Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ SEPTEMBER 2015

 WALA SHIHILƐ HE SANE

Miná Nɔ Ko ni Jara Wa Kwraa Fe Gbɛ́ihemɔ

Miná Nɔ Ko ni Jara Wa Kwraa Fe Gbɛ́ihemɔ

Gbi ko gbɛkɛ yɛ afi 1984 lɛ, mishihilɛ tsake kwraa; mibahe gbɛ́i waa akɛ oblayoo. Awó mi “Miss Hong Kong.” Asha mi mfoniri awo magazin srɔtoi kɛ adafitswaa woji babaoo hiɛ. Milá, mijo, mihã wiemɔ srɔtoi, miwie yɛ TV nɔ nifeemɔi amli, miwo atade fɛfɛji, ni mikɛ hiɛnaanɔbii, tamɔ Hong Kong nɔyelɔ lɛ shara.

Enɔ afi lɛ, mibɔi sini feemɔ, ni bei pii lɛ miji mɔ titri ni agbalaa jwɛŋmɔ kɛyaa enɔ waa yɛ sini lɛ mli. Be fɛɛ be lɛ, adafitswalɔi miitao ni amɛkɛ mihe saji awo amɛwoji amli, mfonirishalɔi taoɔ ni amɛsha mi mfoniri, ni kɛ́ mɛi fee sini hee lɛ, amɛsumɔɔ ni mahi jɛmɛ dani ajie sini lɛ kpo, mɛi sumɔɔ ni kɛ́ abaagbele nitsumɔ loo nɔ ko hee naa lɛ, mahi jɛmɛ ni mafo kpãa lɛ, ni mɛi sumɔɔ ni amɛfɔ̃ mi nine kɛhã niyeli yɛ niyelihei kɛ hei krokomɛi. Be fɛɛ be lɛ, mɛi ajwɛŋmɔ yɛ minɔ.

Yɛ sini ko mli

Shi fiofio lɛ, mibayɔse akɛ nibii nɛɛ hãaa maná miishɛɛ ni mitaoɔ ní maná lɛ. Sinii ni mifee lɛ titri ji nɔ ni anɔ̃ɔ yɛ mli, ni enɛ yɛ oshara waa. Bei pii kɛ́ aafee sini lɛ, ahãa mɛi krokomɛi feɔ hei ni yɔɔ oshara lɛ moŋ fe ni abaahã mɛi ni yɔɔ sini lɛ mli lɛ diɛŋtsɛ afee, shi afɔɔɔ nakai feemɔ yɛ Hong Kong, no hewɔ lɛ, mi diɛŋtsɛ mifeɔ sini lɛ mli hei ni yɔɔ oshara lɛ, tamɔ ni abaata moto kɛtsɔ lɔle yiteŋ nɛkɛ. Sinii ni mifee lɛ babaoo amli eyi kɛ jeŋba sha kɛ awuiyeli nifeemɔi. Mumɔi atsɛmɔ nifeemɔi po yɛ ekomɛi amli.

Yɛ afi 1995 lɛ, mikɛ nuu ko ni feɔ sini bote gbalashihilɛ mli. Eyɛ mli akɛ efee tamɔ nɔ ni miyɛ nɔ fɛɛ nɔ ni baahã maná miishɛɛ—gbɛ́ihemɔ, shika, kɛ wu ni sumɔɔ mi—moŋ, shi mihao waa, ni mináaa miishɛɛ. Mikpɛ miyiŋ akɛ makpa sini feemɔ.

MIKAI NYƆŊMƆ HE NII NI MIKASE YƐ MIGBEKƐBIIASHI LƐ

Mibɔi nibii ni mikase yɛ Nyɔŋmɔ he be ni miji gbekɛ yoo fioo lɛ kaimɔ. No mli lɛ, daa Hɔɔ lɛ, mi kɛ minyɛmi yoo nukpa yasaraa Yehowa Odasefoi aweku ko. Amɛpapa ni atsɛɔ lɛ Joe McGrath lɛ kɛ wɔ kɛ ebiyei etɛ lɛ kaseɔ Biblia lɛ. Amɛweku lɛ yɛ miishɛɛ waa, ni “Uncle Joe” kɛ eŋa kɛ ebii lɛ yeɔ jogbaŋŋ kɛ bulɛ. Mináa miishɛɛ waa kɛ́ mikɛ amɛ tee Kristofoi akpeei. Bei komɛi lɛ, wɔkɛ amɛyaa kpeei wuji hu. Mináa miishɛɛ waa yɛ nakai beiaŋ. Be ni mikɛ Odasefoi lɛ bɔɔ lɛ, minu he akɛ miyɛ shweshweeshwe.

