Ani gbi lɛ ŋmalɛ kɛ emligbalamɔ ni yɔɔ Ŋmalɛi Lɛ Amli Ni Wɔɔkwɛ Daa lɛ mli lɛ kanemɔ fata nibii ni ofeɔ daa gbi koni otsi obɛŋkɛ Yehowa kpaakpa lɛ ahe? Kɛ́ ofeee nakai lɛ, ani obaanyɛ okɛ no hu afata he? Mɛi pii kwɛɔ gbi lɛ ŋmalɛ lɛ mli leebi mra koni sɛɛ mli lɛ, amɛnyɛ amɛjwɛŋ emli saji lɛ anɔ be ni amɛfeɔ nibii krokomɛi lɛ. (Yos 1:8; La 119:97) Mɛɛ gbɛ nɔ obaanyɛ oná gbi lɛ ŋmalɛ lɛ he sɛɛ babaoo? Kanemɔ kukuji ni tsɔ gbi lɛ ŋmalɛ lɛ hiɛ kɛ nɔ ni nyiɛ sɛɛ lɛ koni onu shishi jogbaŋŋ. Kwɛmɔ akɛ obaakai Biblia mli sane ko ni shishitoo mla ni yɔɔ gbi lɛ ŋmalɛ lɛ mli lɛ kɔɔ he lo. No sɛɛ lɛ, okɛ shishitoo mla lɛ atsu nii. Kɛ́ okpɛ oyiŋ yɛ Biblia mli shishitoo mlai anaa lɛ, ebaakudɔ oshihilɛ ni obaaná he sɛɛ waa.​—La 119:105.

Betel wekui ni yɔɔ jeŋ fɛɛ lɛ susuɔ gbi lɛ ŋmalɛ lɛ he yɛ be ni amɛkɛyeɔ leebi nii lɛ mli. Gbii etɛ nɛɛ, akɛ gbi lɛ ŋmalɛ lɛ hesusumɔi lɛ ekomɛi woɔ JW Broadcasting^® lɛ nɔ yɛ fã ni ji, NIFEEMƆI KƐ GWABƆI lɛ shishi. Mɛɛ be nɛ ni okwɛ eko loo ekomɛi? Ekolɛ nɔ ni awie he yɛ eko mli lɛ ji nɔ ni baatsu osane ko he nii. Akɛ nɔkwɛmɔnɔ lɛ, mɛɛ gbɛ nɔ Lot sane lɛ baawa bo kɛji ookpɛ yiŋ?

KWƐMƆ VIDIO NI JI, KAASUMƆ JE LƐ (1YO 2:15), KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• Mɛɛ Biblia mli shishitoo mla awie he yɛ Leebi Jamɔ nifeemɔ nɛɛ mli?

• Mɛni Lot sane lɛ tsɔɔ wɔ yɛ oshãra ni yɔɔ je lɛ loo nibii ni yɔɔ mli lɛ ni wɔbaasumɔ lɛ he?​—1Mo 13:12; 14:12; 19:3, 12, 13, 24-26

• Te wɔfeɔ tɛŋŋ wɔtsɔɔ akɛ wɔsumɔɔ Yehowa shi jeee je lɛ loo nibii ni yɔɔ mli lɛ?