Revareva ta Heberu Taudia Dekenai 3:1-19
3 Unai dainai, helaga tadikakadia e, umui be guba lao boiboina umui abia taudia,+ mani inai aposetolo tauna bona hahelaga tauna badana umui laloa, ita gwauraia hedinarai ia ita abidadama henia, ia be Iesu.+
2 Ia ese ia dekenai unai dagi ia henia Diravana ia badinaia momokani,+ Mose ese Dirava ena ruma* lalonai badinaia karana ia hahedinaraia hegeregerena.+
3 Iesu ena hairai ese Mose ena hairai ia hereaia,+ unai be maoro, badina ruma haginia tauna idia matauraia bada, to ia karaia ruma idia matauraia bada lasi.
4 Momokani, ruma ibounai be mai edia karaia tauna, to gau ibounai ia karaia tauna be Dirava.
5 Mose be hesiai tauna bamona mai kamonai ida Dirava ena ruma lalonai ia gaukara. Ia karaia gaukara amo, gabeai do idia hedinarai gaudia ia hamomokania.
6 To Keriso be ruma biaguna ena natuna+ bona ia ese mai kamonai ida Dirava ena ruma ia naria.+ Bema ita be mai gari lasi ida ita hereva bona iseda helaro heagilaia karana ita dogoatao ela bona dokona, ita be unai Tauna ena ruma.
7 Unai dainai, lauma helaga ia gwau:+ “Hari dina bema umui ese iena gadona umui kamonai,
8 namo lasi emui kudouna umui ha-aukaia, emui sene taudia ese lau idia habadua negana hegeregerena, unai nega ai idia ese tano kaukau ai lau idia tohoa,+
9 oibe, emui sene taudia ese lau idia tohoa, ena be idia ese lagani 40 lalonai lau karaia gaudia idia itaia.+
10 Unai badina dainai unai uru taudia lau badu henia bona lau gwau: ‘Nega ibounai edia kudouna ai egu hereva idia dadaraia, bona egu dala idia dibaia lasi.’
11 Unai dainai lau badu bona lau gwau, ‘Idia be egu laga-ani lalonai do idia vareai lasi.’”+
12 Tadikaka e, umui naria namonamo, badina mauri Diravana amo umui raka siri karana amo abidadama lasi kudou dikana umui abia garina.+
13 To inai nega, idia gwauraia “Hari Dina”+ ia do noho lalonai, dina ibounai umui ta ta umui hagoadaia noho, unai amo kara dika ena koikoi siahuna ese umui ta ena kudouna do ia ha-aukaia lasi.
14 Bema matamana amo ita abia abidadama ita dogoatao auka ela bona dokona, vadaeni Keriso dekenai idia vara gaudia be ita dekenai do idia vara danu.+
15 Toretore Helagadia ia gwau: “Hari dina bema umui ese iena gadona umui kamonai, namo lasi emui kudouna umui ha-aukaia, emui sene taudia ese lau idia habadua negana hegeregerena.”+
16 Dirava ena gadona idia kamonai to ia idia habadua taudia be daidia? Momokani, idia be Mose ese Aigupito amo ia hakaua raka-lasi taudia, ani?+
17 Danu, lagani 40 lalonai Dirava be daidia dekenai ia badu?+ Idia kara dika bona taunimanima lasi gabuna ai idia mase taudia dekenai ia badu, ani?+
18 Bona daidia dekenai ia gwauhamata, ia gwau, idia be iena laga-ani lalonai do idia vareai lasi? Ia idia kamonai henia lasi taudia dekenai unai ia gwauraia, ani?
19 Vadaeni ita itaia idia be edia abidadama ia manoka dainai, unai laga-ani lalonai idia vareai lasi.+
Futnout
^ Unai be Israela besena ia herevalaia.
