1, 2. ¿Mbaʼérepa jaʼekuaa Jehová nañanekontrolaiha umi kámara de vihilánsiaicha?

HETA tetãme koʼág̃arupi ojeporu kámara de vihilánsia umi negosioháre oñekontrola hag̃ua mávapa oike ha osẽ, térã ojepilla hag̃ua oĩramo omondáva. Upe rire umi gravasión rupive ikatu ojekuaa ha ojejagarra pe mondahápe. Añetehápe, koʼã kámara tuicha oipytyvõ ojekastiga hag̃ua umi hembiapo vaívape.

² Péro ¿ikatúpa ñapensa ñande Ru ñanderayhuetéva okontrolapaiteha jajapóva guive ku kámara de vihilánsiaicha? La Biblia heʼi: “Ñandejára omaña opárupi” (Prov. 15:3). ¿Heʼisépa upéva haʼe ñanekontrola memeha ohecha hag̃ua ñakumplípa imandamientokuéra, ha oiméramo jafalla ñandekastiga hag̃ua? (Jer. 16:17; Heb. 4:13.) ¡Ni mbaʼevéicharõ! Jehová ojesareko ñanderehe ñanderayhúgui ha hiʼãitereígui chupe ñaime porã (1 Ped. 3:12).

3. ¿Mbaʼe mbaʼépa Jehová ojapo ohechauka hag̃ua ñanderayhuha?

³ ¿Mbaʼérepa jaʼekuaa Jehová nañanekontrolaiha oheka hag̃ua defékto? Jahechamína cinco mbaʼe ohechaukáva haʼe ojapoha upéva ñanderayhu rupi: 1) ñandeavisa ñañepyrũramo jaha vai, 2) ñandekorrehi ñanerembiapo vaíramo, 3) ñandegia omeʼẽvo ñandéve  konsého la Biblia rupive, 4) ñanepytyvõ ñambohovái hag̃ua umi mbaʼe ijetuʼúva, ha 5) omyengovia porã ñandéve jajapóramo pe iporãva.

4. ¿Mbaʼérepa Jehová oavisa raʼe Caínpe pe pekádo ohaʼarõha chupe “pe okẽme”?

⁴ Primero, ñahesaʼỹijomi mbaʼéichapa Jehová ñandeavisa ohechávo ñañepyrũha jaha vai (1 Crón. 28:9). Ñapensamína Caín rehe ñantende hag̃ua mbaʼeichaitépa Jehová ojesareko ñanderehe. Jaikuaaháicha, haʼe “ipochyeterei” vaʼekue Ñandejára ndoguerohorýi haguére chupe (elee Génesis 4:3-7). ¿Mbaʼépa Jehová ojapo upémarõ? Heʼi chupe ‘ojapo hag̃ua pe iporãva’. Hiʼarive oavisa Caínpe ndojapóiramo upéva opekataha. Haʼete pe pekádo ohaʼarõva “pe okẽme” oity hag̃ua chupe. Upéi katu Jehová oporandu chupe: “¿Ndepuʼakátapa hese?”. Ñandejára oipota kuri Caín osegi pe konsého ikatu hag̃uáicha ‘oguerohory jey chupe’. Caín oñehaʼãrire ojapo Jehová heʼíva, oĩ porã vaʼerãmoʼã hendive.

5. ¿Mbaʼéichapa Jehová ñandeavisa ohecháramo ñañepyrũha jaha vai?

⁵ ¿Mbaʼéichapa ñanepytyvõ ko ehémplo? Jehová ohechapaite oĩva ñande pyʼapýpe; ndaikatúi ñañomi chugui ñapensáva ni ñandegustáva. Ñande Ru ñanderayhuetéva oipota akóinte jaha tape porãre, péro haʼe nañandejopýi upearã. Iñeʼẽ rupive ñandeavisa oiméramo ñañepyrũ jaha vai. Jalee jave la Biblia káda día, jajuhu jepi umi téxto ñanepytyvõva jagueropuʼaka hag̃ua umi mbaʼe vai ñandestiráva térã umi tentasión. Avei ñane puvlikasionkuéra ñanepytyvõ ñantende hag̃ua umi provléma jahasáva ha ohechauka mbaʼéichapa ñambohovái vaʼerã. Ha umi rreunionhápe katu oñemeʼẽ konsého itiempoitépe ha ou porãva opavavépe.

