Mutindu Nge Lenda Bakisa Biblia

3. Ndima Lusadisu ya Bankaka

Ntangu Edward John Eyre, muntu ya kesalaka banzyetelo na bisika yina mezabanaka mingi ve, kusalaka nzyetelo ya nda ti ya mpasi na ndambu ya Banseke ya Nullarbor, bankwa-bwala yina kulongaka Eyre mutindu ya kubaka masa na nsi ya mwa bangumba ya zelo mpi na banti ya bo kebingaka eucalyptus. Sambu yandi ndimaka lusadisu ya bantu yina kuzabaka ntoto yina mbote, dyambu yai kugulusaka luzingu ya Eyre na nima.

MUTINDU mbandu yai kemonisa yo, mbala mingi sambu na kununga kulungisa kisalu mosi ya mpasi, yo kelombaka lusadisu ya muntu yina mezaba kisalu yango mbote-mbote. Yo kele mutindu mosi ntangu nge keyantika kutanga Biblia.

Yezu vandaka ve kuvingila nde balongoki na yandi kubakisa Biblia kukonda lusadisu ya bankaka. Kilumbu mosi, “Yesu pesaka bo mabanza ya mbote sambu bo bakisa mambu yina kele na mukanda ya Nzambi.” (Luka 24:45) Yezu kuzabaka nde, batangi ya Biblia kele na mfunu ya lusadisu sambu na kubakisa malongi ya Masonuku.

Lusadisu ya Nani?

Yezu kupesaka balongoki na yandi ya kyeleka mukumba ya kupesa lusadisu yai. Na ntwala ya kumata na zulu, Yezu kupesaka bo ntuma yai: “Yo yina, beno kwenda kukumisa bantu yonso balonguki na mono . . . , beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Kisalu ya ntetentete ya Bakristu kele kulonga, yina kelombaka kutendula mutindu bantu lenda sadila minsiku ya Biblia na luzingu ya konso kilumbu. Bakristu ya kyeleka kesadisaka bankaka na kubakisa Biblia.

Ntangu fyoti na nima ya kupesa balongoki na yandi ntuma yina, dyambu mosi ya kebenda dikebi kusalamaka. Biblia ketubila mfumu mosi ya Etiopia yina vandaka kutanga kitini mosi ya mbikudulu ya Yezaya. Yandi tangaka kitini mosi ya mbikudulu yina yandi bakisaka ve. Na kutadila disolo ya Biblia, verse  yina yandi bakisaka ve ketuba nde: “Yandi vandaka bonso dimeme yina ya bo ke nata na kisika ya bo ke fwaka mameme. Yandi vandaka bonso mwana-dimeme yina ke tuba ve na ntwala ya muntu yina ke zenga yo mika; yandi tubaka kima ve. Bo vwenzaka yandi, bo buyaka mpi na kuzenga mambu na yandi mbote. Nani muntu lenda zabisa nsangu ya bantu yina butukaka na dikanda na yandi? Sambu bantu me fwaka yandi, yandi kele diaka ve awa na nsi-ntoto.”​—Bisalu 8:32, 33; Yezaya 53:7, 8.

Mfumu yina kuyulaka Filipo, Mukristu mosi ya kuyela yina kuzabaka Masonuku mbote nde: “Profete ke tuba mambu yai sambu na nani? Keti yandi ke tuba yo sambu na yandi mosi to sambu na muntu ya nkaka.” (Bisalu 8:34) Muntu ya Etiopia ya ntima-masonga kukwendaka dezia na Yeruzalemi sambu na kusamba, mpi ziku yandi sambaka sambu na kulomba lutwadisu. Ya kyeleka, yandi vandaka kutanga ti mpusa ya ngolo mpi kudikulumusa. Kansi, ata mpidina yandi kukaka ve kubakisa verse yina. Na kudikulumusa  yonso, yandi lombaka lusadisu na Filipo. Ntendula ya Filipo kusepedisaka yandi mingi mpenza na mpila nde yo pusaka yandi na kukuma Mukristu.​—Bisalu 8:35-39.

