1. Nama teladan ti udah ditetapka Jesus ngagai bala murid iya, lalu nama digaga sida? (Peda gambar ba mua majalah.)

JESUS ngembuan runding ti positif lebuh iya nginjil ba dunya. Iya mega deka bala murid iya ngereja utai ti sama. (Jhn. 4:35, 36) Lebuh Jesus bisi enggau bala murid iya, sida ransing ba pengawa nginjil. (Luk. 10:1, 5-11, 17) Tang, lebuh Jesus ditangkap sereta dibunuh, bala murid lenyau pengeran deka nginjil enda lama. (Jhn. 16:32) Pengudah Jesus diangkatka idup baru, iya meransang sida terus ngereja pengawa nginjil. Lalu pengudah iya niki ke serega, sida nginjil enggau ransing nyentukka bala munsuh madah: “Kita udah ngisi Jerusalem ngena ajar kita.”—SKR. 5:28.

2. Baka ni Jehovah udah merekatka pengawa nginjil?

² Jesus ngiring pengawa nginjil orang Kristian ba abad keterubah, lalu Jehovah merekatka pengawa sida. Ambika chunto, kena Pentikos 33 Masihi, kira 3,000 iku orang dibaptisa. (SKR. 2:41) Lalu penyampau murid Kristus majak nambah-menambah. (SKR. 6:7) Taja pia, Jesus madahka ba hari ti penudi, mayuh agi orang deka nerima Berita Manah.—Jhn. 14:12; SKR. 1:8.

3-4. Nama kebuah pengawa nginjil tusah dikereja ba sekeda menua, lalu nama deka dipejuraika kitai ba artikel tu?

³ Mayuh ari kitai enggau naka ulih ngembuan runding ti positif pasal pengawa nginjil. Ba sekeda menua, tu senang  dikereja. Nama kebuah? Laban bisi mayuh orang ke beminat deka belajarka Bup Kudus, lalu sekeda ari sida patut nganti nyentukka bisi Saksi ulih belajar enggau sida! Tang ba sekeda menua, bala penginjil ngasaika tusah deka ngereja pengawa nginjil. Tu ketegal mayuh orang nadai ba rumah. Lalu enti sema bisi orang ba rumah, sida engka nadai minat pasal Bup Kudus.

⁴ Enti nuan napi penanggul ke baka nya ba endur nuan nginjil, artikel tu ulih nulung nuan. Kitai deka bejuraika, utai ke udah digaga sekeda menyadi ngambika ulih ngiga mayuh agi orang ba pengawa nginjil sereta kebuah kitai ulih terus nginjil enda ngira orang ninga tauka enda.

5. Nama penanggul ke ditapi bala Saksi?

⁵ Mayuh Saksi ngasaika tusah deka betemu enggau orang ba rumah. Sekeda penginjil diau ba endur ke bisi mayuh apartmen tauka kawasan perumahan ti dijaga enggau terit. Ketegal nya, sida tusah deka nginjil laban sekuriti engka enda ngemendarka sida tama enti nadai pemendar. Penginjil ke bukai engka enda napi penanggul ke baka tu. Sida ulih nginjil ari rumah ke rumah, tang engka tusah deka betemu enggau orang. Bisi mega nginjil ba menua pesisir ke mimit aja orang diau. Sida engka patut bejalai jauh ngambika ulih ngiga seiku orang, tang orang nya engka nadai ba rumah! Enti nuan napi penanggul ke baka tu, terus meh nginjil. Baka ni nuan ulih mutarka penanggul tu lalu nginjil ngagai mayuh agi orang?

6. Nama kebuah penginjil tau disemaka baka orang berikan?

⁶ Jesus nyemaka pengawa nginjil enggau pengawa berikan. (Mrk. 1:17) Sekeda orang berikan engka pansut beberapa hari tang nadai bulih ikan. Taja pia sida enda asa ati. Sida ngubah maya, endur, tauka chara nangkap ikan ngambika bulih mayuh agi ikan. Kitai mega ulih ngaga ubah ti sama ba pengawa nginjil. Diatu kitai deka berandauka sekeda chara ke ulih digaga kitai.

