Terus ngagai penerang

Terus ngagai Ripih Isi

CHERITA PENGIDUP

Kami Duai Ngasaika Pengasih Petara dalam Mayuh Chara

Kami Duai Ngasaika Pengasih Petara dalam Mayuh Chara

LEBUH agi biak, apai aku, Arthur, ke rinduka Petara deka nyadi paderi ba gerija Methodist. Tang iya ngubah runding iya pengudah macha sekeda litaricha ari Nembiak Bup Kudus, lalu berengkah begulai enggau sida. Ba taun 1914, lebuh apai aku beumur 17 taun, iya dibaptisa. Maya Perang Dunya I, iya diasuh enggau nyadi soldadu, tang iya enggai. Nya alai, iya diletak ukum jil sepuluh bulan ba Rumah Jil Kingston di Ontario, Kanada. Pengudah dilepaska ari rumah jil, iya nyadi colporteur tauka pengerintis.

Ba taun 1926, apai aku jadi enggau Hazel Wilkinson. Indai Hazel udah belajarka pemendar ba taun 1908. Aku ada kena 24 April 1931, anak kedua ari empat iku diri menyadi. Apai aku rindu sereta bebasaka Bup Kudus, lalu iya ngajar kami ngereja utai ti sama. Nyembah Jehovah nya utai ti pemadu beguna ba pengidup kami. Kami sebilik enggau tetap nginjil ari rumah ke rumah.—Kereja Rasul 20:20.

SAMA BAKA APAI, AKU MENGKANG NEUTRAL SERETA NYADI PENGERINTIS

Ba taun 1939, Perang Dunya II berengkah. Taun siti, pengawa Saksi-Saksi Jehovah di Kanada ditagang. Nembiak sekula patut nabi bendira sereta belagu lagu menua dalam bilik kelas sida. Kesuah iya, bala pengajar ngemendarka aku enggau menyadi indu aku, Dorothy, pansut ari bilik kelas lebuh pengawa nya dipejalaika. Tang bisi sekali, pengajar aku nguji ngemaluka aku enggau ngumbai aku tu penakut. Pengudah sekula, beberapa iku bala ke sama kelas nyerang aku. Tu ngasuh aku keran agi deka ‘ngasika Petara, ukai ngasika mensia.’—Kereja Rasul 5:29.

Kena Julai 1942, lebuh umur aku 11 taun, aku dibaptisa dalam tanki ai ba ladang jelu tupi. Aku rindu nyadi pengerintis maya chuti lebuh maya kemisi sekula. Diatu pengawa tu dikumbai nyadi pengerintis sukung. Bisi ba siti taun, aku ulih enggau tiga iku menyadi Kristian lelaki ke bukai nginjil ngagai orang ke gawa numbangka kayu ba Ontario utara.

Kena 1 Mei 1949, aku berengkah nyadi pengerintis tetap. Aku udah nya dikangau nulung nirika bengunan ba pampang opis Kanada, lalu udah nya nyadi seiku ari ruang bilik Betel di Kanada. Aku diasuh gawa ba endur nyelak, alai aku belajarka chara bejalaika mesin chelak flatbed. Aku agi ingat, aku gawa sepemanjai malam beberapa minggu ngambika ulih nulung nyelak surat mit pasal nembiak Jehovah ke diperinsa di Kanada.

Udah nya, aku gawa ba Opis Pengawa Nginjil. Aku diasuh interbiu bala pengerintis ke deka dianjung gawa ke Jehovah ba Quebec, alai bala Saksi ke balat diperinsa. Seiku ari bala pengerintis nya Mary Zazula ari Edmonton, Alberta. Apai indai iya, raban Gerija Ortodoks. Lebuh Mary enggau menyadi lelaki iya ke tuai enggai badu belajarka Bup Kudus, apai indai muru seduai iya ari rumah. Mary enggau menyadi iya dibaptisa kena Jun 1951, enam bulan udah nya seduai iya berengkah nyadi pengerintis. Maya interbiu Mary, aku ulih beratika iya rindu amat ke Jehovah. Ba runding aku, aku deka indu ke baka nya nyadika bini aku. Sembilan bulan udah nya, kami duai jadi—kena 30 Januari 1954. Seminggu pengudah kami duai jadi, kami duai dikangauka belatih bejalaika pengawa ba pelilih. Lalu udah nya, kami duai bejalaika pengawa ba pelilih Ontario utara pengelama dua taun.

Seraya pengawa nginjil mansang di serata dunya, majak mayuh bala pengerintis seberai tasik diguna. Aku enggau Mary berunding, enti kami duai ulih tan enggau musin chelap sereta bala nyamuk maya musin panas di Kanada, kami duai ulih gawa ke Jehovah ba dini-dini endur. Kami duai enggau kelas ke-27 Sekula Gilead lalu tembu belajar kena Julai 1956. Kena November, kami duai bisi pengawa ti baru—Brazil.

