KƐ MƆ ko fee nɔ ko kpakpa ko kɛha bo lɛ, ani osumɔɔ?— Ojogbaŋŋ, mɛi krokomɛi hu sumɔɔ kɛ mɔ ko fee nɔ ko kpakpa ko kɛha amɛ. Wɔ fɛɛ wɔsumɔɔ nakai. Tsɔɔlɔ Kpele lɛ le enɛ, ni efeɔ nii ehaa mɛi be fɛɛ be. Ekɛɛ akɛ: ‘Mibaaa koni asɔmɔ mi, shi moŋ koni masɔmɔ.’—Mateo 20:28.

No hewɔ lɛ, kɛji akɛ wɔmiisumɔ ni wɔtamɔ Tsɔɔlɔ Kpele lɛ, mɛni esa akɛ wɔfee?— Esa akɛ wɔsɔmɔ mɛi krokomɛi. Esa akɛ wɔfee nibii kpakpai wɔha amɛ. Eji anɔkwale akɛ mɛi pii efeee enɛ. Yɛ anɔkwale mli lɛ, gbɔmɛi pii sumɔɔ ni mɛi krokomɛi asɔmɔ amɛ be fɛɛ be. Be ko lɛ, Yesu sɛɛnyiɛlɔi lɛ po nu he nakai. Amɛteŋ mɔ fɛɛ mɔ miitao ni etsɔ mɔ ni je agbo fe fɛɛ loo mɔ ni he hiaa fe fɛɛ.

Gbi ko lɛ, Yesu kɛ ekaselɔi, ni ji esɛɛnyiɛlɔi lɛ miifã gbɛ. Beni amɛbote Kapernaum, ni ji maŋ ni yɔɔ Galilea Ŋshɔ lɛ masɛi lɛ mli lɛ, amɛ fɛɛ amɛtee shia ko mli. Kɛkɛ ni Yesu bi amɛ sane ko yɛ jɛmɛ, akɛ: “Mɛni sane nyɛye yɛ nyɛteŋ yɛ gbɛ lɛ nɔ lɛ?” Amɛfee diŋŋ, ejaakɛ beni amɛyaa yɛ gbɛ lɛ nɔ lɛ, amɛje ŋwane yɛ mɔ ni ji agbo fe fɛɛ yɛ amɛteŋ lɛ he.—Marko 9:33, 34.

 Yesu le akɛ ejaaa akɛ ekaselɔi lɛ ateŋ mɔ ko aaasusu akɛ lɛ ji agbo fe fɛɛ. No hewɔ lɛ, tamɔ bɔ ni wɔkase yɛ wolo nɛɛ klɛŋklɛŋ yitso lɛ mli lɛ, eha gbekɛ bibioo ko badamɔ amɛteŋ, ni ekɛɛ amɛ akɛ esa akɛ amɛba amɛhe shi tamɔ gbekɛ bibioo lɛ. Kɛlɛ, amɛkaseee enɛ feemɔ. Beni eshwɛ fioo ni Yesu baagbo lɛ, etsɔɔ amɛ nikasemɔ ko ni amɛhiɛ kpaŋ nɔ gbi ko gbi ko. Mɛni efee?—

Beni amɛ fɛɛ amɛyeɔ nii kutuu lɛ, Yesu te shi kɛjɛ okpɔlɔ lɛ he ni ejie ekponɔgbɛ atadei lɛ eshwie shi. Ekɔ papam, ni ekɛfi ehɛ. Kɛkɛ ni ewo okpolu ni etsɔ nu ewo mli. Ekolɛ esɛɛnyiɛlɔi lɛ susu nɔ ni ebaafee lɛ he.

