Kele ti Bigangwa ya Kezingaka Kuna Kansi Banani?

Na Eropa, nkento mosi ya mununu kekota na nzo-nzambi ti shapele na maboko, mpi kefukama na luzitu yonso na ntwala ya kiteki ya Maria. Na Afrika, dibuta mosi ketyamuna malafu na mazyamu ya mpangi na bo mosi ya bo vandaka kuzitisa mingi. Na Amerika, leke mosi kebuya madya mpi keyindulula, ti kivuvu nde yandi lenda solula ti kigangwa yina yandi keyindulaka nde yandi kele wanzyo yina ketaninaka yandi. Na Azia, nganga-Nzambi mosi keyoka bima ya bo mesala na bapapie ya kele na mikubu mingi sambu na kupesa dikabu na bampeve ya ba-nkaka.

INKI kima kevukisa bantu yai yonso? Bo yonso kekwikila nde bo lenda solula ti bigangwa ya mayele yina kevandaka na insi ya bampeve mpi yina kele ti makuki ya kuvanda ti bupusi ya ngolo na luzingu ya bantu. Ya kyeleka, dilongi yai kele ve ya mpa mpi yo keyitukisa ve. Kansi, kima ya keyitukisa kele nde kele ti bangindu mingi ya kewakana ve na yina metala bantu yina kezingaka na insi ya bampeve.

Bamizuluma kesambilaka Nzambi mosi ya bo kebingaka Allah. * Bantu ya Kikristu ketubaka nde Nzambi kele Butatu, yina mesalama na Nzambi Tata, Nzambi-Mwana, mpi Nzambi Mpeve Santu. Bahindu kekwikilaka na mafunda ya banzambi mpi ya banzambi-nkento. Bantu yankaka ketubaka nde bampeve kezingaka na kati ya bambisi, banti, matadi, mpi tubamasa yankaka. Kansi bankaka dyaka kevandaka na nsi ya bupusi ya mikanda, bafilme, mpi manaka ya televizio ya ketubilaka bawanzyo mpi bademo, minganzi mpi batebo, banzambi mpi banzambi-nkento.

Kaka mutindu yo kele ti bangindu mingi ya kuswaswana mpi ya kewakana ve na yina metala banzambi mpi banzambi-nkento, yo kele mpi ti bangindu mingi ya kuswaswana mpi ya kewakana ve na yina metala mutindu ya kusolula ti bo. Na kutuba ya kyeleka, ata mutindu mosi ve ya kusolula ti bo lenda vanda ya mbote. Tadila dyambu yai: Na ntwala ya kubinga na telefone, beto fwete zaba muntu yina beto kebinga, beto fwete zikisa nde muntu yango kele muntu ya kyeleka mpi nde yandi tapesa mvutu ntangu beto tabinga yandi. Kumeka na kubinga muntu mosi ya kele ve muntu ya kyeleka tavanda kukonda mfunu. Kansi, kima ya kuluta mbi kele nde kusolula ti muntu ya luvunu lenda vanda kigonsa.

Yo yina, banani kezingaka mpenza na insi ya bampeve? Biblia kepesa ve kaka mvutu na ngyufula yai kansi yo ketendula mpi nani beto fwete solula ti yandi mpi mvutu yina beto lenda baka. Tanga masolo ya melanda, ebuna nge tayituka na kuzaba mambu yina Biblia kemonisa.

[Banoti na Nsi ya Lutiti]