6, 7. a) ¿Mbaʼérepa jaʼekuaa Jehová oñeinteresaha káda uno isiervokuérare, jepe umi konsého oñemeʼẽ hetápe? b) Ñandejára ningo oñangareko peteĩteĩre, péro ¿mbaʼépa jajapo vaʼerã ñañevenefisia hag̃ua upévagui?

⁶ Entéro umi konsého Jehová omeʼẽva ohechauka oñangarekoha mborayhúpe káda únore. Añetehápe ningo Iñeʼẽ oĩ ymaiterei guivéma, umi puvlikasión ojapóva Ñandejára organisasión ojeprepara hetaiterei tapichápe g̃uarã, ha umi konsého jarresivíva rreunionkuérape oñemeʼẽ opavave ermánope g̃uarã. Upéicharõ jepe, Jehová opoko ne korasõre ikatu hag̃uáicha ndete resegi peteĩ konsého ideprovéchotava ndéve rejekorrehi hag̃ua. Opa koʼã mbaʼe ohechauka porã Ñandejára oñangarekoha nderehe ha nderayhuetereiha.

⁷ Ikatu hag̃uáicha ideprovécho ñandéve umi konsého Jehová omeʼẽva, tekotevẽ jahechakuaa haʼe oñeinteresaha ñanderehe ipyʼaite guive. Upéi katu ñaneñeʼẽrendu vaʼerã chupe ñañehaʼãvo jaipeʼa ñane akãgui oimeraẽ mbaʼe chupe ombojeguarúva (elee Isaías 55:6, 7). Ñaneñeʼẽrendúramo Ñandejárape ha jasegi umi konsého, jajehekýita heta akãrasýgui. Péro, ¿mbaʼépa oikóta oimérire jajapóma peteĩ mbaʼe ivaíva? ¿Mbaʼéichapa ikatu ñanepytyvõ ñande Ru ñanderayhuetéva?

8, 9. ¿Mbaʼérepa jaʼekuaa Jehová oñangarekoha ñanderehe umi konsého rupive? Emoĩ peteĩ ehémplo.

⁸ Jehová ñandekorrehi jave katuete jahechakuaa mbaʼeichaitépa haʼe ojepyʼapy ñanderehe (elee Hebreos 12:5, 6). Añetehápe ningo ndaigustopái oĩ jave ñaneakonseha térã ñandekorrehíva (Heb. 12:11). Péro epensamíntena mbaʼépa ohecha raẽ vaʼerã pe oñemoñeʼẽtava ñandéve. Haʼe oikuaa vaʼerã pe jajapóva ikatuha ñanemoĩ vai Ñandejára ndive ha avei oñeinteresa  vaʼerã umi mbaʼe ñañandúvare. Hiʼarive oñemotiémpo vaʼerã ohechauka hag̃ua ñandéve la Biblia rupive mbaʼépepa tekotevẽ ñakambia ñaime porã jey hag̃ua Jehová ndive. Koʼãichagua konsého ohechauka mbaʼeichaitépa Ñandejára oñeinteresa ñanderehe, amo ipahápe ningo chugui voi ou umíva.

⁹ Jahechamína peteĩ ehémplo ohechaukáva mbaʼéichapa Jehová ojepyʼapy ñanderehe ojevalévo ótro ermánore oñemoñeʼẽ hag̃ua ñandéve. Peteĩ kristiáno ojepokuaa vaʼekue ohecha pornografía oiko mboyve chugui Testígo, péro upéi ou oikuaa pe añetegua ha oheja pe vísio vai. Upéicharõ jepe, ostira lénto gueteri chupe ha umi mbaʼe tieʼỹ opyta iñakãme ku tatapỹi hendyʼívaicha. Upéi ojogua iselulár pyahurã, ha pe mbaʼe vai haʼete ku ojepota jeýva ipyʼapýpe (Sant. 1:14, 15). Haʼe oiporu iteléfono oike hag̃ua Internétpe umi páhina pornográfikape. Peteĩ ára, opredika jave por teléfono, peteĩ ansiáno oiporu chugui iselulár oheka hag̃ua direksión. Peichaháguinte osẽ chupe umi direksión naiporãietéva. Pe ansiáno oñemoñeʼẽ chupe ohechávo ikatuha opyta vai Ñandejára renondépe. Pe ermáno osegi pe konsého ha saʼi saʼípe ohejaite pe mbaʼe vai. ¡Ajépa javyʼaite ñande Ru ñanderayhuetéva ohecha rupi umi mbaʼe jajapóva kañyháme jepe, ha ñandekorrehi haguére jaʼa mboyve peteĩ pekádo ivaietereívape!

