Nama Kebuah Saksi-Saksi Jehovah Enda Ngintu Krismas?

TEBAH

Runding ti salah ke dikembuan mayuh orang

Penemu ti Salah : Kebuah Saksi-Saksi Jehovah enda ngintu Krismas laban sida enda pechayaka Jesus.

Kebendar: Kami orang Kristian. Kami pechaya penyelamat nya datai ari Jesus Kristus.—Kereja Rasul 4:12.

Penemu ti Salah: Kita mechaka ruang bilik ketegal ngajar raban kita enda ngintu Krismas.

Kebendar: Kami amat beberatka diri sebililk, enggau kami ngena ajar Bup Kudus kena ngeringka kaul diri sebilik.

Penemu ti Salah: Nuan lenyau pengelantang ati ke datai ari gerah jari, pemaik, sereta kaul enggau pangan diri maya ngintu Krismas.

Kebendar: Kami diperansang gerah ati enggau ngereja pemaik ninting hari. (Jaku Dalam 11:25; Rome 12:18) Chunto iya, chara kitai ngatur gempuru enggau nginjil sejalai enggau ajar Jesus “Kita udah nerima ngena chara pechuma, nya alai beri ngena chara pechuma.” (Matthew 10:8) Nambahka agi, kami pechaya Perintah Petara ulih mai pengadang pasal pemaik ba dunya.—Matthew 10:7.

Nama Kebuah Saksi-Saksi Jehovah Enda Ngintu Krismas?

Jesus ngasuh kitai ngingatka pemati iya ukai pengada iya.—Luke 22:19, 20.
Rasul enggau nembiak Jesus kelia menya nadai ngintu Krismas. The New Catholic Encyclopedia madahka “pengawa Krismas diintu kena 243 Masihi,” lebih ari sebad pengudah sida rasul mati.
Nadai penerang nunjukka Jesus ada kena 25 Disember; hari pengada iya enda ditulis dalam Bup Kudus.
Kami pechaya hari pengerami Krismas nya ukai ari Petara laban nya datai ari adat enggau pengawa orang ke enda arapka Petara.—2 Korint 6:17.

Nama Kebuah ngaga Krismas nya nyadi pekara ti besai?

Agi mayuh orang Kristian ngintu Krismas taja pan udah nemu tu datai ari adat orang ke enda arapka Petara sereta nadai penerang ari Bup Kudus. Engka sekeda orang nanya: Nama kebuah orang Kristian enda ngereja utai ti tebilang? Nama kebuah nya nyadi penanggul?

Bup Kudus meransang kitai berunding kediri empu, kena “nya meh jalai kitai patut nyembah Iya” (Rome 12:1, 2) Nya ngajar kitai pemendar. (John 4:23, 24) Nya alai, ari ke beratika pasal runding orang bukai pasal kitai, kena meh prinsip Bup Kudus taja pan kitai engka enda tebilang.

Taja pan kitai enda ngintu Krismas, tang kitai bebasaka tiap iku orang ke ngaga pemutus kediri empu ba pekara tu. Kitai enda masuk champur dalam pengawa pengerami Krismas.