PENGAWA NYADI PENGERINTIS SEBERAI TASIK DI BRAZIL

Lebuh datai di Brazil, kami duai berengkah belajarka jaku Portuguese. Terubah iya, kami duai belajarka chara ti senang kena ngepunka randau. Udah nya, kami duai ngingatka chara nyadung majalah ke pandak. Nangkan ke nya, kami duai enggau nginjil lalu betemu enggau seiku indu ke rindu enggau pesan ke dibai kami duai. Kami duai udah mutuska, enti orang ke bempu rumah nunjukka minat, kami duai deka macha siti ayat ke bekaul enggau pengidup di baruh Perintah Petara. Nya alai aku macha Pemandang 21:3, 4—lalu udah nya aku luput! Aku enda teleba enggau hari ti angat sereta mekum. Gaya hari ke angat terus nyadi penanggul ba aku.

Kami duai nyadi pengerintis ba nengeri Campos. Kemaya hari tu, dia bisi 15 iti eklisia! Tang lebuh kami datai, ba nengeri nya semina bisi siti raban ke mit sereta sebuah rumah ke pengerintis seberai tasik ke alai empat iku menyadi Kristian indu diau: Esther Tracy, Ramona Bauer, Luiza Schwarz, sereta Lorraine Brookes (diatu dikumbai Wallen). Pengawa aku ba rumah sida, iya nya nulung nuchi gari sereta ngiga kayu api dikena berapi. Bisi sekali kena malam Hari Satu, pengudah kami belajarka Watchtower, Mary belelak ba atas sofa lalu bepanggalka kusyen. Kami berandau pasal pengawa ke dikereja kami sehari nya. Lebuh Mary angkat, seiku ular pansut ari baruh kusyen nya! Temuai ti enda disadang tu ngasuh kami begau nyentukka aku munuh iya.

Pengudah setaun belajarka jaku Portuguese, kami duai berengkah bejalaika pengawa ba pelilih. Kami duai gawa ba endur ti nadai elektrik. Kami duai tinduk ba atas tikai lalu mindah ngena kuda enggau kerita kuda. Bisi sekali kami ngena kerita api ngagai sebuah pasar ke ba atas bukit ngambika kami ulih nginjil ba endur ke jauh. Kami nyewa siti bilik dia. Pampang opis ngirumka 800 iti majalah ke dikena nginjil dia. Kami duai suah ngagai pos opis ngambi kutak majalah nya.

Ba taun 1962, Sekula Bup Kudus ke Menyadi ti Dipilih udah diatur ba mayuh endur di serata Brazil. Pengelama enam bulan, aku diasuh mupuk kediri empu ngagai tiap iti sekula nya. Aku ngajar kelas ba Manaus, Belém, Fortaleza, Recife, sereta Salvador. Lebuh aku ba Manaus, aku ngatur siti konvensyen pelilih menua ba sebuah panggung ti tebilang. Ketegal ujan bangat, ai irup ke beresi enda mayuh, lalu kami nadai endur ke manah alai bala menyadi Kristian makai maya konvensyen nya. Aku bejaku enggau seiku pegawai soldadu lalu madahka penanggul kami. Iya enggau manah ati ngatur nyediaka chukup ai irup ti beresi ngagai kami sepemanjai konvensyen nya. Iya mega nganjung bala soldadu nirika dua buah langkau kain ti besai, ke nyadi dapur sereta alai kami makai.

Maya aku ke mindah nya, Mary nginjil ba endur palan bedagang, lalu nadai orang ke deka berandau pasal Bup Kudus. Orang ke dia datai ari Portugal ke Brazil, bekereja ngiga duit. Mary berasai enda diperansang lalu ku iya madah ngagai sekeda pangan iya, “Endur ti penudi ke deka alai aku diau nya Portugal.” Tang enda lama udah nya, kami duai nerima siti surat. Kami duai diasuh gawa ke Jehovah di Portugal, endur alai pengawa nginjil kitai ditagang. Mary tekenyit! Tang kami duai nerima pengawa nya lalu pindah ke Portugal.

PENGAWA KAMI DUAI DI PORTUGAL

Kami duai datai ba Lisbon, Portugal, kena Ogos 1964. Polis resia ba nengeri nya balat ngenusahka pengidup bala menyadi Kristian kitai. Nya alai, endang manah kami duai enda ngiga bala Saksi ba endur nya dulu. Terubah iya, kami duai nyewa bilik. Pengudah kami duai bulih visa, kami duai nyewa apartmen. Lima bulan udah nya, kami duai ulih betemu enggau bala menyadi Kristian ba pampang opis. Kami duai balat gaga ati laban nyau ulih datai begempuru!

Ketegal pengawa kami ditagang, Palan Gempuru ditutup, lalu pengawa begempuru diatur ba rumah bala menyadi Kristian. Rumah sida seruran diserungkai polis. Beratus iku bala menyadi Kristian lelaki enggau indu dibai ke balai polis lalu ditasat polis. Polis ngemediska sida, lalu nguji ngansak sida madahka nama bala menyadi Kristian lelaki ke ngiring sida. Nya alai, kena nyaga pangan diri, bala menyadi Kristian ngetu ngena nama peturun tang semina ngena nama diri empu.

