Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Akɛ Biblia Mli Anɔkwale lɛ Tee Kooyigbɛ Shɔŋŋ

Akɛ Biblia Mli Anɔkwale lɛ Tee Kooyigbɛ Shɔŋŋ

Yɛ afi 2014 lɛ, Yehowa Odasefoi A-Gbɛtsɔɔmɔ Kuu lɛ to gbɛjianɔ ko ni baahã akɛ Biblia mli anɔkwalei lɛ ayahã mɛi ni yɔɔ Yuropa kɛ Amerika Kooyigbɛ shɔŋŋshɔŋŋ lɛ. (Bɔfoi 1:8) Shishijee lɛ, akɛ hiɛ ma Alaska (U.S.A.), kpokpai tamɔ, Lapland (Finland), Nunavut kɛ Canada Kooyi-Anaigbɛ kpokpai lɛ anɔ.

No mli lɛ, Yehowa Odasefoi kɛ afii ni baashɛ nyɔŋmai ejwɛ eshiɛ yɛ hei ni etse amɛhe nɛɛ. Kɛ̃lɛ, kɛ́ Odasefoi lɛ tee lɛ, amɛyeɔ gbi fioo pɛ, ni bei pii lɛ, Biblia kasemɔ woji titri moŋ amɛhãa titri.

Yɛ gbɛjianɔ hee ni ato nɛɛ naa lɛ, nitsumɔhe niji ni kwɛɔ Yehowa Odasefoi anitsumɔ lɛ nɔ yɛ kooyigbɛ shɔŋŋshɔŋŋ lɛ fɔ̃ nine amɛtsɛ bei fɛɛ sɔɔlɔi (gbɛgbalɔi) koni kɛhooo kwaraa, amɛyaye nyɔji etɛ yɛ jɛmɛ kpokpai lɛ ekomɛi anɔ. Kɛ́ atee hei nɛɛ, ni aná mɛi saŋŋ ni baasumɔ koni akɛ amɛ akase Biblia lɛ, no lɛ shiɛlɔi lɛ baaye fe nyɔji etɛ, ni amɛbaaje asafoŋ kpee shishi koni ahãhãa Maŋshiɛmɔi, ni afee Buu-Mɔɔ nikasemɔ hu.

Anɔkwa, shihilɛ yɛ Kooyigbɛ nɛɛ hiɛ lɛ diɛŋtsɛ enaagbai. Gbɛgbalɔi enyɔ ni akɛtee Barrow yɛ Alaska lɛ, ateŋ mɔ kome jɛ California wuoyigbɛ ni mɔ kroko lɛ jɛ Georgia, U.S.A. Klɛŋklɛŋ kwraa ni amɛtee Barrow lɛ, no mli lɛ fɛ̃i be ni; fɛ̃i lɛ naa waa kwraa tsɔ (minus 38 degrees Celsius (-36°F))! Kɛ̃lɛ, be ni shɛɔ nyɔji fioo lɛ, no mli lɛ amɛsara shĩai ni yɔɔ jɛmɛ lɛ oha mlijaa 95, ni amɛje Biblia mli nikasemɔi ejwɛ shishi; oblanyo ko ni atsɛɔ lɛ John fata mɛi ni akɛkaseɔ nii ahe. Akɛ lɛ kɛ ejɔle kaseɔ wolo ni ji Mɛni Biblia lɛ Tsɔɔ Diɛŋtsɛ? lɛ, ni egbaa enanemɛi kɛ mɛi ni ekɛtsuɔ nii lɛ nibii ni ekaseɔ lɛ. Agbɛnɛ hu, etsɔɔ JW Library app ni yɔɔ efoŋ lɛ nɔ lɛ nɔ ekaneɔ daa gbi ŋmalɛ lɛ kɛjɛɔ Ŋmalɛi lɛ Amli ni Wɔɔkwɛ Daa lɛ mli.