 Nɔ ni tamɔɔɔ nakai lɛ, nibii eyaaa lɛ jogbaŋŋ yɛ wɔshĩa lɛ. Mipapa fee nibii ni dɔ mimami waa, ni enɛ hã ehao waa diɛŋtsɛ. Be ni miye aaafee afii nyɔŋma lɛ, mimami kɛ Yehowa Odasefoi lɛ kpa bɔɔ. Mitee nɔ mihi asafo lɛ mli, shi jeee kɛ mitsui fɛɛ, ni be ni miye afii 17 lɛ, abaptisi mi. No sɛɛ etsɛɛɛ lɛ, mikɛ mihe yawo jeŋba gbonyo mli, no hewɔ lɛ minyɛɛɛ mahi asafo lɛ mli dɔŋŋ.

MIKPƐ MIYIŊ AKƐ MAKU MISƐƐ

Be ni akpee mi sɛɛ lɛ etsɛɛɛ lɛ, asafoŋ onukpai enyɔ komɛi ni yɔɔ Yehowa Odasefoi asafo ni yɔɔ he ni miyɔɔ lɛ basara mi. Amɛtsɔɔ mi nɔ ni esa akɛ mafee koni manyɛ maku misɛɛ kɛba Yehowa Nyɔŋmɔ ŋɔɔ ekoŋŋ, ni amɛto gbɛjianɔ koni maŋsɛɛ sɔɔlɔ ko ni atsɛɔ lɛ Cindy lɛ aye abua mi. No mli lɛ, mihemɔkɛyeli lɛ nɔ egbɔ kwraa, no hewɔ lɛ mibi Cindy koni etsɔɔ mi nɔ ni tsɔɔ akɛ Biblia lɛ ji Nyɔŋmɔ Wiemɔ. Etsɔɔ mi Biblia mli gbalɛi komɛi ní eba mli. Fiofio lɛ, wɔbatsɔmɔ nanemɛi, ni ekɛɛ ekɛ mi baakase Biblia mli shishijee tsɔɔmɔi lɛ, ni mikpɛlɛ. Lɛ ji mɔ ni hã minu shishi akɛ Yehowa ji Nyɔŋmɔ ni yɔɔ suɔmɔ ní miisumɔ ni maná miishɛɛ.

Be ni mibɔi Kristofoi akpee yaa ekoŋŋ lɛ, mibana akɛ, kɛ́ miyɛ Odasefoi lɛ ateŋ lɛ, mináa miishɛɛ kwraa fe kɛ́ miyɛ mɛi ni mikɛfeɔ sini lɛ ateŋ. Shi shihilɛ mli ni mitsɔ yɛ migbekɛbiiashi lɛ hã minu he akɛ minyɛŋ mahe mɔ ko maye, ni misumɔɔɔ mi diɛŋtsɛ mihe hu. Mɔ ko ni yɔɔ asafo lɛ mli lɛ jɛ Biblia lɛ mli etsɔɔ mi bɔ ni mafee matsu nakai naagbai lɛ ahe nii, ni enɛ ye ebua mi waa, ni mibɔ mɔdɛŋ miná nanemɛi kpakpai hu.

NƆ KO NI JARA WA KWRAA FE GBƐ́IHEMƆ

Yɛ afi 1997 lɛ, mi kɛ miwu shi kɛtee Hollywood, yɛ California, yɛ U.S.A. Miye mibua mɛi yɛ jɛmɛ koni amɛná nilee ni yɔɔ Nyɔŋmɔ Wiemɔ lɛ mli he sɛɛ. Biblia lɛ ni mitsɔɔ mɛi lɛ hãa mimii shɛɔ mihe kwraa fe gbɛ́i ni mihe be ni mifeɔ sini lɛ. Akɛ nɔkwɛmɔnɔ lɛ, yɛ afi 2002 lɛ, mikɛ Cheri, ni ji mitsutsu naanyo ko ni jɛ Hong Kong lɛ kpe. Bɔ ni mihi shi mihã lɛ tamɔ bɔ ni lɛ hu ehi shi ehã lɛ pɛpɛɛpɛ. Awó lɛ “Miss Hong Kong,” ni enɔ afi lɛ, awó mi hu. Anɔkwa, be ni ahala mi akɛ miye klɛŋklɛŋ gbɛhe lɛ, lɛ ji mɔ ni kɛ akekere lɛ bu mi. Lɛ hu ebabɔi sini feemɔ, ni sɛɛ mli lɛ ebatsɔ mɔ ni toɔ sinifeemɔ he gbɛjianɔ, ni ekɛ onukpai ni ehe gbɛ́i waa bɔi nitsumɔ. Lɛ hu eshi kɛbahi Hollywood.

