Oñeporandúva jepi

Añetehápepa oĩ Satanás?

La Biblia heʼi añetehápe Satanás oĩha. Péro heta oĩ oñembohorýva upéva ojeguerovia haguére. Heʼi voi hikuái Satanás haʼenteha umi mbaʼe vai jarekóva ñande pyʼapýpe.

Ndajahecharamói ningo koʼág̃a rupi oĩ haguére heta ndogueroviáiva Satanás oĩha. Mbaʼeichakuépa upéva? Ñantende porãve hag̃ua ñambojojami umi mondaha ojapóvare ani hag̃ua ojepilla ha upéicha osegi hag̃ua omonda. Upearã haʼekuéra ndohejái mbaʼeve opillakátava chupekuéra. Satanás ningo upeichaite avei ojapo, ndoipotái ojepilla chupe ikatu hag̃uáicha osegi ojapouka opaichagua mbaʼe vai. Péro Jesús heʼírõ guare Satanás haʼeha ‘ko múndo ruvicha’ ohechauka porã mávapa pe ojapoukáva hetaite mbaʼe vai la héntepe (Juan 12:31).

Péro máva piko ojaporakaʼe Satanáspe? Ñepyrũrã ningo haʼe peteĩ ánhel hekoporãvavaʼekue. Upéi katu oipotáma yvyporakuéra omombaʼeguasu chupe Ñandejárape rangue. Ndoipeʼavéi voi upéva iñakãgui ha ipahápe opuʼã Jehováre. Upérõ oiko chugui Satanás el Diablo. La Biblia ningo omombeʼu Satanás ha Jesús oñemongeta hague oĩrõ guare ko yvy ape ári. Upérõ Satanás ohechauka oipotaha voi Jesús oñesũ henondépe ha omombaʼeguasu chupe (Mateo 4:8, 9).

Pe lívro de Job avei omombeʼu dos vése Satanás oho hague oñemongeta Ñandejára ndive ha ojekuaa hese oipotanteha voi oñemombaʼeguasu chupe. Ohechauka avei Satanás oĩha ojapo hag̃uáicha oimeraẽ mbaʼe yvyporakuéra omombaʼeguasu hag̃ua chupe ha oheja hag̃ua Ñandejárape (Job 1:13-19; 2:7, 8).

Epensamíntena ko mbaʼére: Satanás ningo oho oñeʼẽ hag̃ua Jehová ha Jesús ndive, upéicharõ ndaikatúi jaʼévo Satanás haʼenteha umi mbaʼe vai jarekóva ñande pyʼapýpe. Jehová ha Jesús ningo ndorekói ni michĩmi mbaʼe vai ipyʼapýpe. Péicha jahechakuaa añetehápe Satanás oĩha. Haʼe ningo peteĩ espíritu aña ni michĩmi ndorrespetáiva Jehová ha Jesúspe.

Umi mbaʼe vaiete oikóva ko múndope ohechauka avei Satanás oĩha. Hetaiterei ñande rapicha omano ñembyahýigui, heta tetãme katu oñehundipa rei umi tembiʼu hembýva. Oreko avei hikuái umi árma ipoderósova oñorairõ hag̃ua. Jahecha avei opárupi oñemongyʼa ha oñembyaipa ko yvy. Upéicharõ jepe la hénte ndohechakuaái mávapa ojapouka koʼã mbaʼe vaiete. Mbaʼérepa upéicha hikuái?

La Biblia omombeʼu ñandéve mbaʼérepa, heʼívo Satanás ‘ombohesaypytũha umi ogueroviaʼỹvape Crístope’ (2 Corintios 4:4). Ha mbaʼéichapa ojapo upéva? Umi espíritu aña ipoguýpe orekóva rupive. La Biblia heʼi voi Satanás haʼeha ‘umi aña ruvicha guasu’ (Mateo 12:24). Satanás haʼete umi mondaha ruvicha ojapoukáva opa mbaʼe vai, ha ndojepillakái avavépe. Péicha Satanás ojevale umi demóniore ojapouka hag̃ua umi mbaʼe vai la héntepe, ha haʼekuéra ndohechakuaái upéva.

Haʼetépeko la Biblia omombeʼu porã ñandéve mávapa Satanás ha umi oĩva ipoguýpe. Upévare ikatu jahechakuaa iñuhã ha jajehekýi chugui. Mbaʼéichapa? Jajapóvo koʼápe heʼíva: ‘Peñemoĩ Ñandejára poguýpe, péro pembohovái Satanáspe ha haʼe penderejáta’ (Santiago 4:7).