Beni amɛkwɛɔ Yesu lɛ, etee amɛ fɛɛ amɛŋɔɔ, ekula shi, ni efɔ́ amɛnaji ahe. Kɛkɛ ni ekɛ papam lɛ tsumɔ amɛnaji ahe. Bo lɛ susumɔ enɛ he okwɛ! Eji oyɛ jɛmɛ kulɛ, mɛni obaafee? Kulɛ te obaanu he oha tɛŋŋ?—

Esɛɛnyiɛlɔi lɛ nuuu he akɛ eja akɛ Tsɔɔlɔ Kpele lɛ aaasɔmɔ amɛ yɛ nɛkɛ gbɛ nɔ. Amɛhiɛ gboi. Yɛ anɔkwale mli lɛ Petro ekpɛlɛɛɛ nɔ akɛ Yesu aaatsu sɔɔmɔ ni baa shi nɛɛ eha lɛ. Shi Yesu kɛɛ akɛ ehe miihia ni efee nakai.

Wɔfɔɔɔ mɛi krokomɛi anaji ahe ŋmɛnɛ. Shi afee enɛ yɛ be mli ni Yesu yɔɔ shikpɔŋ nɔ lɛ. Ani ole nɔ hewɔ ni afee nakai?— Ojogbaŋŋ, gbɔmɛi kɛ amɛnaji foji woɔ tokotai yɛ maji ni Yesu kɛ esɛɛnyiɛlɔi lɛ hi nɔ lɛ nɔ. No hewɔ lɛ, kɛji akɛ amɛnyiɛ gbɛjegbɛi ni mulu yɔɔ nɔ lɛ anɔ lɛ, amɛnaji ahe woɔ muji. Eji mlihilɛ akɛ mɔ ko aaafɔ mɔ ni baa shia lɛ mli lɛ naji ahe mulu lɛ.

Shi kɛbashi nɛkɛ be nɛɛ mli lɛ, Yesu kaselɔi lɛ ateŋ mɔ ko kɛ ehe hako akɛ eeefɔ mɛi krokomɛi lɛ anaji ahe. No hewɔ lɛ, Yesu diɛŋtsɛ fee nakai. Yesu tsɔ enɛ feemɔ nɔ etsɔɔ ekaselɔi lɛ nikasemɔ ko ni he hiaa. Ehe miihia ni amɛkase nɛkɛ nii nɛɛ. Ni eji nɔ ko ni ehe hiaa ni wɔkase ŋmɛnɛ.

 Ani ole nɔ ni nikasemɔ lɛ ji?— Beni Yesu wo ekponɔgbɛ atadei ni eta shi yɛ okpɔlɔ lɛ he lɛ, etsɔɔ mli akɛ: “Nyɛle nɔ ni mifee nyɛ nɛɛ lo? Nyɛ lɛ nyɛtsɛ́ɔ mi tsɔɔlɔ kɛ Nuŋtsɔ; ni nyɛtɔ̃ɔɔ naa, ejaakɛ nakai ji mi. Agbɛnɛ, kɛji mi, tsɔɔlɔ kɛ Nuŋtsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe.”—Yohane 13:2-14.

Tsɔɔlɔ Kpele lɛ tsɔɔ yɛ biɛ akɛ eesumɔ ni esɛɛnyiɛlɔi lɛ asɔmɔsɔmɔɔ amɛhe. Esumɔɔɔ ni amɛsusu amɛ pɛ amɛhe. Esumɔɔɔ ni amɛsusu akɛ amɛhe hiaa waa aahu akɛ esa akɛ mɛi krokomɛi asɔmɔ amɛ be fɛɛ be. Eesumɔ ni amɛjɛ amɛsuɔmɔ mli amɛsɔmɔ mɛi krokomɛi.

Ani enɛ jeee nikasemɔ ni hi jogbaŋŋ?— Ani obaasumɔ ni ofee tamɔ Tsɔɔlɔ Kpele lɛ koni osɔmɔ mɛi krokomɛi?— Wɔ fɛɛ wɔbaanyɛ wɔfee nii wɔha mɛi krokomɛi. Enɛ baaha amɛná miishɛɛ. Shi nɔ ni hi fe fɛɛ lɛ, ebaaha Yesu kɛ e-Tsɛ lɛ aná miishɛɛ.