Be ni miná mile akɛ tsui hela ko ni yɔɔ mɔ ni kulɛ Cheri kɛbaahi shi lɛ he lɛ ehã egbo trukaa lɛ, edɔ mi waa kɛhã lɛ. Enáaa miishɛjemɔ ko kwraa kɛjɛɛɛ Buddha jamɔ ni eyɔɔ mli lɛ mli. Lɛ hu ehe gbɛ́i tamɔ mi nɔŋŋ, ni enɛ ji nɔ ko ní mɛi shweɔ akɛ amɛná, kɛ̃lɛ enáaa miishɛɛ, ni eheee mɔ ko mɔ ko eyeee. Mikɛ lɛ bɔi nibii ni mikase yɛ Biblia lɛ mli lɛ he sane gbaa, shi akɛni eji Buddhanyo hewɔ lɛ, ewa kɛhã lɛ akɛ ebaakpɛlɛ nɔ.

Minaanyo Cheri yɛ sini ko mli

Gbi ko yɛ afi 2003 mli lɛ, Cheri tswa mi kɛjɛ Vancouver, yɛ Canada, ni no mli lɛ eefee sini ko yɛ jɛmɛ. Ekɛ miishɛɛ kɛɛ mi akɛ, be ko lɛ, ekɛ tsɔne nyiɛ akrowa fɛfɛo ko mli, nɔŋŋ kɛkɛ ni ebɔi sɔlemɔ waa akɛ: “Kɛɛmɔ mi, Namɔ ji anɔkwa Nyɔŋmɔ lɛ? Mɛni ji ogbɛ́i?” Etsɛɛ nɔŋŋ ni eyatsɔ Maŋtsɛyeli Asa ko he, ni ena ni aŋma gbɛ́i Yehowa lɛ yɛ he. Enɛ hã enu he akɛ Nyɔŋmɔ ehã esɔlemɔ lɛ hetoo, ni ebɔ mɔdɛŋ akɛ ebaatao Yehowa Odasefoi lɛ asɛɛgbɛ amrɔ nɔŋŋ. Mito gbɛjianɔ mihã  lɛ, ni yɛ gbii fioo ko sɛɛ lɛ, etee asafoŋ kpee ni afeɔ yɛ Chinese mli yɛ Vancouver lɛ.

Sɛɛ mli lɛ, Cheri kɛɛ mi akɛ, “Mɛi nɛɛ sumɔɔ misane waa. Manyɛ makɛɛ amɛ nɔ fɛɛ nɔ ni gbaa minaa.” Be ni minu nakai lɛ, miná miishɛɛ waa diɛŋtsɛ, ejaakɛ be ni Cheri feɔ sini lɛ, efeee naanyo kɔkɔɔkɔ. Cheri tsa nɔ etee asafoŋ kpeei lɛ. Shi yɛ afi 2005 lɛ, eshi kɛtee China koni eyafee sinii enyɔ komɛi ni sɛɛ kɛlɛ waa, ni enɛ hã eyaje Hong Kong ekoŋŋ. Miishɛɛ sane ji akɛ, yɛ afi 2006 lɛ, Cheri jɔɔ ewala nɔ ehã Yehowa, ni abaptisi lɛ akɛ Odasefonyo yɛ kpee ko ni afee yɛ Hong Kong lɛ shishi. Eyɛ mi akɛ no mli lɛ eesumɔ ni ekɛ be babaoo asɔmɔ Yehowa moŋ, shi sinifeemɔ nitsumɔ lɛ hã ebafee nɔ ni wa kɛhã lɛ, ni enɛ hãaa ená miishɛɛ kwraa.

MIISHƐƐ NI JƐƆ MƐI KROKOMƐI NI AYEƆ ABUAA LƐ MLI

Yɛ afi 2009 lɛ, Cheri shihilɛ tsake kwraa. Ekpɛ eyiŋ akɛ ebaakpa sini feemɔ bɔ ni afee ni enyɛ ekɛ be babaoo asɔmɔ Yehowa. Ebaná nanemɛi hei yɛ Kristofoi asafo lɛ mli. Ebatsɔ mɔ ni kɛ ebe fɛɛ shiɛɔ Maŋtsɛyeli lɛ he sane kpakpa lɛ, ni eyɛ he miishɛɛ waa akɛ ebaaye ebua mɛi koni amɛná shihilɛ kpakpa.Mateo 24:14.

