Plọnnu sọn Ohó Jiwheyẹwhe Tọn Mẹ

Etẹwẹ Na Jọ Do Sinsẹ̀n lẹ Go?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Be sinsẹ̀n lẹpo wẹ yin dagbe ya?

Gbẹtọ ahunjijlọnọ he jlo na hẹn homẹ Jiwheyẹwhe tọn hùn lẹ tin to sinsẹ̀n voovo lẹ mẹ. Ewọ nọ doayi omẹ mọnkọtọn lẹ go bo nọ hò yetọn pọ́n. Ṣigba, e blawu dọ mẹdelẹ nọ yí sinsẹ̀n zan nado wà nuylankan. To hohowhenu, sinsẹ̀ngán lẹ tlẹ sayana mẹhe jẹagọdo yé lẹ. (2 Kọlintinu lẹ 4:3, 4; 11:13-15) To egbehe, sọgbe hẹ linlin lẹ, sinsẹ̀ngán delẹ ko gọalọna nukunbianamẹtọ lẹ kavi nọgodona awhàn lẹ, kavi zanhẹ ovivu lẹ.—Hia Matiu 24:3-5, 11, 12.

Biblu plọn mí dọ sinsẹ̀n wunmẹ awe wẹ tin: sinsẹ̀n nugbo po sinsẹ̀n lalo po. Sinsẹ̀n lalo ma nọ plọnmẹ nugbo gando Jiwheyẹwhe go. Ṣigba, Jehovah Jiwheyẹwhe jlo dọ gbẹtọ lẹ ni yọ́n nugbo lọ gando emi go.—Hia 1 Timoti 2:3-5.

2. Etẹwẹ na jọ do sinsẹ̀n lẹ go?

Jiwheyẹwhe ma jlo dọ gbẹtọ lẹ ni yin kiklọ gbọn sinsẹ̀n he nọ sọalọakọ́n nado yiwanna ẹn bo ma nọ plọnmẹ nugbo gando ewọ go lẹ dali gba. Na taun tọn, hagbẹ sinsẹ̀n mọnkọtọn lẹ tọn lẹ nọ yiwanna họntọnjiji hẹ aihọn he Satani Lẹgba to anadena ehe. (Jakọbu 4:4; 1 Johanu 5:19) To Ohó Jiwheyẹwhe tọn mẹ, sinsẹ̀n voovo he nọ nọgodona gandudu gbẹtọvi tọn mlẹnmlẹn kakati nido yin Jiwheyẹwhe lẹ yin yiyijlẹdo galọtọ de go. Biblu ylọ galọtọ ehe dọ “Babilọni Daho lọ” na yinkọ enẹ tindo kanṣiṣa hẹ tòdaho hohowhenu tọn he mẹ sinsẹ̀n lalo bẹjẹeji te to Singigọ azán Noa gbè tọn godo. To madẹnmẹ, Jiwheyẹwhe na hẹn vasudo ajiji wá sinsẹ̀n he nọ klọ gbẹtọvi lẹ bo nọ gbidikọna yé lẹ ji.—Hia Osọhia 17:1, 2, 5, 17; 18:8, 23, 24.

 3. Nawẹ Jiwheyẹwhe na hẹn ayajẹ wá na mẹhe tin to aigba lọ blebu ji lẹ gbọn?

Wẹndagbe de wẹ vasudo he ja sinsẹ̀n lalo ji yin. Lẹdo aihọn pé, gbẹtọvi lẹ na mọ kọgbọ sọn kọgbidinamẹ si. Sinsẹ̀n lalo ma nasọ klọ gbẹtọvi lẹ bo klan yé pọ́n gbede ba. Mẹhe na nọgbẹ̀ to whenẹnu lẹpo na yin kinkọndopọ to sinsẹ̀n-bibasi hlan Jiwheyẹwhe nugbo dopo kẹdẹ lọ mẹ.—Hia Isaia 11:9; Osọhia 18:20, 21; 21:3, 4.

4. Etẹwẹ ahunjijlọnọ lẹ dona wà?

Jehovah ma wọn ahunjijlọnọ he tin to sinsẹ̀n lalo mẹ lẹdo aihọn pé lẹ gba. Ewọ to omẹ mọnkọtọn lẹ bẹplidopọ to alọnu din gbọn nugbo lọ pinplọn yé dali.—Hia Mika 4:2, 5.

Jehovah nọ kẹalọyi mẹhe jlo na sẹ̀n ẹn lẹ do whẹndo etọn mẹ. Eyin họntọn po hẹnnumẹ mítọn lẹ po tlẹ gblehomẹ to whenue mí jẹ Jehovah sẹ̀n ji, ale susu wẹ mí nọ mọyi. Di apajlẹ, mí nọ lẹzun họntọn Jiwheyẹwhe tọn bo nọ mọ “whẹndo” yọyọ he nọ do owanyi hia bosọ nọ tindo todido ogbẹ̀ madopodo tọn.—Hia Malku 10:29, 30; 2 Kọlintinu lẹ 6:17, 18.

Na nudọnamẹ dogọ, pọ́n weta 15 po 16 po owe ehe Etẹwẹ Biblu Plọn Mí Taun tọn, he Kunnudetọ Jehovah tọn lẹ zinjẹgbonu.