10, 11. a) ¿Mbaʼéichapa jahechauka jaipotaha Jehová ñandegia? b) ¿Mbaʼéichapa peteĩ família ohecha iporãveha jasegi umi konsého oĩva la Bíbliape?

¹⁰ Pe salmísta opurahéi Jehovápe: “Cherekomboʼévo chesãmbyhy” (Sal. 73:24). Ñaikotevẽ jave ñandegiáva, ‘ñanemanduʼa vaʼerã’ Ñandejárare ha jahecha la Bíbliape mbaʼépa haʼe opensa. Umi konsého oĩva Iñeʼẽme omombarete ñande jerovia, ha hiʼarive ñanepytyvõ jahupyty hag̃ua ñane remikotevẽ (Prov. 3:6).

¹¹ Jahechamína koʼág̃a peteĩ ermáno rembiasakue. Haʼe oiko ifamília ndive peteĩ gránhape Masbátepe (Filipinas), peteĩ lugár oĩháme heta montáña. Ko ermáno ha hembireko oservi de prekursór rregulár orekóramo jepe heta família omongakuaáva. Péro peteĩ árape, pe karai oalkiláva chupekuéra pe gránha, heʼi osẽ vaʼerãha upégui hikuái. Oĩ raʼe oñeʼẽ vaíva hesekuéra ha heʼi naiñonrradoiha. Pe ermáno ojepyʼapy ndoikuaáigui moõpa ohóta ifamiliakuéra  reheve. Upéicharõ jepe heʼi chupekuéra: “Jehová katuete ñanepytyvõta, haʼe akóinte oñangarekóta ñanderehe toiko la oikóva”. Ha peichaite oiko. Upe riremínte, pe gránha jára heʼi jey chupekuéra ikatuha opyta. ¿Mbaʼérepa? Haʼe ohecha pe ermáno ha ifamiliakuéra ndohekaiha provléma ha opororrespetaha, oĩramo jepe ombojáva hesekuéra ojapoha mbaʼe vai. Haʼe ohecharamoiterei upéva, ha ndoipotái oho upégui hikuái, ha hiʼári omeʼẽve chupekuéra yvy oñemitỹ hag̃ua (elee 1 Pedro 2:12). Péicha jahecha Ñandejára omeʼẽha ñandéve konsého iporãva Iñeʼẽ rupive ikatu hag̃uáicha ñambohovái umi mbaʼe ijetuʼúva.

12, 13. ¿Mbaʼéicha javépa ñañeporandu jepi añetehápepa ohecha Jehová umi mbaʼe oikóva?

¹² Sapyʼánte ningo oĩ umi mbaʼe ijetuʼúva ñandereko asýva heta tiémpore. Por ehémplo, ikatu aréma ñanderasy, ñane hénte oñemoĩ ñanderehe jaservi haguére Jehovápe, térã oĩ ñandepersegíva. Avei heta vése ikatu jajoavy peteĩ ermáno kongregasionguándi.

¹³ Epensamína peteĩ ermáno heʼiha peteĩ mbaʼe nemoñeñandu vaíva. Ikatu nde ere: “Koʼã mbaʼe noñepermitíri vaʼerã Jehová organisasiónpe”. Hiʼarive rehecha oñemeʼẽha chupe hetave rresponsavilida kongregasiónpe, ha heta ermáno oguerohoryetereiha chupe. Ikatu reñeporandu: “¿Mbaʼéicha piko péichata? ¿Ñandejára piko ndohechái mbaʼe la oikóva? ¿Ndojapomoʼãi piko mbaʼeve?” (Sal. 13:1, 2; Hab. 1:2, 3).

