NUPINPLỌN 59
Jọja Ẹnẹ Delẹ He Setonuna Jehovah
To whenue Nẹbukadnẹzali bẹ ahọvi Juda tọn lẹ yì Babilọni, e de ahọluzọnwatọ họ̀nmẹ tọn de he nọ yin Aṣpenazi nado nọ penukundo yé go. Nẹbukadnẹzali dọna Aṣpenazi dọ ni ṣinyan jọja sunnu he yọnnuin bo tindo agbasalilo dagbe hugan lẹ sọn yé mẹ. Jọja sunnu enẹlẹ na mọ azọ́nplọnmẹ yí na owhe atọ̀n. Azọ́nplọnmẹ lọ na gọalọna yé nado wá lẹzun ahọluzọnwatọ nukundeji lẹ to Babilọni. Jọja lọ lẹ dona plọn ogbè Babilọninu lẹ tọn ganji bo yọnhia bosọ yọnkàn. Yé sọ dona nọ dù núdùdù dopolọ he ahọlu po mẹhe tin to họ̀nmẹ etọn lẹ po nọ dù. Ẹnẹ to jọja ehelẹ mẹ wẹ Daniẹli, Hanania, Miṣaẹli po Azalia po. Aṣpenazi do yinkọ Babilọni tọn lẹ na yé, enẹ wẹ: Bẹlteṣazali, Ṣadlaki, Meṣaki po Abẹdinẹgo po. Be azọ́nplọnmẹ enẹ na zọ́n bọ yé na doalọtena Jehovah sinsẹ̀n wẹ ya?
Jọja ẹnẹ ehelẹ magbe nado setonuna Jehovah. Yé yọnẹn dọ emi ma dona dù núdùdù ahọlu lọ tọn, na delẹ to núdùdù enẹlẹ mẹ yin mawé sọgbe hẹ Osẹ́n Jehovah tọn. Enẹwutu, yé dọna Aṣpenazi dọmọ: ‘Jaale bo ma na mí núdùdù ahọlu tọn blo.’ Aṣpenazi dọna yé dọmọ: ‘Eyin mì ma dù núdùdù lọ bọ ahọlu wá mọdọ mì gblekàn di mẹhe to azọ̀njẹ, e na hù mi!’
Daniẹli de linlẹn de tọ́n. E dọna mẹgopọntọ yetọn dọ: ‘Jaale bo na mí omá po osin po kẹdẹ na azán ao. Enẹgodo, yí awusọhia mítọn jlẹdo jọja he nọ dù núdùdù ahọlu tọn lẹ tọn go.’ Mẹgopọntọ lọ sọ yigbe.
To azán ao mẹtẹnpọn tọn lọ lẹ godo, Daniẹli po họntọn etọn atọ̀n lẹ po tindo agbasalilo dagbe hú jọja he pò lẹpo. Homẹ Jehovah tọn hùn dọ yé setonuna emi. E tlẹ na nuyọnẹn Daniẹli nado mọnukunnujẹ numimọ po odlọ lẹ po mẹ.
Whenue azọ́nplọnmẹ lọ wá vivọnu, Aṣpenazi plan jọja lọ lẹ yì Nẹbukadnẹzali dè. Ahọlu lọ dọho hẹ yé bo mọdọ Daniẹli, Hanania, Miṣaẹli po Azalia po yọnnuin bosọ bikan hú jọja he pò lọ lẹpo. E de yé omẹ ẹnẹ lẹ nado wazọ́n to họ̀nmẹ etọn. Ahọlu nọ saba kàn ayinamẹ biọ yé do whẹho titengbe lẹ ji. Jehovah ko hẹn yé yọnnuin hú nuyọnẹntọ po nujlẹtọ ahọlu tọn lẹpo po.
Dile etlẹ yindọ jonọ-gbéji wẹ Daniẹli, Hanania, Miṣaẹli po Azalia po te, yé ma wọnji gbede dọ omẹ Jehovah tọn wẹ emi yin. Be hiẹ lọsu na nọ flin Jehovah to whepoponu, etlẹ yin to whenue mẹjitọ towe lẹ ma to finẹ ya?
“A dike mẹdepope yí nukunpẹvi do pọ́n jọja-yinyin towe gbede blo. Kakatimọ, lẹzun apajlẹ de na nugbonọ lẹ to hodidọ mẹ, to walọyizan mẹ, to owanyi mẹ, to yise mẹ, to walọ wiwe mẹ.”—1 Timoti 4:12
A Gán Sọ Pọ́n Hosọ Ehelẹ
Nuplọnmẹ Delẹ sọn Biblu Mẹ
Yé Ma Dẹ́ Do Odò
Ṣadlaki, Meṣaki po Abẹdi-nẹgo po gbẹ́ nado sẹ̀n boṣiọ sika tọn ahọlu Babilọni tọn.
Nuplọnmẹ Delẹ sọn Biblu Mẹ
Daniẹli to Odò Kinnikinni lẹ Tọn Mẹ
Nọ hodẹ̀ hlan Jehovah egbesọegbesọ dile Daniẹli wà do!
