitukisa nge.