14. ¿Mbaʼérepa sapyʼánte haʼete ñandéve Jehová ndojapoiha mbaʼeve okorrehi hag̃ua peteĩ situasión?

¹⁴ Jehová ningo oikuaave ñandehegui entéro mbaʼe, upévare sapyʼánte opermiti oiko peteĩ mbaʼe. Por ehémplo, ikatu peteĩ ermáno ou ñaneakonseha, péro ñande ñandepochy ndajahechakuaáigui jajavy hague. Péro Jehová ohecha tekotevẽha jajekorrehi. Pe ermáno Karl Klein, oĩ vaʼekue Kuérpo Governántepe, omombeʼu ermáno Rutherford peteĩ jey tuicha omongavaju hague chupe. Upe riremínte Rutherford torýpe heʼi chupe: “¡Mbaʼe la pórte Karl!”. Ha haʼe katu apenami osaluda chupe. Ermáno Rutherford ohechakuaávo haʼe ipyʼaroha hendive, oavisa chupe péicha ikatuha hoʼa Satanás ñuhãme. Tiémpo rire ermáno Karl ohai: “Ikatu peteĩ ermáno oñemoñeʼẽ mbarete ñandéve orekógui derécho upearã. Péro ñande japytáramo ñandepyʼaro hendive, jajapeligra hína. Pe Diablo ikatu ojevale upévare ñandereity hag̃ua”. *

15. ¿Mbaʼérepa ñanepasiénsia vaʼerã jahasa jave umi mbaʼe ijetuʼúva?

¹⁵ Sapyʼánte haʼete ñane provléma noñesolusionamoʼãiva ha jaju nañanepasiensiavéi. ¿Mbaʼépa ikatu ñanepytyvõ ñaaguanta hag̃ua? Epensamína remanehaha rehóvo, upéi katu pe rrúta henyhẽma veíkulogui ha ndaikatuvéima resegi. Hiʼarive ndereikuaái mboy tiémpopa rehaʼarõ vaʼerã umi veíkulo ohomie hag̃ua. Péro, ¿mbaʼépa ikatu oiko nanepasiénsiairamo ha rejagarránte ótro tape? Ikatu reho rekañy ha hasypeve reg̃uahẽ pe lugár rehosehápe. Péicha avei, iporãve nepasiénsia ha esegi pe tape la Biblia ohechaukáva ndéve, ha Jehová katuete nepytyvõta reaguanta hag̃ua ipahaite peve.

16. ¿Mbaʼérepa sapyʼánte Jehová opermiti jahasa asy?

¹⁶ Sapyʼánte Jehová opermiti heta mbaʼe ikatu hag̃uáicha ñañehekomboʼe (elee 1 Pedro 5:6-10). Péro ani ñaimoʼã chugui ouha umi jehasa asy (Sant. 1:13). Ñanemanduʼa vaʼerã haimete entéro umi provléma ñanderupytyha ñane “enemígo, pe Aña”  kúlpare. Péro Ñandejára ikatu avei ojevale umi situasión ijetuʼúvare ikatu hag̃uáicha omombarete ñande jerovia. Haʼe ohecha mbaʼeichaitépa jasufri, “ojepyʼapýgui” ñanderehe ndohejamoʼãi koʼã mbaʼe osegi are, síno “sapyʼaitemi”. ¿Reagradesépa Jehovápe mborayhúpe oñangareko haguére nderehe rehasa jave umi mbaʼe ipohýiva? ¿Rejeroviápa haʼe ohechaukataha ndéve mbaʼéichapa resẽta upe provlémagui? (2 Cor. 4:7-9.)

17. ¿Mávarepa ojesareko Jehová, ha maʼerãpa?

