Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) NOVEMBER 2013

Bɔ ni Wɔɔfee Wɔye Wɔbua Kɛtsu Mɛi Krokomɛi Ahiamɔ Nii Ahe Nii

Bɔ ni Wɔɔfee Wɔye Wɔbua Kɛtsu Mɛi Krokomɛi Ahiamɔ Nii Ahe Nii

ASAFOŊ onukpa ko ni atsɛɔ lɛ François, ni yɔɔ maŋ ko ni mɛi babaoo bɛ nii tsɔ lɛ mli lɛ wie akɛ: “Oshiki ko ni afɔ̃ lɛ kɛ basabasafeemɔ ba maŋ lɛ mli, ni no ha Yehowa Odasefoi akpei abɔ jo foi kɛshi amɛshĩai.” Ekɛfata he akɛ: “Niyenii kɛ tsofãi ahe basɛ̃, ni nɔ ni yɔɔ lɛ hu ajara bawa waa. Aŋamɔ shikatoohei, ni tsɔji ni ajieɔ shika yɛ mli lɛ hu kpa nitsumɔ.”

Oya nɔŋŋ kɛkɛ ni nyɛmimɛi ni tsuɔ ni yɛ nitsumɔhe nine lɛ kɛ shika kɛ nibii ni he baahia Odasefoi ni eyato Maŋtsɛyeli Asai ni yɔɔ maŋ lɛ mli lɛ anɔ lɛ yaha amɛ. Kui ni kɛ amɛhe tswaa lɛ kɛ nibii tsimɔ gbɛjegbɛi ni yɔɔ maŋ lɛ mli lɛ babaoo, shi akɛni kui enyɔ lɛ fɛɛ le akɛ Odasefoi lɛ fĩii afã ko sɛɛ hewɔ lɛ, bei pii lɛ, amɛhaa nitsumɔhe nine lɛ tsɔji lɛ gbɛ.

Nyɛminuu François wie akɛ: “Be ko beni wɔnyiɛ gbɛ kɛmiiya he ko ni Maŋtsɛyeli Asa ko yɔɔ lɛ, mɛi komɛi ni ewo antɛo lɛ bɔi wɔtsɔne lɛ tu tswaramɔ. Shi tuŋtɛ lɛ eko esaaa wɔhe. Beni wɔna akɛ asraafonyo ko ni hiɛ tu lɛ miiba ekɛ wɔ abakpe lɛ, wɔwo tsɔne lɛ foi kɛtee sɛɛsɛɛ, kɛkɛ ni wɔdɔ wɔhe ni wɔkɛ foi tee nitsumɔhe nine lɛ ekoŋŋ. Wɔda Yehowa shi akɛ wɔgboiii. Enɔ jetsɛremɔ lɛ, nyɛmimɛi 130 ni yɔɔ nakai Maŋtsɛyeli Asa lɛ nɔ lɛ shi kɛtee he ko ni yɔɔ shweshweeshwe. Amɛteŋ mɛi komɛi ba nitsumɔhe nine lɛ, ni wɔha amɛ amɛmumɔŋ kɛ heloonaa hiamɔ nii kɛyashi nibii amli jɔ.”

Nyɛminuu François kɛɛ akɛ: “Sɛɛ mli lɛ, nyɛmimɛi ni yɔɔ maŋ lɛ mli lɛ babaoo ŋmala nitsumɔhe nine lɛ woji kɛda amɛ shi yɛ yelikɛbuamɔ ni amɛkɛha amɛ lɛ hewɔ.” Etsɔɔ mli akɛ, “Bɔ ni nyɛmimɛi jɛ hei krokomɛi baye amɛbua amɛ lɛ ha hekɛnɔfɔɔ ni amɛyɔɔ yɛ Yehowa mli lɛ mli wa.”

Kɛ́ oshara ko ba lɛ, wɔkɛɛɛ wɔnyɛmimɛi ni efĩ amɛ lɛ akɛ, “nyɛyawerea la, ni nyɛyayea nii nyɛtɔrɔa” kɛkɛ. (Yak. 2:15, 16) Moŋ lɛ, wɔtaoɔ gbɛi anɔ ni wɔɔtsɔ wɔkɛ heloonaa nibii aye abua amɛ. Yɛ klɛŋklɛŋ afii 100 lɛ mli hu lɛ, beni nyɛmimɛi lɛ ná le akɛ hɔmɔ baaba lɛ, “kaselɔi lɛ kpɛ mli akɛ amɛaatsu nɔ ko amɛmaje nyɛmimɛi ni yɔɔ Yudea lɛ ni amɛkɛyafɛne amɛ, mɔ fɛɛ mɔ bɔ ni ooonyɛ.”—Bɔf. 11:28-30.

Akɛ Yehowa tsuji lɛ, wɔmiisumɔ ni wɔkɛ heloonaa nibii aye abua mɛi ni efĩ amɛ lɛ. Shi mumɔŋ yelikɛbuamɔ hu he miihia mɛi. (Mat. 5:3) Enɛ hewɔ lɛ, Yesu fã esɛɛnyiɛlɔi lɛ ni amɛyafee mɛi kaselɔi, bɔni afee ni amɛha mɛi lɛ ana akɛ esa akɛ aye abua amɛ yɛ mumɔŋ, ni amɛfee tsakemɔi ni sa yɛ amɛshihilɛ mli. (Mat. 28:19, 20) Wɔteŋ mɔ fɛɛ mɔ kɛ ebe, ehewalɛ, kɛ nibii ni eyɔɔ lɛ tsuɔ nakai fãmɔ lɛ he nii. Asafo lɛ kɛ oniai ni atsuɔ lɛ eko tsuɔ mɛi aheloonaa hiamɔ nii ahe nii, shi nɔ titri ni akɛfeɔ ji, akɛtsuɔ Maŋtsɛyeli lɛ he nibii ahe nii, ni akɛ eko yeɔ abuaa kɛgbɛɔ sane kpakpa lɛ ashwãa. No hewɔ lɛ, wɔkɛ onia ni wɔtsuɔ lɛ tsɔɔ akɛ wɔsumɔɔ Nyɔŋmɔ kɛ wɔnanemɛi.—Mat. 22:37-39.

Mɛi ni tsuɔ onia kɛfĩɔ Yehowa Odasefoi anitsumɔ lɛ sɛɛ lɛ baanyɛ aná nɔmimaa akɛ, akɛ oniai ni amɛtsuɔ lɛ tsuɔ nii yɛ gbɛ ni hi fe fɛɛ nɔ. Ani obaanyɛ oye obua onyɛmimɛi ni yelikɛbuamɔ he miihia amɛ lɛ? Ani oosumɔ ni okɛ nɔ ko afĩ kaselɔfeemɔ nitsumɔ lɛ sɛɛ? Kɛ́ nakai lɛ, “mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli.”—Abɛi 3:27.