7. Nama asil iya enti kitai nginjil ba maya ti bukai?

⁷ Uji nginjil ba maya bukai. Kitai tentu ulih tetemuka orang enti kitai nginjil ba maya sida bisi ba rumah. Mayuh bala menyadi Kristian ngasaika manah agi nginjil ba maya ngalih hari tauka lemai laban maya nya sida ulih tetemuka orang. Pia mega, orang ke bempu rumah engka senang agi enggau berandau maya nya. Tauka nuan mega ulih nitihka chara ke dipadah seiku tuai gempuru ke benama David. Iya madahka pengudah nginjil sejam tauka dua jam, iya enggau kaling nginjil iya pulai baru ngagai rumah orang ke enda nyaut terubah kali. Iya madah: “Aku tekenyit laban mayuh orang ke bempu rumah bisi ba rumah maya kami datai baru kali kedua.” *

8. Baka ni kitai ulih nitihka Pengajar 11:6 ba pengawa nginjil?

⁸ Kitai enggau naka ulih ngiga orang ba rumah. Ayat tema ba artikel tu ngingatka kitai pasal runding ke patut dikembuan kitai. (Bacha Pengajar 11:6 ari nota kaki.) * David, ke disebut sebedau tu, terus nginjil. Bisi sekali, iya betemu enggau seiku orang ke bempu rumah pengudah beberapa kali  nguji ngiga orang nya. Lelaki nya beminat berandauka Bup Kudus lalu madah: “Aku udah lapan taun diau ditu, tang aku nadai kala betemu enggau Saksi-Saksi Jehovah.” David madah: “Aku nyau sedar enti kitai ulih betemu enggau orang ke bempu rumah, sida selalu iya ninga pesan ke dibai kitai.”

9. Baka ni sekeda penginjil ulih ngiga orang ke nadai ba rumah?

⁹ Uji nginjil ba endur bukai. Ngambika ulih ngiga orang ke nadai ba rumah, sekeda penginjil nukar endur sida nginjil. Ambika chunto, sida nginjil ba endur orang mayuh tauka ngena troli litaricha. Tu chara ti mujur ngambika ulih betemu enggau orang ke diau ba apartmen, alai pengawa nginjil enda dikemendarka. Ketegal nya bala Saksi ulih betemu enggau sida. Pia mega, mayuh orang deka agi bejaku tauka nerima litaricha kitai enti sida ba taman, makit sereta endur bedagang. Floiran, seiku tuai ti ngabas di Bolivia madahka: “Kami ngagai makit sereta endur bedagang ba urung 1 ngagai 3 ngalih hari, lebuh orang ke bejual enda entu kisuk. Maya nya, suah agi kami ulih berandau enggau manah, indah ulih ngepunka pengawa belajarka Bup Kudus.”

10. Nama agi chara ke ulih digaga nuan maya nginjil?

¹⁰ Uji nginjil ngena chara bukai. Kala nuan bebendar deka ngiga orang ba rumah, tang bedau ga tetemuka orang nya? Kati bisi chara bukai ulih nginjil ngagai iya? Katarína madah: “Aku nulis surat kena bekunsika utai ari Bup Kudus ngagai orang ke nadai ba rumah.” Nama ulih dipelajarka kitai?  Uji meh ngena mayuh macham chara lebuh nginjil kediri.

11. Nama kebuah sekeda orang enggai nerima pesan ke dibai kitai?

¹¹ Sekeda orang enggai ninga pesan ke dibai kitai. Sida ngumbai diri enda ibuh nemu pasal Petara tauka Bup Kudus. Sida enda arapka Petara laban sida meda mayuh pemerinsa nyadi ba dunya. Sida enda beminat pasal Bup Kudus laban sida meda tuai pengarap enda nitihka utai ke diajar. Sekeda berunding pasal kereja, diri sebilik, tauka penanggul ke ditapi, lalu ngasaika Bup Kudus enda ulih nulung sida. Baka ni kitai ulih ngetanka pengaga ati taja pan orang enggai nerima pesan ke dibai kitai?