¹⁷ Jehová ojesareko avei yvyporakuérare omyengovia porã hag̃ua opavave ohayhúvape chupe ipyʼaite guive. Proféta Hananí heʼi vaʼekue rréi Asápe: “Jehová ohechapaite oikóva ko yvy ape ári, ikatu hag̃uáicha oipytyvõ ipodér rupive entéro umi ojeroviávape hese” (2 Crón. 16:9, NM). Ñandejára ohecha Asá ndojeroviapái hague hese. Péro nde reñehaʼãramo rejapo pe iporãva, Jehová nepytyvõta “ipodér rupive”. Haʼe oñangarekóta nderehe ha omyengovia porãta umi mbaʼe rejapóva.

18. ¿Mbaʼépa ñanemanduʼa vaʼerã haʼetéramo ñandéve avave ndohechaiha umi mbaʼe porã jajapóva? (Ehecha pe taʼanga oĩva iñepyrũme.)

¹⁸ Jehová oipota hembiguaikuéra ‘oheka iporãva, [...] ohayhu iporãva’ ha avei “ojapo iporãva” (Amós 5:14, 15, ÑÑB; 1 Ped. 3:11, 12). Haʼe oñangareko umi hekojojávare ha ovendesi chupekuéra (Sal. 34:15). Ñapensamíntena Sifrá ha Puá ojapo vaʼekuére. Haʼekuéra ningo mokõi partéra evréa oiko vaʼekue umi isrraelíta oĩ tiémpope Egíptope esklávoramo. Faraón omanda ojejuka hag̃ua umi mitãʼi mimi onaséva guive, péro koʼã kuña okyhyjeve Ñandejáragui ha ndojukái umi mitãraʼy. Jehová ohecha mbaʼépa ojapo Sifrá ha Puá ha upévare omeʼẽ chupekuéra imemby teerã (Éx. 1:15-17, 20, 21). Ikatu ñapensa avave ndohechaiha umi mbaʼe porã jajapóva, péro ñanemanduʼa vaʼerã Jehovágui nokañyiha mbaʼeve ha haʼe omyengoviataha ñandéve ñanerembiapo porã haguére (Mat. 6:4, 6; 1 Tim. 5:25; Heb. 6:10).

19. ¿Mbaʼéichapa peteĩ ermána ohechakuaa Jehová ojesarekoha opa mbaʼe porã jajapóvare?

¹⁹ Peteĩ ermána oikóva Áustriape ohechakuaa Jehová ojesarekoha opa mbaʼe porã jajapóvare. Ko ermána oñeʼẽ idióma úngaro ifamiliakuéra haʼe rupi Hungriagua. Upévare oñemeʼẽ chupe peteĩ direksión ikatu hag̃uáicha oho opredika peteĩ tapicha oñeʼẽvape iñidiómape. Pyaʼe oho ovisita hag̃ua upe persónape, péro ndotopái avavére. Oho jey heta vése ha oheja jepi puvlikasión, kárta, iteléfono número, ha umícha. Sapyʼánte opensa oĩha pe ogajára, péro noñatendeseinteha hese. Ohasáramo jepe un áño imédio, haʼe osegi oho hendápe. Péro peteĩ díape osẽ sapyʼa oñatende hese peteĩ kuñakarai horyetereíva ha oinvita chupe oike hag̃ua. Heʼi chupe: “Aleepaite umi mbaʼe reheja vaʼekue chéve, ha rohaʼarõ hína kuri”. Pe kuñakarai ojapouka raʼe oikóvo kimioterápia ha upévare ikangyeterei ha ndaikatúi vaʼekue orresivi visíta. Péro upe rire, oipota pe ermána ou omboʼe chupe la Biblia. Jahechaháicha, Ñandejára omyengovia porã ko ermánape osegi haguére oñehaʼã.

20. ¿Mbaʼéichapa ñañeñandu jaikuaávo Jehová ojesarekoha ñanderehe?

²⁰ Jehová ohecha opaite mbaʼe jajapóva. Péro jahecha haguéicha, arakaʼeve nañambojojái vaʼerã chupe peteĩ kámara de vihilánsiare, ograváva opa mbaʼe ojepilla hag̃ua mávapa ofalla. Upéva rangue, jaikuaávo Ñandejára ojesarekoha ñanderehe, koʼýte ñañemoag̃uiseve vaʼerã hese. Jaikuaa haʼe oñatendeha ñanderehe ojepyʼapýgui ha omyengovia porãségui umi mbaʼe porã jajapóva.