Penemu ti salah: Kebuah Saksi-Saksi Jehovah enda ngintu Easter laban sida ukai orang Kristian.

 Kebendar: Kami pechaya Jesus Kristus nya penyelamat kami lalu kami deka “nitihka singkang iya.”—1 Peter 2:21; Luke 2:11.

 Penemu ti salah: Kita enda pechaya Jesus nya diangkatka ari pemati.

 Kebendar: Kami pechayaka pengangkat Jesus ari pemati; kami nyadika nya pengering ngagai pengarap enggau ngasuh kami ransing ba pengawa nginjil.—1 Korint 15:3, 4, 12-15.

 Penemu ti salah: Nuan enda ngira anak nuan lenyau pengaga ati ketegal enda ngintu Easter.

 Kebendar: Kami rinduka anak kami—kami selalu begulai enggau sida sereta ngagaka ati sida.—Titus 2:4.

•   Pengerami Easter enda nitihka ajar Bup Kudus.

•   Jesus ngasuh kitai ngingatka pemati iya, ukai pengangkat iya ari mati. Kami nyambut Malam Ngingatka Pemati Jesus tu ninting taun nitihka kalender Bup Kudus.—Luke 22:19, 20.

•   Kami pechaya pengerami Easter datai ari ngintu pengawa peridi jeman kelia, tu enda diterima Petara. Petara deka kitai meri “sembah siti aja,” lalu iya enda nerima chara sembah ke bukai.—Pemansut 20:5; 1 Raja 18:21.

 Kami pechaya pemutus ke digaga kami, iya nya enda enggau nyambut pengerami Easter nitihka ajar Bup Kudus, ke meransang kitai ngena penemu dalam ari ke nitihka adat mensia. (Jaku Dalam 3:21; Matthew 15:3) Taja pan kami bekunsika pengarap kami pasal pengerami Easter lebuh ditanya, kami mega bebasaka pemutus ke digaga orang bukai.—1 Peter 3:15.