SANEYITSO LƐ MLITSƆƆMƆ | NAMƐI JI YEHOWA ODASEFOI?
Nɛgbɛ anáa shika yɛ kɛtoɔ wɔshiɛmɔ nitsumɔ lɛ he gbɛjianɔ?
Daa afi lɛ, wɔkalaa Biblia kɛ Biblia kasemɔ woji akpekpei ohai abɔ, ni wɔjaraa. Wɔmamɔɔ nitsumɔhe niji kɛ hei ni akalaa woji yɛ, yɛ hei srɔtoi yɛ jeŋ fɛɛ. Asafoi akpei nyɔŋmai abɔ kpeɔ yɛ jamɔhei ni yɔɔ fɛo ni bɛ haŋtsii ni atsɛɔ amɛ Maŋtsɛyeli Asai lɛ amli. Nɛgbɛ anáa shika yɛ kɛwoɔ enɛɛmɛi fɛɛ he nyɔmɔ?
Onia ni mɛi jɛɔ amɛsuɔmɔ mli amɛtsuɔ lɛ pɛ ji nɔ ni akɛtsuɔ wɔnitsumɔ lɛ fɛɛ. (2 Korintobii 9:7) Yɛ afi 1879 lɛ, aŋma yɛ magazin nɛɛ nɔ ni ji enyɔ nɔ ni akala lɛ mli akɛ: “Wɔheɔ wɔyeɔ akɛ YEHOWA ji mɔ ni fiɔ ‘Zion’s Watch Tower’ lɛ [taakɛ atsɛɔ magazin nɛɛ yɛ nakai beiaŋ lɛ] sɛɛ, ni be mli ni efeɔ enɛ lɛ, wɔkpaŋ mɛi fai, ni asaŋ wɔbiŋ mɛi koni amɛye amɛbua wɔ kɛ shika.” Wɔkã he wɔkɛ gbɛtsɔɔmɔ nɛɛ miitsu nii lolo.
Mɛi kɛ shika majeɔ wɔnitsumɔhe niji srɔtoi lɛ tɛ̃ɛ, loo amɛkɛwoɔ oniatsumɔ adekai ni yɔɔ Maŋtsɛyeli Asai lɛ eko fɛɛ eko nɔ lɛ amli. Shi wɔheee mlijaa nyɔŋma, wɔheee shika kɛjɛɛɛ mɛi adɛŋ, ni kɛ́ wɔkɛ wɔwoji lɛ hã mɛi loo wɔshiɛ wɔhã mɛi hu lɛ, wɔheee shika. Awooo wɔ nyɔmɔ kɛ́ wɔshiɛ, wɔtsɔɔ nii yɛ asafoŋ kpeei ashishi, loo wɔye wɔbua kɛmamɔ jamɔhei. Nɔ hewɔ ji akɛ, Yesu kɛɛ akɛ: “Yaka nyɛná, yaka nyɛŋɔhãa.” (Mateo 10:8) Awooo mɛi ni sɔmɔɔ yɛ wɔnitsumɔhe niji kɛ wɔnitsumɔhe yitso lɛ nyɔmɔ, ni awooo Yehowa Odasefoi a-Gbɛtsɔɔmɔ Kuu lɛ mli bii ni tsuɔ nii yɛ jɛmɛ lɛ hu nyɔmɔ.
“Yehowa Odasefoi jɛɔ amɛsuɔmɔ mli amɛfeɔ nɔ fɛɛ nɔ, ni amɛjɛɔ amɛsumɔ mli amɛtsuɔ onia kɛtsuɔ amɛjamɔ lɛ he nii, ni mɔ fɛɛ mɔ kpɛɔ eyiŋ yɛ shika falɛ kɛ shii abɔ ni lɛ diɛŋtsɛ esumɔɔ ni ‘etsu onia’ lɛ he.”—Yuropabii Asaneyelihe ni Yeɔ Hegbɛi ni Adesai Yɔɔ lɛ Ahe Saji, 2011
Akɛ onia ni atsuɔ lɛ hu eko yeɔ buaa kɛ́ oshara ko ba. Mra be mli Kristofoi lɛ tsu onia ni akɛye abua mɛi ni efi amɛ lɛ. (Romabii 15:26) Wɔ hu kɛ́ oshara ko ba lɛ, wɔyeɔ wɔbuaa kɛtsɔ mɛi ashĩai kɛ jamɔhei ní wɔsaa wɔmamɔɔ wɔhãa amɛ, kɛ agbɛnɛ niyenii, atade, kɛ tsofai ni wɔhãa amɛ lɛ nɔ.
Ekolɛ Obaasumɔ Enɛ Hu
BUU-MƆƆ—NIKASEMƆ NƆ
Bɔ ni Wɔɔfee Wɔye Wɔbua Kɛtsu Mɛi Krokomɛi Ahiamɔ Nii Ahe Nii
Obaana gbɛi ni mɛi komɛi tsɔɔ nɔ amɛtsuɔ onia kɛfĩɔ nitsumɔ ni Yehowa Odasefoi tsuɔ yɛ jeŋ fɛɛ kɛyeɔ amɛbuaa mɛi koni amɛná amɛheloonaa kɛ amɛmumɔŋ hiamɔ nii lɛ sɛɛ.
Bɔ Ni Obaafee Otsu Onia Kɛtsɔ Intanɛt Lɛ Nɔ
Kwɛmɔ gbɛi srɔtoi ni atsɔɔ nɔ atsuɔ onia kɛ nibii ni obaanyɛ okɛtsu nii kɛtsu onia.
