Be Hiẹ Dona Dindona Sinsẹ̀n Devo lẹ Ya?

“YẸN ko yì opli Klistiani tọn lẹ na diblayi owhe dopo, podọ yẹn duvivi nado dọho na mẹdevo lẹ gando Ahọluduta Jiwheyẹwhe tọn go,” wẹ Miguel dọ, he yin dopo to Kunnudetọ Jehovah tọn lẹ mẹ todin to Hùwaji Amelika tọn. “Enẹgodo yẹn jẹ todoai hlan tito-to-whinnu sinsẹ̀n tọn lẹ ji to ladio mẹ bosọ nọ pọ́n yẹwhehodọtọ sinsẹ̀n tọn lẹ to televiziọn ji. Yẹn lẹndọ tito-to-whinnu mọnkọtọn lẹ sọgan gọalọna mi nado mọnukunnujẹ gbẹtọ he tin to sinsẹ̀n devo lẹ mẹ go ganji. Yẹn yọnẹn dọ nuplọnmẹ yetọn lẹ matin to kọndopọ mẹ hẹ Biblu gba, ṣigba yẹn dín tlintlindo.”

To otò dopolọ mẹ, Jorge yin zohunhunnọ to mẹdevo lẹ pinplọn mẹ gando sinsẹ̀n-bibasi nugbo go. Ṣogan, to ojlẹ de mẹ, ewọ lọsu jẹ todoai hlan tito-to-whinnu ladio po televiziọn sinsẹ̀n tọn lẹ po ji. “Hiẹ dona yọ́n nulẹnpọn mẹdevo lẹ tọn,” wẹ e nọ saba dọ. Eyin yè kanse e gando yọnbasi owù he sọgan tọ́nsọn hunhundo nùvo hlan sinsẹ̀n-nuplọnmẹ lalo tọn mọnkọtọn lẹ go, e nọ gblọn dọmọ: “Nudepope ma sọgan dè yise mẹhe yọ́n nugbo Biblu tọn lẹ tọn pò gba.” Numimọ ehelẹ fọ́n kanbiọ nujọnu tọn de dote, Be nuyọnẹnnu wẹ eyin nado dotoai hlan nuhe mẹdevo lẹ yise ya?

Sinsẹ̀n Klistiani Tọn Nugbo Yinyọnẹn

To okú apọsteli lẹ tọn godo, sinsẹ̀n nugbo yin hinhẹn flusọ́ gbọn awuwiwle vudevude wunmẹ sinsẹ̀n Klistiani oklọ̀ tọn susu lẹ dali. To ehe mimọ hlan jẹnukọn mẹ, Jesu do aliho dopo hia nado yọ́n wunmẹ sinsẹ̀n Klistiani oklọ tọn lẹ gbọnvona sinsẹ̀n Klistiani tọn nugbo lọ. Jẹnukọn whẹ́, e na avase dọmọ: “Mì payi yẹwhegán lalonọ lẹ go, he to mì dè wá lẹ to avọ̀ lẹngbọ lẹ tọn mẹ, ṣigba ohla nuwletọ lẹ wẹ yé to homẹ.” Enẹgodo e yidogọ dọmọ: “Mì na yọ́n yé gbọn sinsẹ́n yetọn mẹ.” (Matiu 7:15-23) Hodotọ nugbonọ Jesu tọn lẹ yí nuplọnmẹ etọn lẹ zan, podọ yé yin yinyọnẹn po awubibọ po gbọn sinsẹ́n  dagbe yetọn lẹ dali. Kẹdẹdile Jesu lọsu wà do, yé nọ dla gbẹtọ lẹ pọ́n nado basi zẹẹmẹ Ahọluduta Jiwheyẹwhe tọn sọn Owe-wiwe lẹ mẹ. To apajlẹ Jesu tọn hihodo mẹ, yé nọ kada na tonudidọ aihọn tọn po nudindọn ogbẹ́ tọn lẹ po. Yé kẹalọyi Biblu taidi Ohó Jiwheyẹwhe tọn bosọ na ẹn sisi taidi nugbo lọ. Yé hẹn oyín Jiwheyẹwhe tọn zun yinyọnẹn. Podọ to whenuena e yindọ yé vánkan nado nọ yí owanyi he Jiwheyẹwhe plọnmẹ lọ zan, yé ma nọ tindo mahẹ to awhàn lẹ mẹ gba. Kakatimọ, yé nọ yinuwahẹ ode awetọ taidi mẹmẹsunnu lẹ.—Luku 4:43; 10:1-9; Johanu 13:34, 35; 17:16, 17, 26.

To gbesisọmẹ hẹ Owe-wiwe lẹ, e yọnbasi nado “yọ́n vogbingbọn to dodonọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ̀n ẹn po ṣẹnṣẹn.” (Malaki 3:18) Sinsẹ̀n-basitọ nugbo lẹ to egbehe yin kinkọndopọ to linlẹn po nuyiwa po mẹ, kẹdẹdile Klistiani owhe kanweko tintan tọn lẹ yin do. (Efesunu lẹ 4:4-6) To whenuena hiẹ yọ́n pipli Klistiani nujọnu tọn mọnkọtọn, naegbọn hiẹ nado to dodinna kavi yin tlintlindo-dintọ gando nuyise mẹdevo lẹ tọn go?

