Mẹdelẹ nọ nùahàn sinsinyẹn susu to whenue apọṣi yé kavi whenue yé to ṣokẹdẹ. Be a nọ nùahàn hugan lehe a nọ nù do dai wẹ ya? Eyin mọ wẹ, nawẹ a gán wagbọn bọ ahàn ma na jẹnukọnna we kavi lẹzun ahànnu-gungun in? Pọ́n ayinamẹ dagbe delẹ he gán gọalọna we ma nado nọ nùahán zẹjlẹgo.

•  Etẹwẹ e zẹẹmẹdo nado nùahàn sinsinyẹn do jlẹkaji?

•  Lehe a gán yọnẹn gbọn dọ ahàn sinsinyẹn ko to nukọn jẹ na we

•  Ayinamẹ atọ́n delẹ he na gọalọna we ma nado nọ nùahàn sinsinyẹn zẹjlẹgo

 Nuhe Biblu dọ: “A tin to mẹhe nọ nù ovẹn susu lẹ ṣẹnṣẹn blo.”—Howhinwhẹn lẹ 23:20.

 Lẹnnupọndo ehe ji: Biblu ma jẹagọdo ahàn sinsinyẹn nùnù do jlẹkaji. (Yẹwhehodọtọ 9:7) Amọ́, e do vogbingbọn he to ahànnnunu do jlẹkaji, ahànnunu zẹjlẹgo po ahànnumu po ṣẹnṣẹn hia. (Luku 21:34; Efesunu lẹ 5:18; Titu 2:3) Eyin a ma tlẹ nọ nùahàn mú, ahàn susu nùnù sọgan zọ́n bọ a na nọ bayi nudide he ma na wadagbe na agbasa towe kavi haṣinṣan towe hẹ mẹdevo lẹ.—Howhinwhẹn lẹ 23:29, 30.

 Aṣẹpatọ susu lẹ yọ́n vogbingbọn he to ahàn nùnù do jlẹkaji po ahàn susu nùnù po ṣẹnṣẹn, podọ nuhe yé do nọ yọnẹn wẹ ahàn nẹmu he mẹde nù to gbèdopo po whla nẹmu he mẹlọ nùahàn to osẹ dopo mẹ po. a Amọ́, ahàn sinsinyẹn ma nọ yinuwa do mẹlẹpo ji to aliho dopolọ mẹ, podọ to whedelẹnu, e gán yin nuyọnẹnnu ma nado nùahàn paali. Pọ́n nuhe Pipli He Nọ Penukundo Agbasalilo Go Lẹdo Aihọn Pé (OMS) dọ:

 “Ahàn ogo dopo kavi awe nùnù ko sù gbau to ninọmẹ he bọdego ehelẹ mẹ:

•   Whenue a to mọto kùn kavi whenue a to maṣinu de zan.

•   Whenue a to ohò kavi to anọ́ na ovi.

•   Whenue a to amasin de zan.

•   Eyin a to azọ̀n wunmẹ delẹ jẹ.

•   Eyin a ma gán sọ nùahàn do jlẹkaji ba.”

Nuhe Biblu dọ: “Mì gbọ mí ni gbadopọnna bo gbeje aliho mítọn lẹ pọ́n.”—Avigbè Jelemia Tọn 3:40.

 Lẹnnupọndo ehe ji: A gán bayi hihọ́na dewe sọn awugble he ahàn sinsinyẹn nùnù nọ hẹnwa mẹ ji lẹ si, eyin a nọ lẹnnupọn whẹwhẹ do lehe a nọ nùahàn do ji bosọ nọ basi vọjlado he jẹ lẹ. Pọ́n nuhe bọdego lẹ nado yọnẹn eyin ahàn sinsinyẹn nùnù ko jẹnukọnna we.

•   Ahàn sinsinyẹn ján a na mọ whẹpo do dó ayajẹ. A nọ mọdọ whẹpo emi nado gbọjẹ, dogbẹ́ hẹ mẹdevo lẹ kavi daihun be ahàn sinsinyẹn janwẹ emi dona nù. A nọ nùahàn nado de ayiha sọn nuhahun towe lẹ ji.

•   A nọ nùahàn hugan lehe a nọ nù do dai. A nọ nùahàn whẹwhẹ. Ahàn he a nọ nù lẹ nọ sinyẹn taun, podọ susu etọn wẹ a nọ nù whẹpo e nido jẹ e mẹ na we.

•   Ahàn nùnù ko hẹn nuhahun lẹ wá na we to whégbè kavi to azọ́nmẹ. Di apajlẹ, a nọ zan akuẹ susu do họ̀ ahàn sinsinyẹn hugan lee a pé e go do.

•   A nọ bayi nudide he ma sọgbe lẹ whenue a ko nùahàn godo, taidi nado kùn mọto, lìnsin kavi zan maṣinu de.

