ΣISA iberreḥ yerna yesselmed lɣaci telt snin d nnefṣ. Tura yeẓra belli tewweḍ-ed taggara n tudert-is ɣef lqaεa. Lεulama n ddin n Iyahudiyen mcawaṛen akken a t-nɣen, lameεna ugaden a d-yekker wegdud imi i geḥseb Σisa d nnbi. Yuɣ lḥal, m’akken iḍerru wayagi meṛṛa, Cciṭan idemmer Yudas n Qeryut yellan d yiwen si 12 n yemceggεen n Σisa akken a t-ixdeε. Lεulama n ddin msewwaqen d Yudas a s-fken 30 iṣurdiyen n lfeṭṭa.

Iḍ aneggaru uqbel lmut-is, Σisa yennejmaε neţţa d yemceggεen-is akken ad εeggden Lεid n Usuref. Issufeɣ Yudas, mbeεd yesbedd yiwen uεegged ajdid yeţţusemman Imensi n Wesmekti (neɣ Imensi n Ssid). Iddem-ed aɣrum, yedεa ɣer Ṛebbi yerna yesεedda-t ger ifassen n 11 n yemceggεen i d-iqqimen. Yenna: “Aɣṛum-agi d lǧeţţa-w ara fkeɣ fell-awen [...]. Sya d asawen xeddmet akkagi akken ad iyi-d-teţmektayem.” Iddem-ed tabuqalt n ccṛab, yexdem akken yexdem d weɣrum-nni, mbeεd issefhem-asen: “Tabuqalt-agi, d leεqed ajdid s idammen-iw ara yazzlen fell-awen.”—Luqa 22:19, 20.

Deg yiḍ-agi aneggaru, Σisa yesεa aṭas n leḥwayeǧ ara yini i yemceggεen-is. Ifka-yasen lameṛ ajdid: ad myeḥmalen wway gar-asen mebla ma nudan ɣef nnfeε-nsen. Yenna-yasen: “Ma temyeḥmalem wway gar-awen, lɣaci meṛṛa a kkun-εeqlen belli d inelmaden-iw i tellam.” (Yuḥenna 13:34, 35) Inha-ten diɣen akken ur ţţaǧǧan ara tidyanin iṣeεben, ara d-yasen, ad cebblent ulawen-nsen. Idεa ɣer Ṛebbi fell-asen seg wul-is meṛṛa. Γer taggara, Σisa d yemceggεen-is ḥemden Ṛebbi s ccnawi, dɣa ffɣen deg yiḍ-nni.

Di tmazirt n Jitsimani, Σisa yeɣli ɣef tgecrar, yeẓẓull s lǧehd. Cwiṭ n lweqt umbeεd, usan-d izumal n lɣaci s leslaḥ, gar-asen iεsekṛiwen d lmuqeddmin, akken a t-ḥebsen. Yudas iqerreb ɣer Σisa, yessuden-it akken ad εeqlen wid i d-yeddan yid-es belli d neţţa i d Σisa. Mi t-urzen yeεsekṛiwen, imceggεen-is rewlen.

Deg wexxam ameqran n ccṛeε, Σisa yenna-d belli d Mmi-s n Ṛebbi i gella. Wid i t-icuṛεen ḥesben belli yekfeṛ yerna yuklal lmut. Wwin-t ihi zdat n uneḥkam Bunṭus Bilaṭus. Γas ur s-d-issukkes acemma, ifka-t i lɣaci-nni i gebɣan lmut-is.

Umbeεd, wwin Σisa ɣer tiɣilt n Gulguṭa anda i t-semmṛen yeεsekṛiwen n Ṛuma ɣef tgejdit (wejgu). S lbeṛhan, yeɣli-d ṭṭlam ɣef tmurt deg uzal qayli. Mi gεedda ciṭ n lweqt di tmeddit-nni, Σisa yemmut, dɣa twet zzelzla annect-ila-ţ. Umbeεd, rran lǧeţţa-s deg uẓekka yeɣzen di lɣar. Azekka-nni ṣṣbeḥ, lmuqeddmin ɣelqen lɣar-nni yerna sbedden iεessasen zdat-es. Σisa, ad yeqqim deg uẓekka? Ala. Atan akken kan ara yeḍru lbeṛhan werǧin neḍri di ddunit.

—Ayagi yers ɣef Matta ixef wis 26 d wis 27; Marqus ixef wis 14 d wis 15; Luqa ixef wis 22 d wis 23; Yuḥenna ixef wis 12 alamma d wis 19.