Kati nuan ngasaika diri patut bejimat agi ba belanja ketegal penanggul ekonomi? Penanggul ba ekonomi ulih nyadi enggau enda disadang ketegal penyakit berampit, pengerusak alam, penyarut ba politik, sereta perang. Enti belanja nuan majak kurang, nya tentu ngasuh nuan stres. Tang, Bup Kudus bisi ajar ti ulih dikereja nuan ngambika bejimat ba belanja.

 Prinsip Bup Kudus: “Aku nemu reti asai suntuk, lalu aku mega nemu reti asai mayuh utai.”—Pilipi 4:12.

 Taja pan diatu nuan engka kurang belanja, tang nuan ulih nelebaka diri enggau ubah ke baru tu. Enti kita sebilik jampat nerima ubah ke benung nyadi, kurang agi kita berasai stres.

 Uji pansik, kati nuan bulih bantu ari perintah tauka sesiti gerempung ke meri bantu? Enti au, pinta meh enggau lengkas laban kesuah iya bantu tu bisi tatak tauka ba sesiti timpuh aja.

 Prinsip Bup Kudus: “Enti nuan nadai bulih jaku lalau, pengawa nuan deka puntan.”—Jaku Dalam 15:22.

 Uji kerandauka penanggul tu enggau kaling pengidup sereta anak nuan. Enti kita bisi randau ba diri sebilik, semua orang ba ruang bilik nuan nemu utai ke nyadi, lalu ulih nyukung pangan diri. Enti semua orang nemu bejimat, duit ke dikembuan nuan ulih dikena enggau chara ti betul.

 Prinsip Bup Kudus: “Ngira ungkus.”—Luke 14:28.

 Lebuh napi pengurang ba belanja, nuan patut nemu kini ke penunga duit nya. Kesatu, tuliska penyampau gaji ke diulih nuan dalam sebulan. Udahnya, tuliska penyampau ke dikena nuan kena bebelika barang dalam sebulan. Tuliska dulu semua ungkus nya, taja pan legi engka bisi ubah baru. Uji engkah kediri duit ke patut disimpan ti dikena ba maya ke enda disadang.

 Chara: Lebuh nuan meresa belanja, itung mega belanja ke dikena nuan ba utai ke enda amat beguna. Pengudah nambah semua penyampau nya, nuan engka tekenyit meda ungkus iya. Chunto iya, pengudah seiku lelaki ngira semua ungkus ke dikena iya, baru meh iya nemu diri udah ngabiska mayuh duit meli chewing gum.

 Prinsip Bup Kudus: “Nemu milih utai ti pemadu badas.”—Pilipi 1:10.

 Bandingka gaji enggau belanja nuan. Udah nya, tentuka ni bagi utai ke patut dikenuluka nuan, ngambika duit ke dikembuan nya ulih dikena ba utai ti patut. Peratika sekeda chunto tu:

•   Perengka pengangkut. Enti nuan bisi lebih ari siti perengka pengangkut, kati ulih nuan nyual siti ari nya? Enti perengka pengangkut nuan nya mar, ulih nuan nganti nya enggau ke murah agi? Tauka, kati ulih nuan ngena perengka pengangkut awam?

•   Pemerindang. Kati ulih nuan ngetu ngena Astro tauka streaming enda lama? Tauka, kati ulih nuan ngiga chara pemerindang ke enda mar?

•   Bil api ai. Kerandauka ba ruang bilik nuan chara ngurangka bil ai enggau api. Taja pan pengawa madamka api tauka ngurangka penyampau ai nya baka ke mit, tang iya ke amat nya pan ulih ngelimat duit.

•   Pemakai. Ari ke suah makai ba restoran, uji meh manduk pemakai ba rumah. Tentuka nama utai ke deka dipanduk nuan, lalu beli utai ke diguna. Udah nya, panduk meh enggau penyampau ti chukup. Gaga lis utai ke deka dibeli, ngambika nuan enda meli utai sengapa. Beli meh buah tauka sayur ke nitihka musin, laban maya tu rega iya murah agi. Seliahka pemakai ti enda manah ke pengerai. Uji nanam sayur kediri empu ba rumah.

•   Gari. Pisin ba dunya enda ulih tunda. Beli meh gari enti nuan ngasaika nya patut. Anti meh maya bisi diskaun tauka ulih meli gari ba bundle tang agi manah dikena. Ari ke ngena dryer, jembi meh gari nuan. Tu ulih ngelimatka bil api.

•   Utai baru. Sebedau meli sesiti utai, tanya diri empu, ‘Kati aku chukup duit meli tu? Kati aku amat begunaka nya?’ Kati ulih nuan enda beguai deka meli sesiti utai, perengka elektronik tauka perengka pengangkut ti baru? Tang, ulihka nuan nyual utai ke enda diguna nuan agi? Enggau chara tu, nuan ulih ngurangka barang nuan ba rumah, lalu bulih mimit duit ari nya.

 Chara: Enti belanja nuan enda disadang kurang agi ari selama, tu meh maya iya nuan ngetu ari ulah ti enda manah. Baka masau mayuh duit, nginsap, bejudi, tauka mabuk. Enggau tu, belanja sereta pengidup nuan lebih teratur.

 Prinsip Bup Kudus: “Gaga ati meh sida ke nemu diri begunaka iring ari Petara.”—Matthew 5:3.

 Bup Kudus ngembuan lalau ti manah tu: Penemu-dalam deka ngasuh nuan likun. Nya meh penguntung bisi penemu. (Pengajar 7:12) Penemu-dalam tu bisi dalam Bup Kudus. Mayuh orang ke udah nitihka lalau tu, ngasaika penguntung iya, lalu enda kelalu irau pasal duit.—Matthew 6:31, 32.