Sɛɛ mli lɛ, Cheri kpɛ mli akɛ ebaakase Nepalese koni enyɛ eye ebua nikasemɔ kuu ko ni Odasefoi lɛ etse yɛ Hong Kong ni amɛwieɔ Nepalese lɛ. Anɔkwa sane ji akɛ, akɛni mɛi ni yɔɔ Hong Kong ni wieɔ Nepalese lɛ nuuu Blɔfo kɛ Chinese jogbaŋŋ, ni esoro amɛkusum hu hewɔ lɛ, bei pii lɛ abuuu amɛ. Cheri gba mi bɔ ni enáa miishɛɛ kɛ́ eye ebua mɛi nɛɛ ni amɛnu Biblia lɛ shishi. Akɛ nɔkwɛmɔnɔ lɛ, gbi ko be ni eshiɛɔ yɛ shĩa fɛɛ shĩa lɛ, ekɛ Nepalese yoo ko ni le Yesu he sane fioo, shi eleee Yehowa, ni ji anɔkwa Nyɔŋmɔ lɛ he nɔ ko kwraa lɛ kpe. Cheri jɛ Biblia lɛ mli etsɔɔ yoo lɛ akɛ Yesu sɔle ehã e-Tsɛ ni yɔɔ ŋwɛi lɛ. Be ni yoo lɛ na akɛ ebaanyɛ esɔle ehã anɔkwa Nyɔŋmɔ lɛ, ni gbɛ́i ji Yehowa lɛ, ejɛ etsuiŋ ekpɛlɛ sane kpakpa lɛ nɔ. Etsɛɛ kɛkɛ ni akɛ yoo lɛ wu kɛ ebiyoo fɛɛ bɔi Biblia lɛ kasemɔ.—Lala 83:19; Luka 22:41, 42.

Cheri ŋmɛnɛ

Be ni miyɔse miishɛɛ ni Cheri náa akɛni ekɛ ebe fɛɛ shiɛɔ lɛ hewɔ lɛ, mibi mihe akɛ, ‘Mɛni hewɔ mi hu minyɛɛɛ mafee tamɔ Cheri feɔ?’ No mli lɛ, mi hu miyahi Hong Kong ekoŋŋ. Mikpɛ mli akɛ mato mishihilɛ he gbɛjianɔ jogbaŋŋ koni manyɛ mikɛ be babaoo atsɔɔ mɛi Biblia mli anɔkwalei lɛ. Mibayɔse akɛ kɛ́ mibo mɛi toi ni miye mibua amɛ ni amɛnu Nyɔŋmɔ Wiemɔ lɛ shishi lɛ, mináa miishɛɛ waa.

Mibayɔse akɛ kɛ́ miye mibua mɛi ni amɛnu Nyɔŋmɔ Wiemɔ lɛ shishi lɛ, mináa miishɛɛ waa

Akɛ nɔkwɛmɔnɔ lɛ, minyɛ mikɛ yoo ko ni jɛ Vietnam ni kulɛ eyeɔ awerɛho be fɛɛ be, ni bei pii po lɛ efoɔ lɛ kase Biblia lɛ. Amrɔ nɛɛ eyɛ miishɛɛ yɛ shihilɛ mli, ni eŋɔɔ enaa waa akɛ ekɛ asafo lɛ miibɔ.

Mi kɛ Cheri fɛɛ ná nɔ ko ni jara wa kwraa fe gbɛ́ihemɔ. Eyɛ mli akɛ wɔná miishɛɛ yɛ sinifeemɔ nitsumɔ lɛ mli ni wɔhe gbɛ́i moŋ, shi miishɛɛ ni wɔnáa kɛ́ wɔtsɔɔ mɛi Yehowa Nyɔŋmɔ he nii lɛ da kwraa fe no, ejaakɛ ehãa awoɔ Nyɔŋmɔ hiɛ nyam. Wɔna akɛ Yesu wiemɔi nɛɛ ji anɔkwale, akɛ: “Nɔhãmɔ hãa mɔ náa miishɛɛ fe nɔhemɔ.”Bɔfoi 20:35.

Ekrokromɛi Hu Nɛ

Mɛni Hewɔ Esa akɛ Okpoo Bɔ ni Adafitswaa Nibii Hãa Anaa Mɛi Lɛ?—Fã 1: Kɛhã Oblayei

Nɔ ni oblayei pii ni susuɔ akɛ kɛ́ eba lɛ hesaamɔ, bɔ ni awieɔ ahãa, kɛ nifeemɔ gbɛfaŋ lɛ, amɛyɛ srɔto kwraa lɛ feɔ nɔŋŋ ji akɛ amɛkaseɔ mɛi ni amɛnaa yɛ vidioi, TV, kɛ woji amli lɛ.