Kami duai lantang ati enggau utai manah ke dikereja kami duai lebih 60 taun gawa ke Jehovah

Juluk ati kami iya nya nentuka bala menyadi Kristian mengkang bulih litaricha ke ulih nulung sida tan. Mary naip artikel Watchtower ke dikena belajar, sereta litaricha bukai ngena sebengkah keretas ke manah. Udah nya, keretas nya digaga nyadi stensil ngambika ulih nyelak mayuh litaricha ke bala menyadi Kristian.

NGETANKA BERITA MANAH BA KOT

Kena Jun 1966, siti kes kot ti besai diputarka ba Lisbon. Ke semua 49 iku raban ari Eklisia Feijó dituduh ngulu pengawa begempuru ke enda dikemendarka ba rumah orang. Kena nyikap sida napi pechara nya, aku ngelulu diri nyadi luyar ke nguji nunjukka bala menyadi Kristian nya salah. Tang baka ke disadang, kami amat alah. Ke semua 49 iku bala menyadi Kristian lelaki enggau indu dijil magang, pengelama 45 hari ngagai lima setengah bulan. Tang pengawa nya ngenataika puji ngagai Jehovah. Amat, maya pechara, luyar kami indah ngambi leka jaku Gamaliel ari Bup Kudus. (Kereja Rasul 5:33-39) Pengudah nya, surat kabar ngeluarka berita pasal pechara nya. Kami balat gaga ati lebuh luyar kami berengkah belajarka Bup Kudus enggau kami sereta datai begempuru.

Kena Disember 1966, aku diberi pengawa nyadi tuai ti ngemataka pampang opis, lalu ngena mayuh jam mutarka pekara ke bekaul enggau undang-undang. Kami enggau naka ulih ngena undang-undang madahka kebuah Saksi-Saksi Jehovah patut nyembah Petara enggau bibas di Portugal. (Pilipi 1:7) Pengujung iya, kena 18 Disember 1974, pengarap kami dikemendarka. Menyadi Nathan Knorr enggau Frederick Franz ke datai ari indu opis sama bekunsika pengaga nya enggau kami. Kami seruran ingatka pengawa begempuru ba Oporto enggau Lisbon ke alai 46,870 iku orang datai.

Jehovah mega ngasuh pengawa nginjil dikerembaika ba pulau-pulau ke bisi orang ngena jaku Portuguese, baka Azores, Cape Verde, Madeira, enggau São Tomé and Príncipe. Seraya penyampau bala Saksi ba endur tu nambah, kami begunaka pampang opis ti besai. Pengudah pampang opis nya tembu didirika, Menyadi Milton Henschel meri cheramah nyerahka pampang opis nya kena 23 April 1988. Bisi 45,522 iku bala menyadi Kristian ke datai, nyengkaum 20 iku orang ke udah nyadi pengerintis seberai tasik di Portugal, datai ngagai pengawa nyerahka pampang opis nya.

KAMI DUAI BELAJAR ARI TELADAN BALA MENYADI KRISTIAN KE TETAP ATI

Sepengelama gawa ke Jehovah, aku enggau Mary amat rindu belajar ari bala menyadi Kristian ke tetap ati. Ngambika chunto, lebuh aku gawa enggau Menyadi Theodore Jaracz maya ngelawa zon, aku belajarka utai ti beguna. Pampang opis ke dilawa kami duai napi penanggul ti besai, lalu Komiti Pampang Opis udah enggau naka ulih mutarka penanggul nya. Sida berasai kechewa laban enda ulih mutarka pekara nya. Nya alai Menyadi Jaracz ngelantangka ati sida enggau nyebut: “Diatu, awakka roh kudus mutarka penanggul nya.” Aku mega seruran ingatka utai ke dipadah Menyadi Franz betaun menya lebuh aku enggau Mary ngelawa Brooklyn. Raban kami minta jaku ajar ari iya, lalu ku iya: “Pesan aku: Mengkang enggau gerempung Jehovah ke ulih dipeda enda ngira tusah tauka senang. Semina gerempung tu ke bejalaika pengawa ti diasuh Jesus kereja bala murid iya—nusui berita manah pasal Perintah Petara!”

Ngereja tu ngasuh aku enggau Mary lantang amat ati. Kami duai mega bisi kenang ti berega ba pengawa ngelawa zon nyentuk ngagai semua pampang opis di serata dunya. Kami duai betemu enggau semua nembiak Jehovah enda ngira umur sida, sereta meransang sida enggau madahka pengawa sida ke Jehovah nya beguna bendar. Kami duai seruran meransang sida terus gawa ke Iya.

Diatu kami duai beumur urung 80 taun. Mary bisi mayuh macham penanggul ba pengerai. (2 Korint 12:9) Lalu kami duai bisi penanggul ke bukai. Tang penanggul tu ngeringka pengarap kami duai sereta ngasuh kami duai keran agi ngetanka penetap ati ngagai Jehovah. Lebuh ngenang pengelama kami duai gawa ke Jehovah, kami duai nemu Iya udah merekatka kami duai enggau pengasih Iya dalam mayuh chara. *—Peda nota kaki.

^ per. 29 Lebuh artikel tu disediaka, Douglas Guest mati enggau tetap ati ke Jehovah kena 25 Oktober 2015.