Terus ngagai penerang

Saksi-Saksi Jehovah

Pilih bansa jaku Iban

“Aku Enggau Naka Ulih Gawa ke Jehovah”

“Aku Enggau Naka Ulih Gawa ke Jehovah”

Irma diau ba menua Jerman. Umur iya nyau deka 90 taun. Pengudah balat labuh dua kali sereta beberapa kali beputung, Irma diatu enda ulih agi nginjil ari rumah ke rumah baka selama. Iya diatu bejaku enggau orang bukai pasal pengarap iya nengah surat ke ditulis iya ngagai kaban belayan enggau orang ke dikelala iya. Orang amat rinduka surat Irma ke ngundan jaku peransang sereta ngelantangka ati sida ke udah lenyau orang ti dikesayau. Lalu, ketegal nya, orang suah talipaun ngagai iya, nanya pasal kemaya surat ke nangkanka nya deka datai. Irma mega nerima mayuh surat ke madahka terima kasih ngagai pengawa iya, lalu ngasuh iya nulis baru ngagai sida. Ku iya madahka: “Semua tu ngasuh aku gaga ati laban aku ulih terus nginjil.”

Irma mega nganjung surat ngagai mayuh orang ke tuai. Ku iya madahka: “Seiku indu ti tuai talipaun ngagai aku lalu madahka, surat aku udah meri iya mayuh pengelantang pengudah laki iya nadai. Iya nyimpan surat aku ba Bup Kudus iya lalu suah macha nya lebuh lemai hari. Seiku indu ke bukai, ke baru udah mati laki madahka, surat aku nulung iya lebih agi ari cheramah ari paderi. Indu nya bisi mayuh utai ke deka ditemu lalu nanya sekalika iya ulih datai ngelawa aku.”

Seiku orang ti dikelala Irma ke ukai Saksi Jehovah, pindah ngagai siti endur ti jauh. Lalu, iya ngasuh Irma nulis surat ngagai iya. Ku Irma madahka: “Indu nya nyimpan semua surat aku. Pengudah iya nadai, anak indu iya talipaun ngagai aku. Iya madahka diri udah macha semua surat ke ditulis aku ngagai indai iya lalu nanya sekalika aku ulih nulis surat ke ngundan penemu Bup Kudus ngagai iya mega.”

Irma amat gaga ati ngereja pengawa nginjil iya. Irma madahka: “Aku minta ngagai Jehovah ngambika meri aku pengering ke dikena gawa ke Iya. Aku enda ulih nginjil ari rumah ke rumah diatu. Tang, aku deka enggau naka ulih gawa ke Jehovah.”