12. Baka ni nitihka Pilipi 2:4 nulung kitai ba pengawa nginjil?

¹² Nunjukka diri ibuhka orang. Mayuh orang ke enggai ninga Berita Manah ke dibai kitai engka berubah lebuh sida meda kitai ibuhka sida. (Bacha Pilipi 2:4.) Ambika chunto, David, ke disebut tadi madahka: “Enti orang madahka diri enda beminat, kitai ulih ngelengkaka Bup Kudus tauka litaricha kitai lalu nanya, ‘Ulih aku nemu nama kebuah nuan ngasaika nya?’” Orang ulih ngasaika enti kitai ibuhka sida. Sida engka enda ingat utai ke disebut kitai, tang sida deka ingatka chara kitai ibuhka sida. Indah enti orang ke bempu rumah enda meri kitai peluang bejaku, kitai ulih nunjukka diri ibuhka sida nengah ulah enggau mua kitai.

13. Baka ni kitai ulih narit minat orang ke bempu rumah?

¹³ Baka ni kitai ulih ngayanka pengibuh? Chara iya, sedia ngubah pesan kitai nitihka utai ke diguna sereta minat orang ke bempu rumah. Ambika chunto, kati bisi utai ti nunjukka orang ke bempu rumah nya bisi anak mit? Apai indai engka beminat ba jaku lalau Bup Kudus bekaul enggau ngemesaika anak tauka chara ruang bilik tau lantang. Kati bisi mayuh kerepau ba pintu sida? Kitai engka ulih bejaku pasal jenayah sereta baka ni nya ngasuh orang berasai takut. Sida engka gaga ati enti sida nemu jenayah deka nadai agi. Tiap kali nuan tetemuka orang ke deka ninga, uji nulung sida meretika baka ni jaku lalau Bup Kudus ulih nulung sida. Katarína, ke disebut tadi madah: “Aku ngingatka diri baka ni pemendar udah ngasuh pengidup aku manah agi.” Asil iya, Katarína ulih nginjil enggau ransing.

14. Nitihka Jaku Dalam 27:17, baka ni kaling nginjil ulih nulung pangan diri?

¹⁴ Minta tulung ari menyadi bukai. Ba abad  keterubah, Paul ngajar Timoti chara nginjil sereta ngajar, lalu iya meransang Timoti nulung orang ngena chara ti sama. (1 Kor. 4:17) Baka Timoti, kitai mega ulih belajar ari menyadi ke bepeneleba ba eklisia. (Bacha Jaku Dalam 27:17.) Peratika peneleba seiku menyadi lelaki ke benama Shawn. Iya kala ngerintis ba menua pesisir lalu orang ba endur nya puas ati enggau jalai pengarap sida. Baka ni iya mengkang gaga ati? Ku iya: “Aku nguji nginjil enggau seiku menyadi. Lebuh kami mansang ngagai siti-siti rumah, kami ngena awak nya ngemanahka agi pengelandik kami ba pengawa nginjil. Ambika chunto, kami berandauka utai ke disebut orang ke bempu rumah lalu baka ni kami ulih nyaut iya. Udah nya kami berandauka baka ni kami ulih ngena saut ke bukai enti sema bisi orang ke bempu rumah nanya utai ti sama.”

15. Nama kebuah sampi beguna ba pengawa nginjil?

¹⁵ Besampi ngagai Jehovah minta tulung. Tiap kali nuan ba pengawa nginjil, minta meh iring ari Jehovah. Kitai begunaka roh kudus Iya ngambika ulih mujur ba semua pengawa. (Mas. 127:1; Luk. 11:13) Lebuh nuan besampi ngagai Jehovah, padahka peminta nuan enggau silik. Ambika chunto, minta Iya ngiring nuan ngagai orang ke deka belajar pasal Iya lalu sedia deka mending. Udah nya, nuan patut ngereja utai sejalai enggau sampi nuan, iya nya nginjil ngagai semua orang ke ditemu nuan.

