Keti Nge Lenda Kwenda Penepene na Nzambi Yina Kemonanaka Ve?

Nge lenda yula nde: ‘Inki mutindu mono lenda sala kinduku ya ngolo ti muntu ya mono lenda mona ve?’ Ngyufula yai lenda monana bonso ngyufula mosi ya mayele. Kansi tala mambu yai:

KETI kumona na meso kele mfunu mingi sambu na kusala kinduku ya zola mpi yina tazinga ntangu ya nda? Keti mambu ya kyeleka kansi ya kemonanaka ve kele mfunu kiteso mosi ve, to nkutu yo meluta mfunu? Yo kele mutindu yina mpenza! Sambu na kikuma yai, bantu mingi mesalaka kinduku ya ngolo ti bantu yankaka na nzila ya mikanda yina bo kekudisonikilaka mbala na mbala. Ebuna mikanda na bo ya masonga kemonisaka mambu ya bo kezolaka, ya bo kezolaka ve, balukanu na bo, minsiku ya bo kelandaka, kusala mwa nsaka, mpi bikalulu ya kimuntu na bo to ya mambu yina bo kezolaka.

Bifwa-meso mpi kemonisaka nde kumona na meso kele ve mfunu mingi sambu na kusala kinduku ya ngolo ti muntu yankaka. Baka mbandu ya bankwelani yai zole Edward ti Gwen yina kele bifwa-meso. * Edward kukutanaka ti Gwen na nzo-nkanda mosi ya bifwa-meso, kisika Gwen vandaka kulonguka na nzo-nkanda ya bambuta. Yandi sepelaka na bikalulu ya Gwen, mingimingi masonga na yandi na kutuba mpi na bikalulu, mpi bangindu na yandi ya mbote sambu na kisalu. Ebuna kima kubendaka Gwen na Edward vandaka, mutindu yandi mosi kutubaka, “yandi vandaka kumonisa bikalulu yonso yina mono yelaka na yo yina mono ndimaka nde yo kele mfunu.” Bo kumaka banduku, ebuna na nima ya bamvula tatu bo kwelanaka.

Edward ketuba nde: “Kana beno kezinga kisika mosi, kukonda kumona lenda kangisa beno ve na kusala kinduku ti muntu yankaka. Beno levanda beno kemonana ve, kansi mawi kele meso ya kufwa ve.” Bamvula 57 meluta bubu yai, bo kezolanaka kaka ngolo. Bo ketendula nde kinsweki ya kinduku na bo ya ngolo kelombaka ntetentete mambu yai iya: (1) kumona bikalulu ya mbote ya muntu yango, (2) kuyindula yo mpi kubika nde bikalulu yina kubenda nge, (3) kusolula mbote ntangu yonso ti yandi, mpi (4) kusala mambu kumosi.

Mambu iya yai kele mfunu mingi sambu na konso kinduku ya mbote, yo vanda na kati ya banduku, na kati ya bankwelani to, kuluta nkutu, na kati ya bantu ti Nzambi.

[Noti na nsi ya lutiti]