Wat da Bible tell

 Da antichrist iz not jus one person or organization, cuz da Bible tell “get plenny guys . . . dat go agains Christ.” (1 From John 2:​18) Radda, da meaning fo “antichrist,” or “guys . . . dat go agains Christ,” iz anybody who do dese tings:

•   No believe dat Jesus iz da Christ (Messiah) or da Son of God.​—1 From John 2:​22.

•   Go agains Christ, Da One God Wen Pick.​—Songs Fo God 2:​1, 2; Luke 11:⁠23.

•   Make believe dey da Christ.​—Matthew 24:24.

•   Make Jesus followas suffa. Jesus wen say dat wat dey do to his followas iz like doin um to him.​—Jesus Guys 9:5.

•   Tell dey Christians, but do pilau kine stuff.​—Matthew 7:22, 23; 2 Fo Da Corint Peopo 11:13.

 Sometimes da Bible call peopo who do dese kine tings az antichrists, an odda times da Bible group dem all togedda az one, “the antichrist.” (2 John 7, New World Translation-E) Da antichrist wen start in da aposals time an dey been aroun eva since den. Bible prophecy sed dat dis wuz goin happen.​—1 From John 4:3.

How fo know who da antichrists

•   Dey goin spread bulais about Jesus. (Matthew 24:​9, 11) Fo exampo, dose who teach about da Trinity or say dat Jesus iz God, dey goin agains wat Jesus had tell, “My Faddah, he mo importan den me.”​—John 14:28.

•   Antichrists no believe wat Jesus sed about how God’s Govament work. Fo exampo, some religious leadas say dat Christ work thru human govaments. But dis no line up wit wat Jesus wen tell, “I not da kine king from dis world.”​—John 18:36.

•   Dey say Jesus iz dea Lord, but dey no lissen wat he tell his followas fo do, like go preach da good news about God’s Govament.​—Matthew 28:​19, 20; Luke 6:​46; Jesus Guys 10:42.