NIKASEMƆ 6
David Sheee Gbeyei
Kɛ́ nɔ ko wo ohe gbeyei lɛ mɛni ofeɔ?— Ekolɛ oyaa omami kɛ opapa ŋɔɔ koni amɛwa bo. Shi mɔ kroko hu yɛ ni baanyɛ awa bo hu. Nakai mɔ lɛ he wa fe mɔ fɛɛ mɔ. Ole mɔ ni ji?— Hɛɛ, lɛ ji Yehowa Nyɔŋmɔ. Ha wɔsusu oblanyo fioo ko ni atsɛɔ lɛ David ni awie ehe yɛ Biblia lɛ mli lɛ he. Ele akɛ Yehowa baaye abua lɛ be fɛɛ be, no hewɔ lɛ, esheee gbeyei.
Beni David ji abifao tɔŋŋ ni efɔlɔi bɔi lɛ tsɔsemɔ koni esumɔ Yehowa. Enɛ ye ebua David koni ekashe gbeyei. Beni ekɛ shihilɛ ni yɔɔ gbeyei po kpe lɛ, esheee gbeyei. Ele akɛ e-Naanyo ji Yehowa ni Ebaaye ebua lɛ. Be ko beni David miikwɛ toi lɛ, jata agbo ko bamɔ too lɛ eko! Ole nɔ ni David fee? Enyiɛ jata lɛ sɛɛ ni egbele lɛ, ni eeenyɛ efee akɛ egbele lɛ kɛ enine folo! No sɛɛ beni oshishibrishii ko batutua toi lɛ, David gbe no hu! Namɔ osusuɔ akɛ eye ebua David?— Hɛɛ, Yehowa ni wa lɛ.
Yɛ be kroko mli lɛ, David tsɔɔ akɛ eyɛ ekãa waa. No mli lɛ, Israelbii lɛ kɛ mɛi komɛi ni atsɛɔ amɛ Filistibii lɛ miiwu ta. Filistibii ni baa amɛbanɔ lɛ ateŋ mɔ kome kwɔ waa, eje oblaŋ! Atsɛɔ lɛ Goliat. Nɛkɛ Filistinyo nɛɛ ye Israelbii lɛ kɛ Yehowa he fɛo. Goliat kɛɛ Israelbii lɛ akɛ kɛ́ amɛmiisumɔ lɛ, amɛba ni amɛkɛ lɛ abanɔ. Shi Israelbii lɛ fɛɛ she gbeyei. Beni David nu sane lɛ he lɛ, ekɛɛ Goliat akɛ: ‘Mikɛ bo baanɔ! Yehowa baawa mi, ni maye onɔ kunim!’ Kɛ́ okwɛ lɛ, ani David yɛ ekãa loo ebɛ ekãa?— Hɛɛ, eyɛ ekãa waa. No sɛɛ lɛ ole nɔ ni ba?
David kɔ ekromia lɛ ni ekɔlɔ fɔbitɛi enumɔ ni etee ni ekɛ oblaŋ lɛ ayanɔ. Beni Goliat na akɛ gbekɛ ji David lɛ, eye ehe fɛo. Shi David kɛɛ lɛ akɛ: ‘Ooba miŋɔɔ kɛ klante, shi mi lɛ miiba oŋɔɔ yɛ Yehowa gbɛ́i amli!’ Kɛkɛ ni ejo foi ni ekɛ Goliat ayakpe, ni ekɔ tɛ ewo akromia lɛ mli ni efɔ̃. Tɛ lɛ yatswa Goliat hiɛnaa tuuntu! Oblaŋ lɛ gbee shi ni egbo! Filistibii lɛ atsui fã waa ni amɛ fɛɛ amɛjo foi. Te fee tɛŋŋ ni oblanyo fioo tamɔ David nyɛ egbe oblaŋ lɛ?— Yehowa ni ye ebua lɛ, Yehowa he wa kwraa fe nakai oblaŋ lɛ!
David sheee gbeyei ejaakɛ ele akɛ Yehowa baawa lɛ
Mɛni okaseɔ kɛjɛɔ David sane lɛ mli?— Yehowa he wa fe mɔ fɛɛ mɔ. Ni eji o-Naanyo. No hewɔ lɛ, kɛ́ nɔ ko wo ohe gbeyei lɛ, kaimɔ akɛ Yehowa baanyɛ ewa bo ni ofee ekãa!
