Yẹwhenọ Daho Eli tindo visunnu awe he nọ wadevizọn taidi yẹwhenọ to gòhọtúntún lọ mẹ. Yinkọ yetọn lẹ wẹ Họfini po Finehasi po. Yé ma nọ setonuna osẹ́n Jehovah tọn lẹ, podọ yé nọ yinuwa hẹ mẹlẹ to aliho ylankan mẹ. Eyin Islaelivi lẹ hẹn avọ́sinsan lẹ wá na Jehovah, Họfini po Finehasi po nọ yí olàn dagbe hugan lẹ sọn e mẹ na yede. Eli sè nuhe wà visunnu etọn lẹ te ganji, amọ́ e ma yí nude wà. Be Jehovah na dike bọ nulẹ na to yìyì domọ tẹgbẹ wẹ ya?

Dile etlẹ yindọ Samuẹli whè taun hugan Họfini po Finehasi po, e ma hodo apajlẹ yetọn. Homẹ Jehovah tọn hùn do Samuẹli go. Gbèdopo he Samuẹli to amlọndọ to zánmẹ, e sè ogbè de he ylọ yinkọ etọn. E fọ́n bo họ̀nwezun yì Eli dè bo dọmọ: ‘Yẹn die!’ Ṣigba, Eli dọna ẹn dọmọ: ‘N’ma ylọ we. Yì gọ̀ aimlọn.’ Samuẹli lẹkọyi mlọnai. Enẹgodo, nudopolọ sọ vọ́ jọ. Whenue Samuẹli sọ vọ́ sè ogbè lọ whla atọ̀ntọ, Eli wá mọdọ Jehovah wẹ to Samuẹli ylọ. Enẹwutu, e dọna Samuẹli dọ eyin ogbè lọ sọ ylọ ẹ devo, e ni dọmọ: ‘Dọho, Jehovah. Na devizọnwatọ towe to todoai.’

Samuẹli sọ yì gọ̀ aimlọn. Enẹgodo, e sè: ‘Samuẹli! Samuẹli!’ E sọ gblọn dọmọ: ‘Dọho, na devizọnwatọ towe to todoai.’ Jehovah dọna ẹn dọmọ:  ‘Dọna Eli dọ n’na domẹplọnlọ ewọ po whẹndo etọn po go. E yọnẹn ganji dọ visunnu etọn lẹ to nuylankan wà to gòhọtúntún ṣie mẹ, amọ́ e ma yí nude wà.’ To wunkẹngbe, Samuẹli hùnhọ̀n gòhọtúntún lọ tọn lẹ, dile e ko nọ wà do. E to budi nado dọ nuhe Jehovah ko dọna ẹn lẹ na yẹwhenọ daho lọ. Ṣigba, Eli ylọ ẹ bo kanse e dọmọ: ‘Visunnu ṣie, owẹ̀n tẹwẹ Jehovah do we? Ma whlá nude do mi blo.’ Enẹwutu, Samuẹli dọ ohó lọ lẹpo na Eli.

Dile Samuẹli to whinwhẹ́n, Jehovah gbẹ́ tin hẹ ẹ. Islaelivi he to aigba lọ ji lẹpo wẹ yọnẹn dọ Jehovah ko de Samuẹli nado yin yẹwhegán podọ whẹdatọ.