•   Lehe a nọ nùahàn do nọ dotukla mẹdevo lẹ. Eyin yé dọhona we gando ahàn sinsinyẹn nùnù go, a nọ dín whẹjijọ kavi gblehomẹ. A nọ tẹnpọn nado yinuwa di mẹhe ma nọ nùahàn, kavi a nọ dolalo gando obá he mẹ a nọ nùahàn jẹ go.

•   E to awuvẹ na we nado jo ahàn nùnù do. A ko tẹnpọn nado de ahàn nùnù pò kavi jo ahàn nùnù do, amọ́ e ma pà we.

 1. Bayi tito de.

 Nuhe Biblu dọ: “Tito mẹhe nọ dovivẹnu tọn lẹ nọ tindo kọdetọn dagbe dandan.”—Howhinwhẹn lẹ 21:5.

 Tẹ́n ehe pọ́n: De azán he ji a na nùahàn te to osẹ lọ gblamẹ lẹ. Ze dogbó de dai gando ahàn nẹmu he a na nù to azán enẹlẹ ji go. Podọ, e whè gbau de azán awe to osẹ dopo mẹ he ji a ma na nọ nù ahàn te.

 Pipli de to Royaume-Uni he nọ plọnnu mẹhe e to awuvẹ na nado jo ahàn sinsinyẹn do lẹ dọ dọ: “Eyin a nọ gọ̀n ahàn sinsinyẹn ma nù whẹwhẹ, e na zọ́n bọ ahàn ma na lẹzun whẹho n’ma nù, n’ma gán tọn na we.”

 2. Wazọ́n do tito he a bayi lọ ji.

 Nuhe Biblu dọ: “Mì dotana nuhe mì bẹjẹeji.”—2 Kọlintinu lẹ 8:11.

 Tẹ́n ehe pọ́n: Yọ́n obá he mẹ ahàn dopodopo sinyẹn jẹ, na a nikaa nùahàn zẹjlẹgo. Dín ahàn vivi he na wà dagbe na we lẹ bo nọ dike yé ni to alọ ji.

 Pipli de to Etats-Unis he nọ penukundo whẹho ahàn ṣiṣizan po ahànnumu po tọn go dọ dọ: “Eyin a nọ bayi diọdo kleun kleun lẹ, e na zọ́n bọ nuhahun he ahàn sinsinyẹn nùnù nọ hẹnwa lẹ ma na bẹpla we.”

 3. Tẹdo nudide towe go.

 Nuhe Biblu dọ: “Mì dike ‘Mọwẹ’ mìtọn ni yin mọwẹ, podọ ‘Lala’ mìtọn ni yin lala.”—Jakọbu 5:12.

 Tẹ́n ehe pọ́n: Nọ wleawufo nado dọ “Lala” eyin mẹde whlé we ahàn sinsinyẹn, podọ nọ wàmọ to aliho he jọmẹ bo do sisi hia mẹ, eyin a mọdọ e ma sọgbe hẹ tito towe.

 Pipli de to Etats-Unis he nọ penukundo whẹho ahàn ṣiṣizan po ahànnumu po tọn go dọ dọ: “Eyin a nọ yawu dọ lala whenue yè whlé we ahàn nùnù, mọ wẹ a ma na yawu jogbe do niyẹn.”

 4. Ze ayiha do ale he nudide towe na hẹnwa lẹ ji.

 Nuhe Biblu dọ: “Opodo whẹho de tọn pọnte hú bẹjẹeji etọn.”—Yẹwhehodọtọ 7:8.

 Tẹ́n ehe pọ́n: Kàn nuhewutu a jlo na nùahàn sinsinyẹn do jlẹkaji lẹ dai. A gán kàn dọ, n’jlo na nọ damlọn ganji, n’jlo na do agbasalilo dagbe, n’jlo na pọ́n akuẹ do zan bosọ jlo na nọ jijọho mẹ hẹ mẹdevo lẹ. Eyin a to hodọ hẹ mẹlẹ gando nudide towe go, nọ dọhodo ale he to e mẹ lẹ ji kakati nido yin do nuhahun he pehẹ a te lẹ ji.

 5. Nọ Biọ alọgọ Jiwheyẹwhe tọn.

 Nuhe Biblu dọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13.

 Tẹ́n ehe pọ́n: Eyin a mọdọ ahàn nùnù to nukọn jẹ na we, hodẹ̀ hlan Jiwheyẹwhe dọ ni gọalọna we. Biọ ẹ dọ ni na we huhlọn bosọ gọalọna we ma nado nọ wanu zẹjlẹgo. b Nọ plọnnu sọn Ohó etọn Biblu mẹ nado yọ́n ayinamẹ dagbe he to e mẹ lẹ. Po alọgọ Jiwheyẹwhe tọn po, e gán pà we nado nọ nùahàn sinsinyẹn do jlẹkaji.