“Yẹn Ko . . . Hẹn Oyín Towe Zun Yinyọnẹn”
“Yẹn Ko . . . Hẹn Oyín Towe Zun Yinyọnẹn”
“Yẹn ko do oyín towe hia mẹhe hiẹ na mi sọn aihọn mẹ lẹ. . . . Yẹn ko . . . hẹn oyín towe zun yinyọnẹn na yé bo nasọ hẹn ẹn zun yinyọnẹn.”—JOHANU 17:6, 26.
Nuhe E Zẹẹmẹdo: Jesu hẹn oyín Jiwheyẹwhe tọn zun yinyọnẹn gbọn yíyí i zan to lizọnyizọn etọn mẹ dali. Eyin Jesu to hoyidọ sọn Owe-wiwe lẹ mẹ dile e yin aṣa etọn do, e nọ saba yí oyín jọnun Jiwheyẹwhe tọn zan. (Luku 4:16-21) E plọn hodotọ etọn lẹ nado nọ hodẹ̀ dọmọ: “Otọ́, na oyín towe ni yin kinklandowiwe.”—Luku 11:2.
Lehe Klistiani Dowhenu Tọn lẹ Jẹ Nubiọtomẹsi Enẹ Kọ̀n Do: Apọsteli Pita dọna sunnu mẹho lẹ to Jelusalẹm dọ Jiwheyẹwhe de “gbẹtọ lẹ sọn [akọta lẹ] mẹ na oyín etọn.” (Owalọ lẹ 15:14) Apọsteli lẹ po mẹdevo lẹ po lá dọ “mẹdepope he ylọ oyín Jehovah tọn na yin whinwhlẹngán.” (Owalọ lẹ 2:21; Lomunu lẹ 10:13) Yé sọ yí oyín Jiwheyẹwhe tọn zan to kandai yetọn titi lẹ mẹ. Tossefta, yèdọ bẹplidopọ osẹ́n Juvi lẹ tọn he yin tadona to nudi owhe 300 W.M. dọ gando kandai Klistiani lẹ tọn he agọjẹdomẹtọ lẹ nọ fiọ lẹ go dọmọ: “Owe wẹndagbe-kantọ lẹ tọn po owe minim [mẹhe nọ yin pinpọnhlan taidi Klistiani Juvi lẹ] tọn lẹ po ma nọ yin hihla sọn miyọ́n mẹ. Yè tlẹ nọ fiọ fie yé tin te lẹ, . . . yèdọ owe enẹlẹ po alọdlẹndonu he tin to yé mẹ gando Oyín Jiwheyẹwhe tọn go lẹ po.”
Mẹnu lẹ Wẹ Jẹ Nubiọtomẹsi Enẹ Kọ̀n to Egbehe? Biblu lọ Revised Standard Version he yin alọkẹyi gbọn Wedegbẹ́ Akọta tọn he yin Ṣọṣi Klisti tọn lẹ tọn to États-Unis dohia to weda etọn tintan lẹ mẹ dọmọ: “Oyín jọnun depope yiyizan na Jiwheyẹwhe dopo akàn lọ, taidi dọ yẹwhe devo lẹ tin he ewọ gbọnvo na, ko yin alọdotena to sinsẹ̀n Ju lẹ tọn mẹ jẹnukọnna ojlẹ Klistiani lẹ tọn, podọ sọgbe hẹ yise Ṣọṣi Klistiani he tin lẹdo aihọn pé lẹ tọn, nudide enẹ sọgbe.” Enẹwutu, oyín Jiwheyẹwhe tọn yin tẹndiọna po tẹnmẹ-yinkọ lọ “OKLUNỌ” po. To agọe, Vatican degbena biṣọpu etọn lẹ dọmọ: “Oyín Jiwheyẹwhe tọn, yèdọ Tetlaglamu lọ YHWH a ma dona nọ yin yiyizan to ohàn po odẹ̀ lẹ po mẹ.”
Mẹnu lẹ wẹ nọ yí oyín jọnun Jiwheyẹwhe tọn zan bosọ nọ do e hia mẹdevo lẹ to egbehe? To whenue Sergey he nọ nọ̀ Kyrgyzstan tindo nudi owhe 15, e pọ́n sinima de he dohia dọ Jehovah wẹ oyín Jiwheyẹwhe tọn. Enẹgodo, e masọ sè oyín Jiwheyẹwhe tọn na owhe ao. Sergey wá sẹtẹn yì États-Unis, podọ Kunnudetọ Jehovah tọn awe dla ẹ pọ́n to whégbè bo do oyín Jiwheyẹwhe tọn hia ẹ to Biblu mẹ. Homẹhun Sergey tlala nado mọ pipli de he nọ yí oyín lọ Jehovah zan. E jẹna ayidego dọ wezẹhomẹ lọ Webster’s Third New International Dictionary basi zẹẹmẹ hodidọ lọ “Jehovah Jiwheyẹwhe” tọn dole: “Yẹwhe he yin yinyọnẹn taidi dehe yiaga hugan de podọ yẹwhe dopo he Kunnudetọ Jehovah tọn lẹ nọ sẹ̀n.”
[Nudọnamẹ odò tọn]
a To Gungbe mẹ, oyín Jiwheyẹwhe tọn nọ saba yin lilẹdo “Jehovah.”