Shi ewaaa akɛ aaasɔmɔ mɛi krokomɛi. Kɛji akɛ okɛ ohiɛ fɔ̃ shi lɛ, obaana nibii pii ni obaanyɛ ofee oha mɛi krokomɛi. Susumɔ enɛ he okwɛ amrɔ nɛɛ: Ani nɔ ko yɛ ni obaanyɛ ofee ni okɛye obua omami?  Ole akɛ efeɔ nibii pii kɛhaa bo kɛ mɛi krokomɛi ni yɔɔ weku lɛ mli lɛ. Ani obaanyɛ oye obua lɛ?— Mɛni hewɔ obiii lɛ?

Ekolɛ obaanyɛ oto okpɔlɔ lɛ dani weku lɛ aye nii. Aloo ekolɛ obaanyɛ ojie okpɔlɔ lɛ nɔ plɛtei ni aye nii yɛ mli lɛ kɛ́ weku lɛ gbe niyeli lɛ naa. Gbekɛbii komɛi yatsiɔ jwɛi amɛshwieɔ daa gbi. Nɔ fɛɛ nɔ ni obaanyɛ ofee lɛ, okɛsɔmɔɔ mɛi krokomɛi, taakɛ Yesu fee lɛ.

Ani oyɛ nyɛmimɛi hii kɛ yei bibii ni obaanyɛ osɔmɔ amɛ? Kaimɔ akɛ, Yesu ni ji Tsɔɔlɔ Kpele lɛ po sɔmɔ esɛɛnyiɛlɔi lɛ. Kɛji akɛ osɔmɔ onyɛmimɛi hii kɛ yei bibii lɛ, belɛ ookase Yesu. Mɛni obaanyɛ ofee oha amɛ?— Ekolɛ obaanyɛ oye obua amɛ ni amɛkɛ amɛshwɛmɔ nii lɛ ayato kɛ́ amɛkɛshwɛ amɛgbe naa. Aloo ekolɛ obaanyɛ oye obua amɛ ni amɛsaa amɛhe. Aloo ekolɛ obaanyɛ oye obua amɛ ni amɛŋmɛ amɛsaa koni amɛyawɔ. Ani obaanyɛ  osusu nɔ kroko ni obaanyɛ ofee oha amɛ lɛ he?— Kɛ ofee nibii nɛɛ oha amɛ lɛ amɛbaasumɔ osane waa, tamɔ bɔ ni Yesu sɛɛnyiɛlɔi lɛ sumɔ lɛ lɛ.

Obaanyɛ osɔmɔ mɛi krokomɛi hu yɛ skul. Ekolɛ obaanyɛ osɔmɔ oklasbii loo otsɔɔlɔ lɛ. Kɛji akɛ mɔ ko woji shwie shikpɔŋ lɛ, ebaafee mlihilɛ yɛ ogbɛfaŋ akɛ oooye obua lɛ ni ekɔlɔ. Obaanyɛ ni okɛ ohe aha ni otsumɔ nyɛ skultsu mli tao wulu lɛ nɔ aloo ofee nɔ kroko oha nyɛ tsɔɔlɔ lɛ. Shinaa ni ooogbele oha mɔ ko lɛ po ji nifeemɔ ni mlihilɛ yɔɔ mli.

Yɛ bei komɛi amli lɛ, wɔbaana akɛ gbɔmɛi edaŋ wɔ shi yɛ sɔɔmɔ ni wɔkɛhaa amɛ lɛ hewɔ. Ani osusuɔ akɛ esa akɛ enɛ aha wɔkpa ekpakpa ni wɔfeɔ lɛ?— Dabi! Mɛi pii edaaa Yesu shi yɛ enibii kpakpai ni efee lɛ hewɔ. Shi no haaa ekpa ekpakpa ni efeɔ lɛ.

No hewɔ lɛ, nyɛkahaa wɔkpaa sɔɔmɔ ni wɔkɛhaa mɛi krokomɛi lɛ kɔkɔɔkɔ. Nyɛhaa wɔkaia Tsɔɔlɔ Kpele ni ji Yesu, koni wɔbɔ mɔdɛŋ wɔnyiɛ enɔkwɛmɔnɔ lɛ sɛɛ be fɛɛ be.