BA MAYUH menua, jenayah nya endang bahaya ke seruran bisi. Ngambika chunto, ba siti menua seiku akim madahka: “Utai ti ngesalka ati nya, ukai engka, tang kemaya nuan ulih nyadi mansa.” Ba sekeda endur, jenayah engka enda kelalu balat. Taja pia, anang meh kitai enda bejimat laban nya ulih ngasuh kitai senang agi nyadi mansa jenayah.

Enda ngira sekalika nuan diau ba endur ke balat jenayah tauka kurang jenayah, baka ni nuan ulih nentuka nuan enggau orang ke dikesayauka nuan likun? Siti utai ke ulih dipelajarka nuan ari Bup Kudus nya, “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya.” (Jaku-Dalam 22:3) Endang amat, piak polis ngasuh kitai berundingka chara-chara nyaga diri—nyeliahka jenayah sebedau nya nyadi.

Jenayah ukai semina ngenataika pengerugi ba reta tengkira, tang mayuh mansa mega merinsa ba mental enggau emosi dalam timpuh ti panjai. Endang beguna kitai ngereja utai ke ulih digaga kitai ngambika ulih berasai likun! Lebuh beratika tuju nya, peratika utai ke ulih digaga nuan kena ngelindung diri ari empat bengkah jenayah—dirumpak, diserang ba seksual, jenayah siber, enggau dichuri ba penerang.

Nama nya? Ngerumpak, siti chara ngenchuri enggau chara mejal sereta ganas.

Nama asil tu ngagai orang? Pengudah beberapa rumpakan besenyata ke nyadi ba Britain, seiku penawa berati, taja pan mansa nadai bakal, tang semua sida merinsa ba mental. Ku iya madah, “Mayuh ari sida balat irau sereta tusah tinduk, lalu nyauka semua sida madahka, pengawa ke dikereja sida ninting hari enda ulih digaga enggau manah ketegal peneleba nya.”

Nama ulih digaga nuan?

• Bejimat. Perumpak nemu ngambi ulih. Sida rindu ngiga mansa ke lemi. Nyadi bejimat meh enggau orang ke selalu beratika nuan, bejimat enggau utai ti ngelingi nuan, lalu anang meh numpulka fokus nuan ketegal balat ngirup ai bisa tauka makai dadah. Nitihka health encyclopedia, “Lebuh seseiku orang mabuk tauka makai dadah, tusah agi ba iya deka berunding enggau manah pasal bahaya ke deka nyadi.”

• Jaga meh reta nuan. Tentuka kerita tauka motosikal, pintu enggau jenila rumah nuan dikunchi. Anang ngasuh orang ke enda dikelala nuan tama. Simpan barang ke berega ba endur ke enda ulih dipeda. Jaku-Dalam 11:2 madahka, “Enti nuan nemu ngemaruhka diri, nuan bepenemu-dalam.” Bala anak mit mega nemu ngenchuri—suah iya, orang ke nyadi mansa sida, orang ke rindu bekenaka perengka emas sereta perengka elektronik ti mar.

• Minta jaku lalau. “Orang ke beli seruran ngumbai diri ngena, tang orang ke pintar, mendingka jaku lalau.” (Jaku-Dalam 12:15) Enti nuan raun, dingaka meh jaku lalau ari orang ke ulih dipechaya nyengkaum piak ti bekuasa. Sida ulih madahka nuan endur ke patut diseliahka, sereta chara nuan nyaga diri nyengkaum barang nuan.

Nama nya? Diserang ba seksual ukai semina dirugul aja. Tang tu nyengkaum diugut, dipejal tauka dikenakutka

Nama asil tu ngagai orang? Seiku mansa rugul madahka, “Utai ke ngenusahka ati, kesan tu ukai ba maya nya aja. Tang tu ulih nyadi ba timpuh ti lama lalu ngachau runding kitai pasal pengidup. Tu mega ngubah pengidup orang ke dikesayauka kitai.” Kingatka, ukai mansa ke besalah ba pekara tu. Tang pemansa nya ke besalah.

Nama ulih digaga nuan?

• Anang enda pedulika asai ati nuan. Lalau ari opis polis ba Carolina Utara, Amerika Serikat madahka, “Enti sesiti endur tauka seseiku orang ngasuh nuan berasai enda selesa, mupuk aja ari nya. Anang ngelakka sesapa mejal nuan terus dia, enti ati ngasuh nuan mupuk.”

• Pechaya diri; fokus meh. Pemansa seksual ngambi ulih ngagai orang ke lemi sereta nadai daya. Nyadi pechaya meh kediri, lalu tetap bejimat.

• Anang jugau. Nyerauh. (Ulang Adat 22:25-27) Ngerarika diri tauka ngelaban enggau chara ti ngenyitka iya. Pia mega, enti ulih rari ngagai endur ti likun lalu talipun ngagai polis. *

Nama nya? Jenayah siber digaga nengah Internet. Tu nyengkaum, nipu ba chukai, nipu ba duit pemeri, kad kredit, sereta enda nganjung barang ke udah dibeli. Pia mega, tu nyengkaum scammer, nipu ba pelaburan, sereta nipu enggau chara belelong nengah online.

Nama asil tu ngagai orang? Jenayah siber ulih ngujungka mansa iya rugi bejuta ringgit. Peratika chunto tu. Sandra nerima email ke disangka iya datai ari bank iya, lalu email nya ngasuh iya kemaskini online banking iya. Pengudah beberapa mimit iya bekunsika data peribadi, iya tekenyit laban 4,000 dolar amerika dipindahka ngagai akaun bank orang bukai. Udah nya, baru meh Sandra sedar, iya udah ditipu.

Nama ulih digaga nuan?