Họ́ Dewe Gando Mẹplọntọ Lalo lẹ Go

Biblu yigbe dọ etlẹ yin to nugbo Biblu tọn pinplọn godo, owù yinyin bibẹpla to gbigbọ-liho sọn nuplọnmẹ lalo tọn lẹ mẹ de tin. Apọsteli Paulu na avase dọmọ: “Mì nọ payi do mìde na mẹde ma na do yí yinyọnẹn po oklọ tata po do bẹ́ mì, gbọn otanhoho gbẹtọ tọn dali, gbọn ojọgbe aihọn tọn mẹ, ehe ma dile Klisti tọn te.” (Kọlọsinu lẹ 2:8) Zẹẹmẹ yẹdenanu tọn nankọtọn die wefọ ehe basi! Taidi gbekanlin he to jijlo nado wle we bosọ tlẹ́n we lẹ, mẹplọntọ lalonọ lẹ sọgan ze owù nujọnu tọn de donukọnnamẹ.

Na nugbo tọn, Paulu doayi nuhe mẹdevo lẹ yise go. To ojlẹ de mẹ e bẹ hodidọ gbangba tọn de jẹeji gbọn didọ dali dọmọ: “Mì omẹ Atẹni tọn emi, yẹn mọhlan dọ to onú lẹpo mẹ hùnsẹ̀ntọ alọpade to onú lẹpo mẹ wẹ mì. Na le yẹn juwajei bosọ pọ́n nudoai sinsẹ̀n mìtọn tọn lẹ, yẹn mọ agbà de ga po wewinwlan he po, Hlan Jiwheyẹwhe Mayọnẹn de.” (Owalọ lẹ 17:22, 23) Ṣigba, Paulu ma yí tamẹnuplọnmẹ ohó-vividọtọ Glẹki tọn lẹ tọn do gọ́ ayiha etọn to gbesisọmẹ gba.

Onú dopo wẹ eyin nado tindo oyọnẹn gando bẹjẹeji po nuyise sinsẹ̀n lalo tọn lẹ po go ṣigba onú devo wẹ e sọ yin nado nọ yí yé do ayiha mẹ. a Jehovah ko de ‘afanumẹ nugbonọ nuyọnẹntọ’ lọ nado wleawuna nuplọnmẹ sinai do Ohó etọn ji. (Matiu 4:4; 24:45) Paulu lọsu wlan dọmọ: “Mìwlẹ ma sọgan yin mimátọ tafo [Jehovah, NW ] tọn, po tafo aovi lẹ tọn po gba. Mí ka to adidohomẹna Jehovah hlan awuwhàn wẹ?”—1 Kọlintinu lẹ 10:20-22.

Mẹplọntọ lalo tọn delẹ sọgan ko yin Klistiani nugbo dai, ṣigba to ojlẹ de mẹ yé diọ sọn nugbo mẹ biọ nuṣiwa mẹ. (Juda 4, 11) Ehe ma dona paṣa mí gba. To whenuena e dọho gando “afanumẹ nugbonọ, nuyọnẹntọ” lọ go he nọtena pipli Klistiani yiamisisadode lẹ tọn godo, Jesu dọho gando “afanumẹ ylankan” lọ go, yèdọ pipli de he wule dọ, ‘ogán ṣie to gbandọn,’ bosọ jẹ afanumẹ hatọ etọn lẹ hò ji. (Matiu 24:48, 49) Whlasusu, omẹ ehelẹ po hodotọ yetọn lẹ po ma ko tindo nuplọnmẹ he họnwun lẹ na yedetiti gba; yé nọ tindo ojlo to yise mẹdevo lẹ tọn vivasudo mẹ poun. Gando yé go, apọsteli Johanu wlan dọmọ: “Eyin mẹdepope wá mì dè, bo ma hẹn oplọn he wá, mì yí ì do owhé mìtọn gbè blo, mì sọ hodẹ̀ ali dagbe tọn na ẹn blo.”—2 Johanu 10; 2 Kọlintinu lẹ 11:3, 4, 13-15.

Gbẹtọ ahundoponọ he to nugbo dín lẹ na wà dagbe nado gbadopọnna nuhe yé sè sọn sinsẹ̀n voovo lẹ dè po sọwhiwhe po. To madẹnmẹ, Jiwheyẹwhe na dona ahunjijlọnọ he to nugbo lọ dín lẹ. Biblu dọ gando nuyọnẹn Jijọ-di-Jiwheyẹwhe tọn go dọmọ: “Eyin hiẹ dín in di fataka, bosọ dín in di adọkunnu he whlá. Whenẹnu . . . [hiẹ] nasọ mọ oyọnẹn Jiwheyẹwhe tọn.” (Howhinwhẹn lẹ 2:4, 5) To oyọnẹn Jiwheyẹwhe tọn ehe mimọ to Biblu mẹ podọ to agun Klistiani tọn mẹ bo ko sọ mọ lehe Jehovah nọ dona mẹhe yin anadena gbọn oyọnẹn enẹ dali lẹ do godo, Klistiani nugbo lẹ ma nọ zindonukọn nado to todoai hlan nuplọnmẹ lalo sinsẹ̀n tọn lẹ ba.—2 Timoti 3:14.

[Nudọnamẹ Odò Tọn]