Perintah Singapura netapka pengawa nyadi soldadu nya enda tau diseliahka, lalu perintah nya enggai sereta enda ngaku hak sida ke enggai nyadi soldadu ketegal pengarap. Nembiak lelaki Saksi-Saksi Jehovah ti enggai enggau pengawa nyadi soldadu ketegal pengarap, diukum jil pemayuh dua kali sepengelama 39 bulan.

Lebuh umur seiku lelaki nyau manggai 18 taun, iya enda tau enda enggau raban soldadu menua Singapura. Enti iya enggai lalu nulak pengawa nya ketegal pengarap, iya deka diukum jil sepengelama 15 bulan ba rumah jil soldadu. Lebuh timpuh nya udah abis, iya dilepaska tang ba maya nya mega iya deka diasuh begari ngena baju soldadu sereta enggau latih nyadi soldadu. Enti iya enggai ngereja nya, maya nya mega iya dipechara lalu diukum jil sepengelama 24 bulan agi.

Pertubuhan Bangsa-Bangsa Bersatu(PBB) udah lama minta semua menua ke sama enggau sida “ngaku hak sida ke enggai nyadi soldadu ketegal pengarap nya utai ti patut ngagai orang mayuh ngambika sida tau bulih hak bibas berunding, pengasai ati sereta pengarap nitihka Universal Declaration of Human Rights.” Taja pan Singapura udah enggau PBB berengkah ari 1965, menua nya enda besetuju enggau PBB bekaul enggau pekara tu. Ba siti surat ke dianjung ngagai Komiti Hak Mensia ari PBB kena 24 April 2002, seiku pegawai perintah Singapura madahka: “Enti pengarap tauka ulah seiku-seiku orang nya ngelaban [hak nyaga pengelikun menua], hak menua nya empu kena nyaga pengelikun enda tau enda dikenuluka.” Pegawai nya mega nulis: “Kami enggai sereta enda nerima tauka ngaku hak sida ke enggai nyadi soldadu ketegal pengarap.”

1. 8 Mac 2019

   Semilan iku Saksi-Saksi Jehovah benung dijil laban enggai nyadi soldadu ketegal pengarap.

2. November 2013

   18 iku Saksi-Saksi Jehovah ditangkap laban enggai nyadi soldadu ketegal pengarap.

3. 24 April 2002

   Pegawai ari perintah madahka menua Singapura enggai sereta enda ngaku hak sida ke enggai nyadi soldadu ketegal pengarap.

4. Februari 1995

   Peranak Singapura ke nyadi Saksi-Saksi Jehovah majak ditagang sereta ditangkap.

5. 8 Ogos 1994

   Kot Besai Singapura nulak peminta ari Saksi-Saksi Jehovah.

6. 12 Januari 1972

   Perintah Singapura enggai raban Saksi-Saksi Jehovah direjista.