Yehowa Odasefoi kɛ Biblia shishitsɔɔmɔi srɔtoi etsu nii kɛkase Biblia lɛ. Kɛ̃lɛ, kɛ́ ayɛ Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ yɛ wiemɔ ko mli lɛ, wɔsumɔɔ waa akɛ wɔkɛ no atsu nii ejaakɛ ekɛ Nyɔŋmɔ gbɛ́i lɛ tsuɔ nii, shishitsɔɔmɔ lɛ ja jogbaŋŋ, ni emli kã shi faŋŋ.

•   Nyɔŋmɔ gbɛ́i lɛ kɛnitsumɔ. Biblia kalalɔi komɛi kɛ anunyam hãaa eŋmalɔ lɛ yɛ hei ni esa akɛ amɛŋɔ anunyam amɛhã lɛ yɛ lɛ. Akɛ nɔkwɛmɔnɔ lɛ, yɛ Biblia shishitsɔɔmɔ ko mli lɛ, aŋmala mɛi ni fe 70 ni ye amɛbua kɛkala Biblia lɛ agbɛ́i yɛ nakai Biblia lɛ mli. Kɛ̃lɛ, ajie Nyɔŋmɔ gbɛ́i ni ji Yehowa lɛ moŋ kɛje nakai Biblia shishitsɔɔmɔ lɛ mli kwraa!

   Nɔ ni tamɔɔɔ nakai lɛ, Jeŋ Hee Shishitsɔɔmɔ lɛ kɛ gbɛ́i krɔŋkrɔŋ nɛɛ esaa ewo hei fɛɛ ni ejeɔ kpo yɛ, yɛ Hebri Ŋmalɛi lɛ amli lɛ pɛpɛɛpɛ, shi, etsɔɔɔ mɛi ni ye amɛbua kɛkala lɛ agbɛ́i.

•   Eja jogbaŋŋ. Jeee Biblia shishitsɔɔmɔi lɛ fɛɛ tsɔɔ Biblia lɛ shishi yɛ gbɛ ni ja nɔ. Akɛ nɔkwɛmɔnɔ lɛ, Biblia shishitsɔɔmɔ ko tsɔɔ Mateo 7:​13 lɛ shishi yɛ nɛkɛ gbɛ nɔ: “Nyɛbotea agbo fiŋtɔɔ lɛ mli, ejaakɛ agbo ni lɛɛ kɛ gbɛ tɛtɛrɛɛ ji nɔ ni kɛmɔ yaa hɛl, ni emli yaa jaraaa.” Nɔ ni tamɔɔɔ nakai lɛ, wiemɔ ni akɛ tsu nii be ni aŋma Biblia lɛ klɛŋklɛŋ kwraa lɛ ji “hiɛkpatamɔ,” shi jeee “hɛl.” Ekolɛ, Biblia shishitsɔɔlɔi lɛ kɛ wiemɔ “hɛl” lɛ tsu nii akɛni amɛheɔ amɛyeɔ akɛ abaapiŋ efɔŋfeelɔi lɛ yɛ hɛl la mli kɛya naanɔ lɛ hewɔ. Shi, Biblia lɛ fĩii nakai tsɔɔmɔ lɛ sɛɛ. Kɛ̃lɛ, Jeŋ Hee Shishitsɔɔmɔ lɛ tsɔɔ shishi yɛ gbɛ ni ja nɔ akɛ: “Nyɛtsɔa agbó bibioo lɛ mli, ejaakɛ agbó ni da kɛ gbɛ ni lɛɛ lɛ ji nɔ ni kɛ mɔ yaa hiɛkpatamɔ mli.”

•   Emli kã shi faŋŋ. Esa akɛ shishitsɔɔmɔ ni ja lɛ afee nɔ ni mli kã shi faŋŋ, ni eshishinumɔ hu waaa. Susumɔ nɔkwɛmɔnɔ nɛɛ he okwɛ. Wiemɔ ni Kristofonyo bɔfo Paulo kɛtsu nii yɛ Romabii 12:11 lɛ, shishinumɔ ŋmiiŋmi ji “mumɔ lɛ atswa.” Akɛni ŋmɛnɛ lɛ, wiemɔ nɛɛ shishinumɔ bɛ faŋŋ hewɔ lɛ, Jeŋ Hee Shishitsɔɔmɔ lɛ kɛ wiemɔ ni shishinumɔ yɔɔ faŋŋ ni ewaaa hu tsu nii. Etsɔɔ shishi akɛ, esa akɛ Kristofoi ‘afee ekãa yɛ mumɔ lɛ naa.’

 Jeŋ Hee Shishitsɔɔmɔ lɛ kɛ Nyɔŋmɔ gbɛ́i lɛ tsu nii, eja, ni eshishinumɔ waaa. Nɔ kroko hu ni sa kadimɔ waa yɛ he ji: Akɛhãa mɔ fɛɛ mɔ, ni ahɔɔɔ hu. No hewɔ lɛ, mɛi babaoo nyɛɔ amɛkaneɔ Biblia lɛ yɛ amɛ diɛŋtsɛ amɛwiemɔ mli. Mɛi ni kulɛ, amɛnyɛŋ amɛhé Biblia lɛ po yɛ eko.