16. Nama kebuah belajarka Bup Kudus kediri empu amat beguna ba pengawa nginjil?

¹⁶ Tetapka awak belajarka Bup Kudus kediri empu. Jaku Petara madah: “Mansik Bup Kudus tiap hari keran deka nemu enti jaku nya amat tauka enda.” (SKR. 17:11) Lebuh kitai belajar, kitai ulih ngelala Petara enggau manah. Lalu lebuh kitai bejaku pasal Iya ngagai orang bukai, sida ulih meda kitai amat andal enggau utai ke disebut kitai. Katarína, ke disebut sebedau tu madah: “Aku nyau sedar aku patut negapka pengarap aku bekaul enggau sekeda batang ajar Bup Kudus. Nya alai aku belajar enggau dalam agi utai ke nunjukka bisi Penempa, Bup Kudus nya amat Jaku Petara, sereta Petara bisi gerempung ti ngarika Iya kemayaharitu.” Katarína madahka lebuh iya belajarka Bup Kudus kediri empu, tu negapka pengarap iya lalu nulung iya bisi pengaga ati ba pengawa nginjil.

17. Nama kebuah Jesus mengkang positif ba pengawa nginjil?

¹⁷ Jesus mengkang positif lalu terus nginjil, taja pan sekeda orang enggai ningaka pesan ke dibai iya. Nama kebuah? Laban iya nemu orang begunaka pemendar, lalu iya deka nulung sida. Iya mega nemu sekeda orang engka enggai ninga terubah iya, tang udah nya sida deka nerima. Tu meh utai ke nyadi ba ruang bilik iya. Maya iya nginjil pengelama tiga taun setengah, nadai seiku pan menyadi lelaki iya ke nyadi murid iya. (Jhn. 7:5) Tang, pengudah iya diangkatka idup baru, sida nyadi orang Kristian.—SKR. 1:14.

18. Nama kebuah kitai terus nginjil?

¹⁸ Kitai enda nemu sapa ke deka nerima pemendar Bup Kudus. Sekeda orang engka begunaka mayuh agi awak ari orang bukai sebedau sida deka belajarka pemendar. Indah orang ke enggai ningaka kitai, ulih meda ulah kitai ti manah sereta runding kitai ti positif, lalu tu nulung sida “muji Petara.”—1 Pet. 2:12.

19. Nitihka 1 Korint 3:6, 7, nama ditemu kitai pasal pengawa nginjil?

 ¹⁹ Taja pan kitai nanam sereta manjah, kitai patut ingat Jehovah ke ngasuh utai nya tumbuh. (Bacha 1 Korint 3:6, 7.) Seiku menyadi lelaki ari Etiopia madahka: “Lebih ari 20 taun, semina aku aja Saksi ke nginjil ba endur aku diau. Tang diatu udah bisi 14 iku penginjil. Tiga belas iku ari sida dibaptisa, nyengkaum bini enggau tiga iku anak aku. Kami bisi kira-kira 32 iku orang datai begempuru.” Menyadi tu gaga ati laban iya terus nginjil lalu nganti enggau sabar Jehovah mai orang ngagai gerempung Iya!—Jhn. 6:44.

20. Nama kebuah kitai tau disemaka baka tim penyelamat?

²⁰ Jehovah ngumbai semua nyawa mensia amat berega. Iya meri kitai peluang gawa enggau Anak Iya, ngempuruka orang ari semua bansa sebedau pengujung dunya tu datai. (Hag. 2:7) Pengawa nginjil kitai tau disemaka baka nyelamatka orang. Kitai baka tim penyelamat ke dianjung nyelamatka orang ari bot ke karam. Taja pan semina beberapa iku aja ari kitai ke ulih tetemuka orang, semua orang ba tim penyelamat bisi pengawa ti beguna. Pia mega enggau pengawa nginjil kitai. Kitai enda nemu berapa iku orang deka diselamatka ari dunya Sitan. Tang Jehovah ulih ngena sapa-sapa aja ari kitai nulung sida. Andreas ke diau di Bolivia madahka: “Aku sedar, lebuh seiku orang belajarka pemendar sereta dibaptisa, tu ketegal bala menyadi gawa begulai nulung iya.” Aram meh kitai ngembuan runding ti positif ngagai pengawa nginjil. Enti kitai ngereja nya, Jehovah deka merekatka kitai lalu kitai deka lantang ati ba pengawa nginjil.