• Anang mudah ditipu! Anang mudah ditipu meda laman web baka ke profesional. Lalu kingatka, institusi kewangan ti sah, enda kala ngasuh nuan nganjung penerang diri nengah email. Sebedau meli tauka ngelabur nengah Internet, tentuka kompeni nya bisi rita ti manah. Jaku-Dalam 14:15 madah, “Orang ke beli deka arapka sebarang utai, tang orang ke pintar deka nyingkang enggau bejimat.” Nyadi, bejimat meh lebuh bekerejasama enggau kompeni ari luar negara. Laban enti bisi penanggul, nya tusah deka diputarka.

• Peresa pasal kompeni nya sereta polisi iya. Pikirka: ‘Dini alamat kompeni tu? Kati lumur talipun tu betul? Kati bisi bayar bukai ke enda ditemu aku? Kemaya utai ke dibeli aku dianjung? Kati bisi ganti rugi?’

• Anang kelalu gagit enggau utai ke kelalu manah. Orang ke amu tauka kelalu dekaka utai, senang nyadi mansa ba Internet. Chunto iya, sida engka dipinta ngereja pengawa ti mimit, tang bulih mayuh untung. Munyi ku Federal Trade Commission (FTC) Amerika Serikat madah, “Anang beguai, tang pansik meh tiap iti tawaran ke diterima nuan. Besai untung ke disemaya, besai agi penusah ke engka ditapi. Anang nejuka orang ke bejual nekan nuan ngelabur sebedau nuan nemu nya amat likun.”

Nama nya? Orang ke ngenchuri penerang orang bukai, ngambi ulih ba penerang orang bukai enggau chara ti haram, lalu ngena nya nipu tauka ngereja jenayah.

Nama asil tu ngagai orang? Penchuri engka ngena penerang nuan kena ngulihka kad kredit ti baru, tauka nginjau duit ari bank tauka muka akaun bank ti baru. Udah nya, sida ngena nama nuan maya berutang. Nyentukka, taja pan nuan udah mayar semua utang nya, tang nama nuan udah jai, indah engka diblock orang dalam timpuh ti panjai. Munyi ku seiku orang ke kala nyadi mansa, “Enti kitai bisi nama ti jai ba kad kredit, nya teruk agi ari ke dichuri duit.”

Nama ulih digaga nuan?

• Jaga meh penerang ti penting. Enti nuan selalu meli utai nengah online, suah agi nukar password nuan, kelebih agi enti nuan selalu ngena komputer luar. Lalu baka ke disebut tadi, anang enda bejimat enti bisi email minta pasal penerang nuan.

  Orang ke ngenchuri penerang orang bukai, ukai semina pandai ngereja nya ngena komputer aja. Sida ulih ngena seribu chara tetemuka dokumen ti penting, baka bank statement tauka surat penerang bank, checkbooks, kad kredit, sereta lumur keselamatan. Enti dokumen tauka penerang tu lenyau tauka dichuri, riput meh enggau jampat.

• Selalu meresa akaun nuan. Ku FTC nambah, “Bejimat siti chara ke ulih dikena ngelaban orang ke ngenchuri penerang. Enti kitai tumu agi tetemuka ulah orang ke ngenchuri tu, senang agi kitai nyeliahka diri ari ditipu,” Nya kebuah, peresa meh akaun nuan suah agi. Lalu tentuka duit nuan nadai dipindahka ngagai akaun ti salah. Enti ulih, pinta meh salin riput kredit nuan ari agensi ke ulih dipechaya, lalu peratika ni bagi akaun sereta kad kredit ke bisi bekaul enggau nama nuan.

Amat, kemayaharitu nadai utai ke bisi jamin. Orang ke udah bendar bejimat pan agi nyadi mansa jenayah. Taja pia, kitai seruran bulih penguntung enti nitihka penemu-dalam ke datai ari Bup Kudus. “Anang ngelengkaka penemu-dalam. Nya baru iya deka nyaga nuan. Rinduka iya, nya baru iya deka ngintu nuan enggau likun.” (Jaku-Dalam 4:6) Lalu iya ke manah agi, Bup Kudus bisi semaya, dudi hari semua macham penyai ba dunya tu deka nadai agi.

Nama kebuah kitai ulih andal, Petara deka munaska semua macham penyai? Peratika kebuah iya:

• Petara deka munaska penyai. ‘Ku Jehovah bejaku, “Aku rinduka atur ti lurus, lalu Aku begedika pengawa ti nekanka pengidup orang, enggau kereja ti salah.’—Isaiah 61:8.

• Iya bisi kuasa muai semua penyai. ‘Kuasa Petara endang besai, . . . Iya endang lurus sereta betul dalam semua pengawa Iya enggau kitai.’—Jop 37:23.

• Iya udah besemaya deka munaska orang ti jai lalu nyelamatka orang ke manah. “Orang ke jai deka diburu.” “Orang ke lurus deka bempu menua tu lalu diau ditu belama iya.”—Masmur 37:9, 29.

• Iya besemayaka ngagai orang ke tetap ati, jemah ila bisi dunya ti penuh pemaik. “Tang orang ke baruh ati deka bempu menua tu lalu diau lantang ngena pengaya [“ngasaika pemayuh berekat ke diberi ngagai,” NWT] sida.”—Masmur 37:11.

Enda ke semua ayat tu negu ati nuan? Enti pia giga meh awak meresa Bup Kudus lalu belajarka mayuh agi tuju Petara ngagai mensia. Nadai bup bukai ke ngembuan mayuh penemu-dalam baka Bup Kudus. Lalu nadai mega bup bukai ke ulih meri kitai pengadang, jemah ila kitai ulih bibas ari jenayah. *