Gbɛjegbɛ ko kwraa bɛ ni jɛɔ Canada kpokpaa ni ji Nunavut lɛ nɔ kɛyaa Rankin. No hewɔ lɛ, gbɛgbalɔi enyɔ ta ɛroplen mli kɛtee akrowa fioo nɛɛ mli, ni amɛkɛ mɛi yaje Biblia mli nikasemɔi ashishi. Be ni nuu ko ekwɛ vidio ni ji Mɛni Yaa Nɔ yɛ Maŋtsɛyeli Asa lɛ Nɔ? lɛ egbe naa lɛ, ebi wɔ akɛ, “Mɛɛ be nyɛbaama Maŋtsɛyeli Asa yɛ biɛ?” Ekɛfata he akɛ, “Kɛ́ ama Asa lɛ, yɛ biɛ lɛ, maba asafoŋ kpee.”

Gbɛgbalɔi ni akɛtee Savukoski, yɛ Finland, he ni daa afi koŋkome ni yɔɔ jɛmɛ lɛ ayi fa fe gbɔmɛi ni yɔɔ maŋ lɛ mli lɛ toi nyɔŋma lɛ, bɔ amaniɛ akɛ, “fɛ̃i lɛ naa wa waa diɛŋtsɛ, ni snoo babaoo nɛɔ.” Kɛ̃lɛ, amɛwie akɛ be ni amɛkɛshɛ jɛmɛ lɛ hi jogbaŋŋ. Mɛni hewɔ? Amɛkɛɛ akɛ: “Wɔnyɛ wɔtsu shikpɔŋkuku lɛ mli nii jogbaŋŋ.” “Ajie snoo lɛ fɛɛ yɛ gbɛi ni yaa akrowai kɛ hei ni etsetsei amɛhe banee lɛ anɔ, ni amɛnɔ ekã shi jogbaŋŋ. Fɛ̃i lɛ naawalɛ hewɔ lɛ, mɛi babaoo hiɔ shĩa.”

Mɔdɛŋ ni wɔbɔ akɛ wɔkɛ Biblia mli anɔkwale lɛ ayahã mɛi ni yɔɔ kooyigbɛ kpokpai lɛ anɔ lɛ egbala mɛi ajwɛŋmɔ kɛba anɔkwale lɛ nɔ. Be ni gbɛgbalɔi enyɔ etee amɛyasara maŋsɔɔlɔ nukpa ko yɛ Alaska maŋ lɛ eko mli sɛɛ lɛ, maŋsɔɔlɔ lɛ kɛ sane ni amɛkɛ lɛ gba lɛ kɛ trat ni ji Mɛni Ji Nyɔŋmɔ Maŋtsɛyeli Lɛ? yawo Intanɛt lɛ nɔ, ni etsɔɔ bɔ ni ehiɛ esɔ nyɛmimɛi lɛ anitsumɔ lɛ waa ehã.

Yɛ maŋ ni ji Haines, yɛ Alaska lɛ, gbɛgbalɔi enyɔ ko fɔ̃ mɛi kpaanyɔ nine kɛba asafoŋ kpee ní afee yɛ maŋ lɛ wojiatoohe lɛ shishi, no sɛɛ lɛ, maŋ lɛ adafitswaa wolo ko bɔ amaniɛ akɛ hii enyɔ komɛi ejɛ Texas kɛ North Carolina amɛba amɛkɛ , aŋkroaŋkro miikase Biblia lɛ yɛ shĩai amli. Amaniɛbɔɔ lɛ ba naagbee nɛkɛ: “Yaa jw.org lɛ nɔ, ni okane enɛ he saji krokomɛi hu.”

Ekrokromɛi Hu Nɛ

Te Yehowa Odasefoi Eto Amɛshiɛmɔ Nitsumɔ lɛ He Gbɛjianɔ Amɛha Tɛŋŋ?

Wɔnyiɛɔ okadi ni Yesu to efɔ̃ shi be ni eyɔɔ shikpɔŋ lɛ nɔ lɛ sɛɛ. Mɛni ji gbɛi ni wɔtsɔɔ nɔ wɔshiɛɔ lɛ ekomɛi?

Mɛni Hewɔ Esa akɛ Okase Biblia Lɛ?

Biblia lɛ miiye miibua mɛi akpekpei komɛi ni yɔɔ jeŋ fɛɛ lɛ kɛmiiná shihilɛ mli sanebimɔi titrii lɛ ahetoo. Ani obaasumɔ ni ofata mɛi nɛɛ ahe?