Bup Kudus nadai nyebut pasal Kain Kafan Turin. Sekeda orang ngumbai, kain linin nya, kain kafan Jesus Kristus lebuh iya dikuburka. Pengarap orang ba gerija mega ngumbai kain nya siti ari barang Jesus ke pemadu kudus. Kemayaharitu, kain kafan tu disimpan ba siti gerija di Menua Turin, Itali. Kain nya diengkah dalam siti peti ke beteknologi tinggi.

 Kati penerang Bup Kudus bisi nyukung pasal penemu, ke ngumbai bangkai Jesus kala dibalut enggau Kain Kafan Turin? Enda.

 Peratika tiga iti bida entara utai ke disebut dalam Bup Kudus enggau kain nya.

1.   Kain kafan ngembuan pemanjai 442 sentimeter, lalu buka iya 113 sentimeter. Udah nya, buka kain ke 8 sentimeter dijait ba ujung kain nya.

    Ajar Bup Kudus: Bangkai Jesus dibalut enggau beberapa lambar kain, lalu ukai selambar kain linin aja. Pala Jesus dibungkus enggau kain ti bukai. Pengudah Jesus diangkatka ari mati, seiku ari rasul iya datai ke kubur iya ti kusung, “lalu tepedaka kain linin nya dia.” Nitihka reti asal, “kain linin” tu ulih mai reti beberapa lambar kain. Nambahka nya, Bup Kudus madahka, “Kain ti udah dikena mungkus pala Jesus. Kain nya digulungka kediri, enda digulungka sama enggau kain linin.”—John 20:6, 7.

2.   Kain kafan tu dikumbai bisi ngembuan bekau darah Jesus ke bedau diperesi.

    Ajar Bup Kudus: Maya Jesus mati, bala murid iya nyendiaka bangkai Jesus sebedau iya dikubur nitihka adat asal orang Judah. (John 19:39-42) Nitihka adat tu, bangkai deka diperesi lalu diunsut enggau minyak mur sereta rempah sebedau nguburka iya. (Matthew 26:12; Surat Kereja Rasul 9:37) Nya alai, bala murid Jesus tentu udah meresi bangkai iya, sebedau malut iya enggau kain.

3.   Nitihka Encyclopædia Britannica, kain kafan tu bisi gambar seiku lelaki ke “gali telentang lalu ngujurka tubuh ba setengah ari kain kafan nya, lalu setengah da agi kain nya dikena nutup semua begian tubuh iya ari mua.”

    Ajar Bup Kudus: Bala murid Jesus kala berandauka utai ke bekaul enggau pemati Jesus. Chunto iya, kubur iya ti kusung, sereta riput ari indu ke “madahka diri udah begenera meda melikat, ke madahka Jesus idup.” (Luke 24:15-24) Enti amat meh kain kafan tu bisi ba kubur Jesus, tentu bala murid iya deka berandau pasal kain nya, sereta baka ni gamal kain nya. Tang, nadai riput dalam Bup Kudus pasal utai tu.

 Enda. Nyembah kain kafan nya endang salah, enda ngira sekalika kain tu kala dikena malut bangkai Jesus tauka enda. Peratika sekeda prinsip Bup Kudus tu:

1.   Pengawa tu enda sejalai enggau peneka Petara. Ku Jesus: ‘Petara endang roh, lalu orang ke nyembah Iya enda tau enda nyembah Iya dalam roh enggau pemendar.’ (John 4:24) Kitai enda patut ngena sebarang utai ke ditinggalka orang ti udah mati, dikena nyadika utai ke disembah.

2.   Pengawa tu ditagang Petara. Nitihka adat Moses, nyembah engkeramba endang ditagang. (Ulang Adat 5:6-10) Bup Kudus mega ngasuh orang Kristian ‘ngejangka diri jauh ari engkeramba!’ (1 John 5:21) Sekeda orang engka berunding, kain kafan tu ukai engkeremba, tang semina tanda ba pengarap sida. Tang tanda tu deka nyadi engkeremba enti seseiku orang nyembah iya. a Nya alai, seseiku orang ke deka ngelantangka Petara, enda nyembah tauka ngemuliaka nama-nama utai nyengkaum kain kafan tu.