Titu 2:1-15
2 Ṣigba, hiẹ ni zindonukọn nado nọ to nuhe tin to kọndopọ mẹ hẹ oplọn he sọgbe* lọ dọ.+
2 Gbọ sunnu mẹho lẹ ni yin mẹdehọ́tọ to walọ mẹ bo whèwhín bosọ yin wunzanọ bo pegan to yise mẹ, to owanyi mẹ, to akọndonanu mẹ.
3 Mọdopolọ, gbọ yọnnu mẹhomẹ lẹ ni tindo budisi to walọ mẹ, yé ma dona yin mẹhẹngbletọ, yé ma dona yin afanumẹ ovẹn susu tọn, yé dona yin mẹplọntọ nudagbe tọn lẹ,
4 na yé nido sọgan nọ na ayinamẹ* jọja yọnnu lẹ nado nọ yiwanna asu yetọn lẹ, nado nọ yiwanna ovi yetọn lẹ,
5 nado nọ yin wunzanọ, nado nọ nọ̀ wiweji, nado nọ wazọ́n to whégbè,* nado nọ yin mẹdagbe, bo nọ yin mẹmẹglọ na asu yetọn titi lẹ,+ bọ ohó Jiwheyẹwhe tọn ma nado yin nùzan dego.
6 Mọdopolọ, nọ to tudohomẹna jọja sunnu lẹ nado yin wunzanọ+
7 bo nọ do dewe hia taidi apajlẹ de na nuhe dù azọ́n dagbe lẹ to aliho lẹpo mẹ. Nọ yí wunza do plọnmẹ nuhe yin wiwe-ṣeke*+
8 bo nọ yí hogbe he sọgbe* he ma sọgan yin homọdọdego lẹ zan,+ na winyan nido sọgan hù agọjẹdomẹtọ lẹ, bọ yé ma nado tindo onú agọ̀* depope nado dọ gando mí go.+
9 Gbọ afanumẹ lẹ ni yin mẹmẹglọ na klunọ yetọn lẹ to nulẹpo mẹ+ bo nọ tẹnpọn nado hẹn homẹ yetọn hùn, e ma yin nado nọ dọho jẹagọdo yé,
10 e ma yin nado nọ jẹajo do yé,+ ṣigba nado nọ do yede hia di mẹhe go yè sọgan dejido to gigọ́ mẹ, na yé nido sọgan doaṣọ́na oplọn Mẹwhlẹngántọ mítọn, yèdọ Jiwheyẹwhe tọn, to aliho lẹpo mẹ.+
11 Na nukundagbe majẹhẹ Jiwheyẹwhe tọn ko yin hinhẹn sọawuhia bo hẹn whlẹngán wá na gbẹtọ wunmẹ lẹpo.+
12 E sọ nọ plọn mí nado gbẹ́ jijọ-madi-Jiwheyẹwhe po ojlo aihọn tọn lẹ+ po dai podọ nado nọ do wunza, dodowiwa po mẹdezejo na Jiwheyẹwhe po hia to titonu* ehe mẹ,+
13 dile mí to tepọn todido jiawu+ gọna awusọhia gigonọ Jiwheyẹwhe daho lọ tọn podọ Mẹwhlẹngántọ mítọn, yèdọ Jesu Klisti tọn,
14 mẹhe yí ede na mí+ na ewọ nido sọgan tún mí dote*+ sọn sẹ́nhẹngba wunmẹ lẹpo mẹ bo klọ́ mí wé nado lẹzun nutindo vonọtaun etọn titi lẹ, yèdọ zohunhunnọ na azọ́n dagbe lẹ.+
15 Nọ to onú ehelẹ dọ bo nọ to tudohomẹnamẹ* bosọ nọ yí aṣẹpipa he yin nina we do nọ wọhẹmẹ.+ A dike mẹde yí nukunpẹvi do pọ́n we blo.
Nudọnamẹ Odò Tọn
^ Kavi “he pegan; he nọ hẹn ale wá.”
^ Kavi “nọ flinnu; nọ plọnnu.”
^ Kavi “nado nọ penukundo owhé yetọn go.”
^ Kavi vlavo, “do plọnmẹ to wiwe-yinyin mẹ.”
^ Kavi “he pegan; he nọ hẹn ale wá.”
^ Kavi “nuylankan.”
^ To paa mẹ, “fli mí gọ̀.”
^ Kavi “tulinamẹ.”