Bambangi ya Yehowa kelanda kusala kisalu yina Filipo mpi Bakristu yankaka ya ntete kusalaka. Na bansi kuluta 235, Bambangi kesadisaka bantu yankaka na luzolo yonso na kubakisa mambu yina Biblia kelongaka mpenza. Bo kesalaka yo na kulongukaka bantu-dyambu ya masonuku, metode yina kelombaka kulonguka mambu yina Biblia ketuba na yina metala ntu-dyambu to disolo mosi ya sikisiki. a​—Tala lupangu  “Bamvutu ya Mbote na Bangyufula ya Biblia.”

“Mu Bakaka Bamvutu na Bangyufula na Mu Yonso”

Steven, Valvanera, mpi Jo-Anne, yina beto tubilaka na disolo ya ntete, kuyantikaka kulonguka Biblia ti Bambangi ya Yehowa. Steven ketuba nde: “Yo vandaka kuyitukisa mu na kumona nde kana mu fwanisa minsiku to masolo mingi ya Masonuku, mbala mingi mvutu vandaka kumonana kaka na kati ya Biblia. Na ntwala nde mu longuka Biblia ti Bambangi ya Yehowa, ata muntu mosi ve kusongaka mu mutindu ya kusala yo. Yo pesaka mu kyese na kuzaba nde yo kelombaka ve nde kulonguka Biblia kuvanda kutulana bantembe ya kukonda nsuka mpi kuswana sambu na bangindu yina kewakana ve.”

Valvanera kendima dyambu yina. Yandi ketuba nde: “Mambu yonso ya mu longukaka kuvandaka na ndonga. Yo vandaka ya kyeleka sambu mu vandaka kubaka ntendula ya mbote sambu na konso kima, kansi ve kaka sambu ‘Dibundu’ ketubaka mpidina.” Jo-Anne ketuba nde: “Sambu mu bakaka bamvutu na bangyfula na mu yonso na nsadisa ya Biblia, yo pusaka mu na kumonisa luzitu ya nene na Munkwa na yo, sambu yandi vandaka ti mayele ya kusonika na Biblia mvutu ya mefwana na konso ngyufula yina muntu lenda yula.”

Keti nge mezaba Mbangi ya Yehowa mosi? Sambu na nki ve kulomba yandi na kusonga nge mutindu manaka ya kulonguka yina kesalamaka? Kana nge mezaba ve ata Mbangi ya Yehowa mosi, nge lenda sonika na mosi ya baadresi yina kele na lutiti 2 ya zulunalu yai. Ti lusadisu ya mpeve santu ya Nzambi, mabanza ya mbote, mpi lusadisu ya longi mosi ya mbote ya Biblia, Ndinga ya Nzambi tavanda ve mukanda mosi ya mpasi sambu nge bakisa yo. Nge lenda bakisa Biblia!

[Noti na nsi ya lutiti]

[Lupangu/​Kifwanisu ya kele na lutiti 8]

 Bamvutu ya Mbote na Bangyufula ya Biblia

Mwa bantu-dyambu yina Bambangi ya Yehowa ketadilaka na manaka na bo ya kulonguka Biblia:

• Lukanu ya Nzambi sambu na ntoto kele inki?

• Bafwa kele na wapi?

• Keti beto kezinga na “bilumbu ya nsuka”?

• Sambu na nki Nzambi mepesaka nzila na bampasi?

• Inki nge lenda sala sambu na kuvanda ti luzingu ya dibuta ya kyese?

[Bifwanisu ya kele na lutiti 7]

Sambu na kubakisa Biblia . . . samba sambu na kulomba mpeve ya Nzambi, tanga yo ti mabanza ya mbote, mpi ndima lusadisu ya bankaka