Ninting taun, seraban orang ke gawa penuh jam ke Petara ti datai ari serata dunya, dikangauka ngagai Sekula Gilead, ke diatur ba Watchtower Educational Center di Patterson, New York. a Ba sekula tu, bala pemelajar dilatih ngambika landik agi bejalaika pengawa sida ke diberi gerempung Jehovah. Latih ke diberi tu, nulung sida negapka menyadi ba eklisia sereta pampang opis ba serata dunya.

 Bala pemelajar Gilead datai ari mayuh bengkah menua. Chunto iya, kena taun 2019, bisi 56 iku pemelajar datai ari 29 bengkah menua enggau kelas Gilead ke-147. Bala pemelajar Gilead tu udah kala gawa penuh jam ba mayuh macham pengawa baka gawa ba Betel, tuai ti ngabas, pengerintis seberai tasik tauka pengerintis spesial.

 Sebedau kelas tu belabuh, mayuh pengawa ke patut diperambu. Chunto, ba begian ke ngatur pejalai tauka World Headquarters Travel Department (WHQ Travel), patut meli tiket bilun ke semua pemelajar ke dikangauka nya. Ke kelas-147, ungkus seiku pemelajar pulai mansang kira-kira $1,075 dolar (tauka RM4,380). Pia mega, bala pemelajar ke datai ari Pulau Solomon patut nepan bilun 4 kali baru meh ulih datai ngagai Patterson. Lalu maya sida pulai, sida patut nepan bilun 3 kali. Penyauh pejalai ke patut ditunjah sida kira-kira 35.400 kilometer, lalu ungkus pejalai sida nyauka $2,300 dolar (tauka RM9,371.30) ke seiku pemelajar. Ketegal tu, ngambika ungkus nya ulih dkurangka mimit, begian ke ngatur pejalai ngena program komputer ngambi bulih tiket ke murah agi. Nyadi, taja pan tiket nya udah kena booking, program komputer nya ulih meresa, sekalika bisi tiket ti murah agi dalam beberapa minggu tauka beberapa bulan pengudah nya. Begian ke ngatur pejalai mega ngena poin enti bisi, tauka kredit pejalai maya meli tiket.

 Mayuh ari pemelajar mega begunaka visa kena tama ngagai Amerika Serikat. Nya kebuah, Opis Undang-Undang ba Indu Opis nulung sida ngulihka visa. Tiap iku pemelajar, ungkus visa sida nyengkaum maya sida ngerejister nyauka $510 dolar (tauka RM2,077.85).

 Nama pemanah ke diasaika kitai ari bala menyadi ke dilatih nengah sekula tu? Bisi sepasang laki bini ke pansut ari Sekula Gilead dianjung ngagai siti eklisia ba Indonesia. Menyadi Hendra Gunawan, seiku tuai gempuru ba eklisia nya madah, ‘Suba, nadai pengerintis biasa ba eklisia kami. Tang, pengudah seduai iya datai, pengeransing sereta ati ti sanggup gawa mayuh agi ba seduai iya mega meransang menyadi bukai. Asil iya, beberapa iku ari menyadi ba eklisia kami berengkah ngerintis. Nyentukka, bisi seiku menyadi indu enggau Sekula Penginjil Perintah Petara!’

 Menyadi Sergio Panjaitan gawa begulai enggau pemelajar Gilead ba Betel, di pampang opis Indonesia. Iya madah, ‘Latih ke diterima sida ukai semina berekat ke sida. Kami mega ulih ngasaika berekat nya! Mayuh utai ke udah dipelajarka sida, tang sida enda ngayanka diri nemu, lalu enda rangka bekunsika penemu. Tu amat meransang kami, lalu kami mega deka meransang ke bukai.’

 Baka ni ungkus sekula tu dipelanja? Ari duit pemeri ke datai ba serata dunya. Mayuh chara duit pemeri diberi, tauka nengah donate.jw.org. Besai terima kasih ngagai semua bala menyadi ke meri enggau gerah jari, lalu nyukung sekula tu.