Kereja Ajih Jesus—Nama Utai ke Ulih Dipelajarka Nuan?

LEBUH Bup Kudus nyebut pasal kereja ajih Jesus, bisi tiga iti leka jaku Gerika ke suah agi dikena. Siti ari nya dyʹna·mis, leka jaku dy’na·mis mai reti “kuasa.” (Luke 8:46) Leka jaku Gerika tu mega ulih mai reti “pengelandik.” (Matthew 25:15) Nitihka seiku pakar, leka jaku Gerika tu “dikena nunjukka pengawa ti ngalitka ati ke digaga ngena kuasa ti besai. Pengawa tu digaga nengah kuasa Petara.”

Leka jaku Gerika teʹras ke suah iya disalin ngagai “kereja ti nyelai”. (John 4:48; Surat Kereja Rasul 2:19) Leka jaku tu dituju ngagai empas ari kereja ajih nya ngagai orang ke meda. Kesuah iya, orang mayuh balat alit ati lebuh meda kereja ajih ke digaga Jesus.—Mark 2:12; 4:41; 6:51; Luke 9:43.

Siti agi leka jaku Gerika se·meiʹon dikena nunjukka kereja ajih Jesus nya siti “tanda.” Seiku pakar ke benama Robert Deffinbaugh madahka: “Leka jaku nya dituju ke ngagai reti ti dalam agi pasal kebuah pengawa ajih nya digaga.” Ku iya agi: “Tanda ke ditunjukka nengah kereja ajih nya madahka pemendar pasal Tuan Jesus.”

Pengawa Silap Mata tauka Kuasa Ari Petara?

Bup Kudus nadai madahka kereja ajih ke digaga Jesus nya pengawa silap mata ke digaga kena merindang ati orang. Tang Bup Kudus madahka, kereja ajih nya nunjukka ‘pemesai kuasa Petara.’ Tu ulih dipeda enggau terang lebuh Jesus muru roh ti jai ari seiku nembiak lelaki. (Luke 9:37-43) Tentu Petara Jehovah ti Pemadu Tinggi ke bisi “kuasa ti amat besai” ulih ngereja utai ti ngalitka ati tu. (Isaiah 40:26)

Dalam Bup Kudus, bup Matthew, Mark, Luke enggau John nyebut kira-kira 35 iti kereja ajih Jesus. Tang Bup Kudus nadai madah ke kitai penyampau kereja ajih ke digaga Jesus lebuh iya ba dunya. Ambika chunto, ba bup Matthew 14:14, Bup Kudus nadai madahka penyampau orang sakit ke digeraika. Tang ayat nya madahka: ‘[Jesus] meda mayuh amat orang, lalu iya sinu ati ke sida, lalu ngeraika sida ke sakit.’

Pengawa ti ngalitka ati tu enggau terang nunjukka Jesus nya Anak Petara enggau Messiah ke disemaya. Bup Kudus mega nunjukka kuasa Petara nya meh ke ngasuh Jesus ulih ngereja pengawa ajih. Rasul Peter madahka, Jesus ‘dikirumka Petara.’ Ku iya agi, ‘utai tu nyata ari kereja ajih, enggau kereja ti nyelai ti dikereja Petara, ulih Jesus, ba bala kita. Kita empu nemu utai tu, laban utai tu nyadi ba bala kita.’ (Surat Kereja Rasul 2:22) Bisi sekali, Peter madahka: ‘Petara ke nata Jesus orang Nasaret ngena Roh Kudus enggau kuasa, pasal Jesus ke bejalai ngagai mayuh bengkah endur ngereja pengawa ti manah, lalu ngeraika semua orang ke dirasuk antu, laban Petara bisi enggau Iya.’—Surat Kereja Rasul 10:37, 38.

Kereja ajih Jesus mega bisi kaul ti rapat enggau utai ti diajar iya. Ba Mark 1:21-27, kitai ulih meda chara orang nerima lebuh sida ninga ajar ari Jesus sereta meda kereja ajih ke digaga iya. Mark 1:22 madahka, sida ‘alit ati ninga ajar iya.’ Ba ayat 27 orang mayuh “balat alit ati” lebuh meda Jesus muru roh ti jai. Endang amat kereja ajih enggau ajar ari Jesus enggau terang nunjukka iya Messiah ke dipilih Petara.

Nya alai, lebuh sekeda orang kakang ati pasal sapa Jesus kebendar iya, Jesus ulih nyaut enggau andal: ‘Saksi aku besai agi ari saksi John [Pemaptisa]. Pengawa ti udah diasuh Apai tembuka aku, iya nya pengawa ti dikereja aku diatu, besaksi ngarika aku nunjukka Apai udah ngirumka aku.’—John 5:36.

Bukti ke Nunjukka Kereja Ajih Jesus Amat Nyadi

Nama kebuah kitai ulih andal kereja ajih Jesus amat nyadi? Aram kitai beratika sekeda pekara tu.

Lebuh ngaga kereja ajih, Jesus enda mai mulia ngagai diri empu. Iya seruran meri puji sereta mulia ngagai Petara. Ambika chunto, sebedau ngeraika seiku lelaki ti buta, Jesus madahka lelaki nya deka digeraika ‘ngambika kereja Petara dipandangka ba iya.’—John 9:1-3; 11:1-4.

