Ayimajai gán bẹpla dagbemẹninọ mẹtọn. Susu mẹhe adán gbò lẹ tọn wẹ nọ mọdọ emitọn ko fó ján niyẹn. Nawẹ yé nọ yinuwa gbọn?

• Mẹdelẹ ma tlẹ sọ nọ jlo na lẹnnupọndo sọgodo ji ba.

• Lẹnpọn nọ zọ́n bọ mẹdelẹ nọ nù ahàn sinsinyẹn kavi amà.

• Mẹdelẹ nọ dọ dọ e pọnte dọ emi ni hù emide.

• Nulẹ gán pọnte whedepopenu bọ nuhahun towe delẹ na gbọ.

• Eyin nulẹ ma tlẹ diọ, a gán ze afọdide delẹ nado doakọnna.

• Biblu dopà dọ nuhahun gbẹtọ tọn lẹ na busẹ petepete.

Biblu dọmọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.”—Matiu 6:34.

Nọ dọ azán dopodopo tọn. Ma dike nuhiha gando osọ he ja go ni hù awàkan mẹ na we bọ a ma na penugo bo dọ egbé tọn blo.

Eyin a nọ hanú gando osọ go to whepoponu, apọ̀ na wá ṣì we bọ a ma na do todido kaka de ba.

To hohowhenu, dopo to mẹhe kàn owe Salmu lẹ tọn mẹ hodẹ̀ dọmọ: “Ohó towe wẹ miyọ́ngbán de na afọ ṣie, podọ hinhọ́n de na ali ṣie.” (Salmu lẹ 119:105) Nawẹ Biblu, he yin Ohó Jiwheyẹwhe tọn, yin miyọ́ngbán po hinhọ́n po gbọn?

To zinvlu gọ́ngọ́n mẹ, miyọ́ngbán nọ gọalọna mí nado yọ́n fie mí na zinzọnlin gbọn. Mọdopolọ, ayinamẹ he gọ́ na nuyọnẹn bo to Biblu mẹ lẹ nọ gọalọna mí to whenue mí jlo na basi nudide he gẹdẹ lẹ.

Hinhọ́n nọ dì hlan olá bo nọ gọalọna mí nado mọnú hlan nukọn. To aliho dopolọ mẹ, Biblu nọ gọalọna mí nado mọdọ sọgodo dagbedagbe de tin.