Jehovah na nuyọnẹn daho Sọlomọni bosọ na ẹn lẹblanulọkẹyi nado gbá tẹmpli lọ, amọ́ vudevude e wá jo Jehovah do. Eyin mẹjitọ de wẹ a yin, basi zẹẹmẹ na ovi towe gando lehe sinsẹ̀n-basitọ lalo lẹ diọkọna Sọlomọni sọn Jiwheyẹwhe dè do go. Ahọluduta lọ wá yin mimá, bọ ahọlu ylankan lẹ dọ̀n akọta lọ biọ atẹṣiṣi po boṣiọ-sinsẹ̀n po mẹ. To ojlẹ enẹ mẹ, yẹwhegán nugbonọ Jehovah tọn susu wẹ yin homẹkẹndo bo yin hùhù. Ahọsi Jezebẹli tlẹ sọ tlọ ahọluduta agewaji tọn do atẹṣiṣi mẹ hú gbede pọ́n. Ojlẹ ylankan de wẹ e yin to whenuho Islaeli tọn mẹ. Ṣigba, Islaelivi delẹ gbẹ́ yin nugbonọ na Jehovah. Delẹ to yé mẹ wẹ Ahọlu Jehoṣafati po yẹwhegán Elija po.