Jesus ukai orang ke ngereja silap mata tauka ngereja pengawa magik. Iya nadai kala ngena sihir, jampi, silap mata, pukau tauka pengawa ti besai ke nadai reti. Iya mega enda ngena sebarang utai, tanda, tauka adat pengarap pelesu. Tang peratika baka ni Jesus ngeraika dua iku lelaki ke buta. Bup Kudus madahka “Jesus sinu ati ke seduai iya. Iya negu mata seduai iya, lalu tekala nya seduai iya ulih meda. Seduai iya lalu nitihka Jesus.” (Matthew 20:29-34) Iya enda ibuh ngereja sebarang pengawa ti nyelai, semua nya dikereja iya enggau mudah ba mua mayuh saksi. Tu enda sama enggau pengawa ngerai ti nyelai tauka kereja ajih kemayaharitu. Kemayuh agi ari pengawa tu engka begunaka perengka spesial ke udah disediaka, lalu bisi sekeda nya patut digaga ngena chara belalai.—Mark 5:24-29; Luke 7:11-15.

Bisi maya nya, Jesus muji pengarap orang ke digeraika iya. Tang kereja ajih Jesus enda bepanggai ba pengarap seseiku orang. Ambika chunto, lebuh iya di Kapernaum ba Galili, ‘mayuh orang ke dirasuk antu dibai ngagai Jesus, lalu iya muru roh antu ngena seleka aja jaku, lalu ngeraika semua sida ke sakit.’—Matthew 8:16.

Tuju Jesus ngaga kereja ajih nya kena nulung orang, ukai kena merindang ati sida. (Mark 10:46-52; Luke 23:8) Jesus mega enda ngaga kereja ajih ke penguntung iya tauka kena ngiga pengaya.—Matthew 4:2-4; 10:8.

Baka Ni enggau Utai ke Ditulis ba Bup Matthew, Mark, Luke enggau John?

Cherita pasal kereja ajih Jesus ditulis ba bup Matthew, Mark, Luke enggau John. Ulih kitai pechayaka iya? Nama bukti ke ulih ngasuh kitai andal agi? Aram kitai mansik utai tu.

Baka ke dipadah tadi, kereja ajih Jesus digaga ba mua mayuh saksi. Maya pun bup pasal kereja ajih Jesus ditulis, mayuh ari saksi ke meda pengawa nya agi idup. Bup The Miracles and the Resurrection madahka: “Kitai enda ulih nuduh penulis bup Matthew, Mark, Luke enggau John benung ngaga cherita pasal kereja ajih ketegal deka ngerembaika pengarap sida. . . . Sida semina deka nulis utai ke nyadi enggau lurus.”

Orang Judah ke ngelaban Jesus nadai kala nyakal kereja ajih ke digaga Jesus. Sida semina nyakal kuasa ke dikena iya ngaga kereja ajih. (Mark 3:22-26) Indah pengudah maya nya, nadai orang ulih nyakal sekalika kereja ajih ke digaga Jesus amat nyadi. Tang bisi penerang ba abad keterubah enggau ke-2 Masihi ti ngamatka jaku pasal Jesus ke udah ngaga mayuh kereja ajih. Amat, cherita ba Bup Kudus pasal kereja ajih Jesus endang ulih dipechaya.

Lelaki ke Ngaga Kereja Ajih Tu

Kelimpah ari nemu pasal kereja ajih Jesus, kitai mega deka nemu mayuh agi pasal pemanah iya. Bup Kudus suah ngambarka Jesus nya orang ke bisi penyinu, penyiru sereta ibuhka orang bukai.

Ambika chunto, lebuh seiku orang ke sakit lan datai semak ngagai Jesus lalu minta ngambika digeraika, Bup Kudus madahka, Jesus “sinu ke iya,” udah nya Jesus ngunjurka jari iya, negu lelaki nya lalu bejaku: “Aku deka. Tuchi meh nuan!” Lelaki nya gerai tekala nya. (Mark 1:40-42) Jesus ukai semina ngena kuasa Petara ngaga kereja ajih, tang iya mega ngereja nya enggau penyinu sereta penyiru.

Siti agi chunto ke nunjukka pemanah Jesus iya nya, lebuh anak seiku indu balu ari Nain mati. Ketegal anak lelaki nya anak tunggal indu balu nya, Jesus “sinu ati” lalu madah ngagai indu nya, “Anang nyabak.” Udah nya, Jesus ngidupka baru anak lelaki nya.—Luke 7:11-15.

Cherita pasal kereja ajih Jesus amat negu ati enda pia? Jesus deka nulung orang laban iya berasai “sinu ati” ngagai sida. Bup Kudus madahka: “Jesus Kristus enda berubah kemari, seharitu enggau ke belama iya.” (Hebrew 13:8) Jesus ke nyadi Raja ba serega besedia deka ngena kuasa Petara enggau chara ti besai agi. Amat, kereja ajih ke dibacha kitai ukai semina sejarah aja. Jemah ila, iya deka ngaga kereja ajih ba serata dunya ngambika ulih ngeraika semua mensia ti ngasi. Saksi-Saksi Jehovah amat gaga ati ulih nulung nuan belajar mayuh agi pasal semaya ke jemah ila ti manah tu.

[Gambar]

Kereja ajih Jesus nunjukka ‘pemesai kuasa Petara’

[Gambar]

Jesus bisi penyinu